Snurak ma dida dardirin a musti nangrebat urun na'a dida inorang a verin Yesus
1 Terang a valing averi,
ita weadida tamata ovi rafla silalia.
Tamata ovi lan ana rorang Ubu,
ira wearira vali tamata ovi rafla silalia ma ti raran ni wahan a.
Ira rfaturu roak linga'an i kena a verin ita ma torang.
Ba ita musti tkiwal ma tvatuk munuk salasilan ra ovu afa ovi rotu angangal te rfalemang ita,
boma tatahang nal raladida ma wean tamata ovi rafla silalia.
Totu wean inyai,
boma torang a'uk linga'an i Ubu nfaturu roak verin ita.
2 Eka tfikir watan Yesus,
tevek Ia nfaturu linga'an verin ita ma torang Ia,
ovu nfamela dida inorang a ma wean lahir Ubu ralan nfalak a.
Tamata ra rvaval Yesus,
beti rfedan Ia na'a aa walwalur ma al rfama'it Ia,
na'uk Ia wol nfikir wean inyai.
Ia nfikir a'uk lolin i Ubu veka nala verin Ia na'a lanit ratan.
Fiang ini Ia ndoku roak Ubu wan i ndoku ma nfareta,
Ni lihir mela a na'a lanit ratan.*
3 Eka mingnanang afa ovi Yesus notu roak yai.
Na'ut i tamata salasilan ra rvaval Ia ovu ntuan wawa'uk i dawan urun,
na ntahang nal ralan.
Mingnanang a'uk Ia,
boma deka ralabira kako'u ma mifla talik bira inorang a.
4 Mkya'a roak ne,
na'ut i mkyiwal ma byatuk bira salasilan ra,
na wol mtyuan wawa'uk i wean Yesus ntuan,
ti naran i myata a.
5 Deka miblufang Duila'a Ni snurak i nala roak verin mia ma nfangrebat ralabira ra.
Duila'a nala Ni snurak a verin mia,
tevek nka'a ne,
yanan mia.
Ia nfalak ne,
“Yanak averi,
deka fyikir ne,
Ubu Ni snurak i nala roak verin mia yai maraan watan.
Ralabira deka kako'u wean i ntabu mia,
6 tevek Ubu ntabu tamata ovi nlobang ira.
Ia nsurak a nair ira,
tevek ntorung ne yanan ira.”*
7 Ba mtyahang nal ralabira na'ut i mtyuan susa te tamata ra rwi-rwa mia.
Fyikir watan ne,
inyai wean lahir i Ubu yanan mia,
wean lahir i baba isa nsurak a nair yanan ra.
Na'a inba watan,
na baba ra rsurak a rair yanarira ra.
8 Ubu ba'i ntabu tamata inorang ra munuk,
ba wean i wol ntabu mia,
na Ia wol yanan mia.
9 Yamadida lalean ovi rna'a lanit ivavan a rsurak a rair ita ovu talang ira.
Ba wean inyai,
na wean inba ovu Yamadida i na'a lanit ratan a?
Ita musti talang ovu trenar Ia,
nlia tali yamadida ovi rna'a lanit ivavan ini,
boma bisma dida vava'at kakiwal.
10 Yamadida ovi rna'a lanit ivavan ini rsurak a rair ita,
na'uk wol mnanat,
ovu rorang watan afa ovi rfikir ne kena.
Na'uk Ubu nsurak a nair ita,
tevek inan ma tatuan afa ovi lolin ra.
Ia inan ma nfamerat ita tali dida salasilan ra,
tevek Ia nmerat urun.
11 Wean i tamata ra rsurak a rair ita,
na raladida ra wol lolin,
ovu raladida lalau urun,
tevek tfarnuang wawa'uk.
Na'uk ti ma rsurak rair munuk roak ita,
na veka rotu ma tot-orang lalawatan afa ovi kena ra,
ovu vali rotu ma raladida ra malinan.
12 Ba terang a valing tamata inorang averi,
mia weabira tamata i nafla silalia ma musti fyangrebat limabira ovi rmafun,
ovu turabira ovi wol rangrebat ra.*
13 Byana watan na'a linga'an ovi manesan ovu rmalola ra,
boma tamata ovi rorang mia,
velik ne earira ra rsekat,
na'uk wol rasvotun,
ovu earira ra veka lolin lahir.*
14 Mkyiwal ma bira vava'at ra malinan ovu tamata ra munuk.
Mkyiwal vali ma bira vava'at ra rmalola na'a Duila'a wahan ralan,
tevek wol tamata isa vali bisma nsi'ik Duila'a,
wean i ni vava'at wol nmalola.
15 Mia musti msyisurak mia,
boma deka tamata isa vali nafla talik ni inorang a,
tevek Ubu nala roak Ni rala lolin a verin ita.
Myotu wean inyai,
boma tamata boku deka wearira alanu ma rfalanu bira sidovung a,
ma rotu vangoa-vanga ovu rweang nala tamata ra ma rotu afa ovi Ubu wol inan.
16 Msyi'ik wabira ma lolin,
boma tali bir tinemun,
na deka tamata isa nsifa tia ma watan ovu tamata i wol awan verin ia,
ovu wol nkamlabir Ubu Ni kalolin ra,
wean Esau.
* Mia deka weabira Esau,
tevek ia wol nalang kalolin i Ubu nala verin ia ma nfedi verin warin a,
al nkati afamtahan binan isa watan.*
17 Mia mkya'a roak ne,
na'ut i Esau mane nala kalolin yai tali yaman a,
na yaman a wol nala verin ia.
Esau nvakar ovu nkiwal mane nal-ewal kalolin yai,
na'uk wol bis roak.*
Ita tamata ovi torang Ubu tatuan tnorung ngorva'an i fyawan lia Musa ni inukun ra
18 Terang a valing averi munuk,
mia wol mtyuan afa ovi lan ana tamata Israel ra rtuan ovu rsi'ik na'a vuar Sinai.
Ira rtuan nait fufakmetan ovu yafu i nonga ma naba'al na'a inyai.
Na'ut inyai,
na deda fafyat nkum-teri vuar yai.*
19 Ira rarenar tvuri ngoan a ovu vai isa i dawan urun a ntali Ubu.
Na'ut i rarenar vai yai,
na rera verin Ubu ma fara vai yai deka nma kikyai ma rarenar.
20 Ira wol rtahang nala ma rarenar vai yai nfareta ira ne,
“Afaka watan wean i rkena vuar ini,
na tamata ra musti rala vatu ma rtev-fedan ira.”*
21 Afa ovi tamata Israel ra rsi'ik yai,
nfabobar urun ira,
ba Musa nfalak ne,
“Ya'a ubobar urun ovu raruru lalean ya'a!”*
22 Na'uk mia mya roak vuar Sion,
na'a Ubu i nva'at nata ti wol ni wahan,
Ni kota a.
Kota yai Yerusalem i na'a lanit ratan.
Mia mtyuan Ubu Ni sansinir na'a lanit ratan rivun urun,
rasdovu ira ma rfadawang Ia ovu ralarira lolin.
23 Mia mtyuan roak sidovung i neluk Ubu yanan iya'an ra.
Tamata avyai tamata inorang ovi Ubu ntulis roak nararira ra na'a lanit ratan.
Mia mtyuan vali Ubu i nfaleka inukun verin tamata ra munuk.
Mtyuan vali tamata ovi rira vava'at ra kena ovu afa ovi Ubu ralan nfalak a,
rira roh ra.*
24 Mia mtyuan lahir Yesus na'a inyai.
Ia neluk leta verin mia na'a Ubu Ni tnorung ngorva'an yai.
Mia fyaklo'i a'uk bira inorang a verin Ia,
tevek laran i nvoat roak a.
Laran yai wol wean Habel laran a,
tevek Yesus laran a Ni ngrebat dawan urun.*
Deka tanovak ne, Ubu Ni tnorung ngorva'an i tatuan na'a Yesus maraan watan
25 Ba wean inyai bi msyi'ik wabira ma lolin,
betane mifena ma mryenar i Ubu nangrihi verin mia.
Wean i lan a,
tamata Yahudi rafena ma rarenar Ubu Ni vaivatul ra na'a lanit ivavan ini,
na ira wol ralit tali Ni inukun a.
Ba wean i tafena ma trenar Ubu i nangrihi tali lanit ratan a,
na wean inba ma bis dida vava'at kakiwal?
26 Na'ut inyai,
na Ubu vain a dawan urun,
ovu notu ma lanit ivavan a raruru.
Na'uk fiang ini Ubu notu roak Ni tnorung ne,
“Veka otu fasa ewal,
na'uk wol mane lanit ivavan watan raruru,
na'uk lanit raruru vali.”*
27 Ubu nfalak ne,
“Veka otu fasa ewal,”
nfaturu na'a afa ovi notu ra munuk.
Ia veka notu ma afa avyai munuk raruru ovu rakvisal.
Notu wean inyai,
boma Ni Fareta a nana'a watan,
tevek Ni Fareta yai wol bisma raruru ovu nakvisal.
28 Ba wean inyai,
na ita musti tfalak fara weninyai verin Ubu,
tevek Ni Fareta i nala verin ita wol bisma nakvisal.
Mya ma tfadawang Ubu ovu tfalak fara weninyai verin Ia,
ma tfaloling ralan a,
ovu vali talang ovu tbobar Ia.
29 Ita musti totu wean inyai,
tevek Ubu Ni ngrebat ma nukun tamata ra,
wean yafu i bisma nasnuri munuk afakataka.*