Afa ovi totu ra musti rotu ma Ubu ralan a lolin ovu ita
1 Terang a valing tamata inorang averi,
fara msyilobang lalawatan mia.
2 Mia musti mtyorung ma mangun ra rna'a teri bira rahan ra.
Mingnanang!
Tamata ovi rorang Ubu boku rtorung roak ma mangun ra rna'a teri rira rahan ra,
na'uk wol rka'a ne,
mangun avyai Ubu Ni sansinir tali lanit ratan.*
3 Mingnanang ma mlyobang tamata inorang ovi rna'a bu'i ralan a.
Wean i mlyobang ira,
na mia fyarnuang vali rira susa ra.
Mingnanang ma mlyobang tamata ovi rtuan susa ra,
tevek tamata ra rotu sian ira.
Mlyobang ira wean i ka'i mlyobang tenabira ra.
4 Vata te brana ovi rsifa roak a,
musti ralang rira sifa a.
Inyai ihin a ne,
deka mtyuba ovu vata te brana ovi wol awabira verin ira,
tevek Ubu veka nukun mia.
Vata te brana ovi wol awabira obin,
deka msyifa tia ma watan,
tevek Ubu veka nukun vali mia.
5 Deka wahabira kubang,
na'uk fyikir watan ne afa ovi rna'a mia,
naran roak ma bya'at.
Tevek Ubu nfalak roak ne,
“Ya'a wol usi'ik watan ma aksa oa,
ovu Ya'a wol uti talik oa.”*
6 Wean inyai bi,
tka'a urun ma tfalak ne,
“Duila'a nlobang lalawatan ya'a,
ba wol ubobar.
Tamata ovi rna'a lanit ivavan ini veka rotu afaka verin ya'a?”*
7 Deka miblufang bira dawan ovi rfamalik Ubu Ni vaivatul ra.
Msyi'ik ma lolin afa lolin ovi rotu na'a rira vava'at ra lokat amar,
ovu msyi'ik rira inorang na'a Yesus Kristus ma myot-orang.
8 Yesus Kristus sam lahir,
tali lalan a,
fiang ini,
nata ti wol ni wahan.
9 Ba deka mtyorung afa sala ovi tamata rair ra.
Afa sala avyai bisma rfalek-nala mia.
Na'uk mia musti fyaklo'i a'uk bira vava'at ra verin Ubu i nfangrebat ita,
tevek nfaturu roak Ni rala lolin a verin ita.
Deka fyaklo'i bira vava'at ra na'a adat ovi rfalak na'a fana'an-fanenu ra,
tevek adat avyai wol ihir akataka.
10 Yahudi rira mela falurut ovi rkarya na'a befak dawan i tamata Yahudi ra ba'i raraning Ubu na'a,
wol bisma ra'an korban ovi rfadoku na'a wan i ba'i rasnuri rira korban ra na'a.
Na'uk Yesus nala tenan a ma neluk korban verin Ubu ma al ntevut dida salasilan ra,
boma dida vava'at kakiwal ovu Ubu.*
11 Yahudi rira Mela Falurut Ila'a ntaha afwatan laran a ma al nkati rira salasilan ra,
ma nti ruang i nmerat rahi lia munuk na'a befak dawan yai.
Na'uk rasnuri afwatan avyai na'a befak ra muririra ra.*
12 Yesus wean vali inyai.
Laran a ka'i nvoat ma nfamerat Ni tamata ra tali rira salasilan ra.
Na'uk aksa Ia ntuan susa,
ti naran i nmata a,
na'a kota Yerusalem murin a.
13 Yesus nti roak kota murin,
ma tamata ra rfedan Ia na'a inyai.
Ba tatalik munuk dida afakataka,
ma tati ma torang a'uk Ia,
velik ne tamata ra rfalak sian ita.
14 Tevek na'a lanit ivavan ini,
na ita wol wadida ma tva'at kakiwal.
Ita tdava ahu livur mnga'un i veka nma yai.
15 Ba nahu Yesus,
na mya ma tala lalawatan dida korban verin Ubu.
Dida korban yai wean lahir i tfalak fara weninyai verin Ubu ovu tfadawang Ia.
16 Deka miblufang ma myotu afa ovi lolin ra ovu mlyobang tamata liak ra,
tevek afa avyai reluk korban ovi rfaloling Ubu ralan a.
17 Mia myot-orang afa ovi bira dawan ra rfalak ra,
tevek rira varvara ma rvalat Ubu na'a afa ovi rotu roak ma rfangrebat bira inorang a.
Myotu wean inyai,
boma rkarya ovu ralarira lolin.
Wean i wahal,
na ralarira ra veka lalau,
ma veka wol utubira.
18 Miflurut lalawatan verin ami.
Amka'a ne,
afa ovi amotu ra kena na'a Ubu wahan ralan a.
Inamami ma na'a afaka watan,
na amotu lalawatan afa ovi kena ra.
19 Era verin mia ovu ralang urun ma miflurut verin ya'a.
Myera verin Ubu ma nala linga'an verin ya'a,
boma yarak ewal ya'a ma ti utuan mia.*
Falurut i nfakbosal surat ini
20 Ubu nfava'at roak dida Duila'a Yesus tali matmatan,
ba Yesus neluk Domba Duan i Ni dawan nrahi lia munuk a verin ita,
Ni domba ra.
Yesus laran a nfakena roak Ubu Ni tnorung a,
nata ti wol ni wahan.
Ba era ma fara Ubu i nala malinan verin tamata ra,
21 nala Ni kalolin a,
Ni ngrebat a,
ovu afaka watan verin mia,
boma myotu watan afa ovi ralan nfalak a.
Fara Yesus Kristus nlobang ita ovu Ni ngrebat a,
boma tot-nala afa lolin ovi rotu ma Ubu ralan a lolin a.
Mya ma tfadawang Kristus,
nata ti wol ni wahan.
Kena urun!
22 Terang a valing averi,
era verin mia ma eka mryenar ma lolin ning snurak ovi,
tevek ning surat wol blawat.
23 Inak ma ufalak verin mia ne,
rfatalik roak terad i Timotius tali bu'i ralan.
Ba wol mnanat,
na ia veka nma wang i una'a ini,
ma amrua amati amalola mia na'a wabira i mnya'a yai.
24 Amala salam verin bira dawan ra munuk,
ovu verin Ubu Ni tamata inorang ra munuk.
Terad a valid tamata inorang ovi rtali Italia,
rala salam vali verin mia.
25 Era ma fara Ubu nala Ni rala lolin a verin bir tinemun.
Ning surat lawan watan ini.