Yesus nala tenan a fasa watan ma neluk korban verin Ubu, ma ntevut tamata rira salasilan ra
1 Terang a valing averi!
Musa ni inukun ra reluk faneak watan na'a afa lolin ovi Ubu veka nala verin ita.
Ita wol tatuan afa lolin avyai tevek tot-orang inukun avyai.
Na'a Yahudi rira inukun avyai,
na varat nkati varat a,
tamata ra rti ma rala rira korban ra verin Ubu,
na'uk rira korban ra wol rfamerat nal ralarira ra.
2 Wean i inukun avyai rfamerat nala tamata ovi rala fasa watan rira korban ra verin Ubu,
na veka wol rala roak rira korban ra verin Ia,
tevek wol rfikir roak rira salasilan ra.
3 Na'uk lyawan roak ne,
korban ovi tamata rala lokat varat yai rfangnanang ira lalawatan ne,
tamata salasilan ira.
4 Kena urun,
tevek sapi brana te bibi brana laran wol bisma na'i vatuk tamata rira salasilan ra.
5 Wean inyai bi,
na'ut i Yesus Kristus nma lanit ivavan ini,
na nfalak verin Ubu ne,
“Ubu,
Oa wol inam lahir afwatan ovi tamata rala ma reluk rira korban,
ovu afa liak ovi tamata ra rala ma reluk rira persembahan verin Oa.
Na'uk Oa mususan tenang a ma neluk korban verin Oa.
6 Oa wol inam ma tamata ra rala rira afwatan ra verin mela falurut ra ma rasnuri,
ma reluk rira korban,
te afa liak ovi tamata rala ma reluk rira korban verin Ubu,
ma al rkati rira salasilan ra.
7 Nata ufalak ne,
‘Ubu,
ini Ya'a!
Uma boma ot-orang afa ovi ralam a nfalak a,
wean i rfamalik roak Ya'a na'a buku lalulung a.’ ”*
8 Kristus nfalak lan roak verin Ubu ne,
“Oa wol inam lahir afwatan ovi tamata rala ma reluk rira korban,
ovu afa liak ovi tamata ra rala ma reluk rira persembahan ra.
Oa wol inam vali ma tamata ra rala rira afwatan ra verin mela falurut ra ma rasnuri,
ma reluk rira korban,
ovu afa liak ovi tamata rala ma reluk rira korban verin Ubu ma al rkati rira salasilan ra.”
Kristus nfalak wean inyai,
velik ne rfadoku roak afa avyai na'a Musa ni inukun ra.
9 Nata Ia nfalak ne,
“Ubu,
ini Ya'a!
Uma boma ot-orang afa ovi ralam a nfalak a.”
Ba Ubu na'i vatuk korban ovi rfadoku roak na'a Musa ni inukun ra,
ma nkati ovu Yesus Kristus Ni matmatan a ma neluk korban ngorva'an.
10 Yesus Kristus not-orang roak afa i Ubu ralan a nfalak a,
ma nala tenan a ma nmata fasa watan ma neluk korban.
Tali Ni matmatan a,
na nfamerat ita tali dida salasilan ra,
nata ti wol ni wahan.
11 Lokat amar,
na Yahudi rira mela falurut ra munuk rdiri ma rfabana rira karya ra,
ma rala lalawatan tamata ra rira afwatan ovu afa liak ovi rala ma reluk korban.
Na'uk rira korban avyai munuk wol rot-nala ma Ubu na'i vatuk rira salasilan ra.*
12 Na'uk Yesus Kristus ka'i nala tenan a ma nmata fasa watan ma neluk korban verin Ubu,
boma na'i vatuk tamata rira salasilan ra.
Notu munuk wean inyai,
beti ndoku Ubu Ni lihir mela ma nfareta vali.
13 Ba tali na'ut inyai,
na Yesus nanaban watan amar ma Ubu veka nfaleka munuk tamata ovi rira sian Ia ma rsoak verin Ia.*
14 Ba Yesus nmata fasa watan ma neluk korban verin Ubu,
ma ntevut roak tamata ra tali rira salasilan ra,
ovu notu ma rira vava'at ra rmalola,
nata ti wol ni wahan.
“Ini Ya'a Ning tnorung i veka otu verin Ning tamata ra na'a amar ovi veka rma ini:
Ya'a veka ufadoku Ning inukun ra na'a ralarira ra,
ovu utulis inukun avyai na'a rira fikiran ra.”
Duila'a nfalak wean inyai.
Ia nfalak roak wean inyai,
beti nfalak vali ne,
17 “Ya'a wol ungnanang roak rira salasilan ra ovu rira afa sala ovi rotu ra.”*
18 Ba wean i Ubu na'i vatuk munuk roak dida salasilan ra,
na wol tala roak afwatan ovu afa liak ra ma reluk dida korban ma al rkati dida salasilan ra.
Mya ma tfaseri a'uk Ubu
19 Terang a valing averi,
Yesus laran nvoat ma nmata,
ba wol tbobar roak ma tfaseri Ubu,
ma ti tna'a wan i nmerat rahi lia munuk.*
20 Yesus nasusan roak linga'an ngorva'an verin ita.
Linga'an i nala vava'at verin ita ma tati wan i nmerat rahi lia munuk yai,
nahu Ni matmatan a.
Yesus ka'i ntorung ma nala tenan a ma nmata verin ita.
Inyai wean lahir maloli dawan amafal i nana'a Yahudi rira Rahan Dawan Falurut ralan a,
ma ka'i namadir lahir na'ut irua.
Ba linga'an ma tati wan i nmerat rahi lia munuk a,
natvelar roak.*
21 Ba fiang ini,
ita dida roak Mela Falurut Ila'a isa ma nfareta na'a Ubu Ni rahan a.*
22 Ba wean inyai,
na mya ma tfaseri Ubu ovu raladida urun,
ovu torang urun Ia.
Tevek Yesus nfamerat roak raladida ra ovu laran a,
boma wol tvua roak afa sian na'a raladida ila'a ra.
Ia nfamerat roak tenadida ra ovu wear i nmerat urun a.*
23 Dida dardirin a musti nangrebat na'a dida inorang a verin Yesus.
Ita tfaklo'i a'uk dida vava'at ra verin Ia,
tevek not-orang lalawatan afa ovi nfalak ra,
ovu wol nablufang Ni tnorung a verin ita.
24 Ita musti tsifangnanang ita,
boma bisma tsifangrebat raladida ra ma isa nlobang isa,
ovu vali totu afa ovi lolin ra.
25 Fara deka fyaroa tenabira ra tali tamata ovi rorang Ia rira sidovung ra,
wean lahir tamata boku ba'i rotu.
Na'uk iva'udida ma tsisurak ovu tsilobang ita,
tevek tka'a roak ne,
wol mnanat,
na Duila'a veka nma ewal.
Deka tatalik dida inorang a
26 Wean i trenar roak Ubu Ni ivar mnga'un a,
na'uk wol tkamlabir ivar yai ma ka'i totu watan salasilan,
na wol korban liak roak ma Ubu na'i vatuk dida salasilan ra.*
27 Ba wean i totu salasilan wean inyai,
na musti tbobar urun ovu tnaban watan ma Ubu veka nukun lokat tamata ovu yafu i ongan a dawan urun a.
Yafu yai veka narang tamata ovi rangal Ia.*
28 Wean i tamata isa ba'i nangal Musa ni inukun ra,
ovu tamata irua te itelu rsi'ik afa i notu a ma rfamalik ni sala a,
na tamata ra veka wol rlobang ia,
ba tamata i ba'i nukun tamata ra veka nfaleka inukun matmatan verin ia.*
29 Na'uk nlia tali inyai verin tamata i nfalak sian Ubu Yanan a ovu wol nalang lahir Ia.
Tamata yai nanovak ne,
Yesus laran i nvoat al ntevut ia wol fyawan akataka,
ovu vali nfalak sian Ubu Ni Roh i nfaturu Ni rala lolin a verin tamata ra.
Ubu veka nukun tamata yai ovu inukun i aleman urun a.
Inukun yai aleman lia inukun i Ubu nala verin tamata ovi rangal Musa ni inukun ra.*
30 Ubu nfalak roak ne,
“Ya'a veka ubalas rira afa sian ovi rotu ra ma ukun ira.”
Ia nfalak vali ne,
“Duila'a veka nfaleka inukun verin Ni tamata ra ma inovan ovu afa ovi rotu ra.”*
31 Ita veka tbobar ma raruru lalean ita,
wean i Ubu i nva'at a nukun ita. *
32 Ba terang a valing averi,
mingnanang amar ovi rti roak veli,
na'ut i beti myorang Ubu Ni Ivar Lolin.
Amar yai,
na mtyuan susa dawan urun,
na'uk bira dardirin nangrebat ovu wol mifla talik bira inorang a.
33 Amar boku,
na tamata ra rfalak sian mia,
ovu vali rwi-rwa mia na'a tamata rivun waharira ralan ra.
Amar boku,
na mlyobang tamata liak ovi rtuan vali susa wean mia.
34 Mia fyarnuang vali tamata ovi rna'a bu'i ralan rira susa ra,
ma mlyobang ira.
* Wean i tamata boku rkiwal ma rala bira metan ra,
na ralabira lolin watan,
tevek mkya'a roak ne,
bira metan mnga'un ra rna'a obin,
ovu metan avyai veka rna'a lalawatan,
nata ti wol ni wahan.
35 Ba wean inyai,
na deka mifla talik bira inorang a,
tevek wean i bira dardirin nangrebat urun na'a bira inorang a,
na Ubu veka naval ma dawan mia.
36 Mia musti mtyahang nal ralabira na'a bira inorang a,
boma wean i myotu lalawatan afa ovi Ubu ralan nfalak a,
na bira munuk afa ovi Ubu ntorung roak ma nala verin mia.
37 Rtulis roak na'a Surat Ralan ne,
“Wol mnanat,
na Ia veka nma.
Ia wol nanaban ma mnanat,
na veka nma lahir.
38 Ning tamata ovi rira vava'at ra rmalola,
tevek rorang Ya'a,
ira veka rira vava'at kakiwal ovu Ya'a.
Na'uk wean i rafla talik Ya'a,
na veka wol inak ira.”*
39 Ita wol weadida tamata ovi rafla talik rira inorang a,
ma Ubu veka nukun ma dawan ira.
Na'uk ita torang watan Ubu,
ba Ia veka nsikat ita tali dida salasilan ra,
ma dida vava'at kakiwal.