Tamata Yahudi rira befak dawan ma raraning Ubu na'a, ovu mela falurut ra rkarya na'a inyai
1 Terang a valing averi,
lalan ana Ubu nala Ni tnorung mnanat verin Musa.
Tnorung yai ni adat ma nfalyawang wean inba ma tamata ra rfadawang Ubu,
ovu rahan ma tamata raflurut na'a.
Rahan yai tamata ra ka'i rotu watan.*
2 Ira rotu rahan yai tali afwatan ulin ma felan a wean befak dawan,
ma mela falurut ra ba'i raraning Ubu na'a.
Ira relak befak dawan yai na'ut irua,
ma ruang isa na'a muri,
na isa na'a ulu.
Ira rfanara ruang i na'a muri yai ne,
ruang i nmerat urun a.
Na'a ruang yai,
na rfadoku damar wan ovu meja ma ba'i rfadoku roti ovi rala ma reluk rira persembahan verin Ubu.
3 Na'a ruang i nmerat urun yai ralan a,
na rfaklo'i maloli dawan amafal isa ma nteri ruang i na'a ulu a.
Ira rfanara ruang i na'a ulu yai ne,
ruang i nmerat rahi lia munuk a.*
4 Na'a ruang i nmerat rahi lia munuk yai,
na rfadoku wan i ba'i rasnuri afa ovi umarira ra voan lolin.
Wan yai rotu tali masa.
Vatvatat* isa na'a vali ruang yai.
Rfanara vatvatat yai ne,
vatvatat tnorung.
Ira rala masa ma rsoka munuk lahir na'a vatvatat yai.
Vatvatat yai nsa'a vatu nglavar irua i rtulis inukun vutu ovi Ubu nala verin Musa,
ovu suran masa i nsa'a afamtahan i naran manna,
ovu vali Harun ni takil i naftuvul roak a.*
5 Na'a vatvatat yai ratan a,
na rfadoku walut irua na'a.
Walut irua yai nararira kerub,
ovu felarira ra wean Ubu Ni sansinir ovi rtali lanit ratan a ma rfaturu ne,
Ubu nana'a inyai,
ovu vanan i nfitik nyadat.
Kerub irua yai manirira ra ratvelar watan na'a vatvatat yai nulan a.
Ira rfanara nulan yai ne,
wan i Ubu na'i vatuk salasilan ra.
Na'uk fiang ini wol bisma amfamalik munuk afa ovi ma lyawan verin mia.
6 Rasusan munuk roak befak dawan yai,
ma afakataka rna'a munuk warira ra,
beti Yahudi rira mela falurut ra ba'i rti ruang i nmerat urun yai a ma rfabana rira karya a.
7 Na'uk Mela Falurut Ila'a a'uk sa'i bisma nti ruang i nmerat rahi lia munuk yai,
varat isa fasa watan.
Ia musti ntaha afwatan laran i neluk persembahan verin Ubu,
tevek ni salasilan ra ovu vali salasilan ovi tamata Yahudi ra rotu,
na'uk wol rka'a.*
8 Wean inyai bi,
Ubu Ni Roh nfalyawang verin ita ne,
linga'an ma tati ruang i nmerat rahi lia munuk wol natvelar obin,
tevek ruang i nmerat urun nana'a obin.
9 Afa avyai rfalyawang ne,
fiang ini afwatan ovi tamata ra rala ma reluk rira korban ovu afa liak ovi rala ma reluk rira persembahan verin Ubu,
wol bisma rfamerat tamata ralarira ila'a ra tali salasilan ovi rotu ra.
10 Tevek adat avyai rfamalik watan na'a fana'an-fanenu ra,
ovu afa ovi tamata rotu ma al rfamerat tenarira ra,
wean rira adat a.
Na'uk afa avyai wol rotu ma tamata ralarira ra ovu rira fikiran ra rmerat urun.
Ira rorang adat avyai,
ti naran i Ubu Ni tnorung ngorva'an yai nma.*
Yesus neluk dida Mela Falurut Ila'a, ma nkarya na'a befak dawan na'a lanit ratan i lolin lia tali befak dawan mnanat i na'a lanit ivavan a
11 Na'uk Kristus nma roak ma neluk Mela Falurut Ila'a,
ma nala afa ovi lolin verin tamata ra.
Ia nti roak befak dawan i na'a lanit ratan ralan a.
Befak dawan yai lolin ovu nmerat lia befak dawan i lan a Musa notu a,
ovu vali wol ntali lanit ivavan ini.*
12 Kristus nti ruang i nmerat rahi lia munuk ralan a,
na wol ntaha bibi brana laran a,
te sapi ko'u laran a.
Ia nti ruang i nmerat rahi lia munuk yai ralan a fasa watan,
ma ka'i nala laran a ma al nakvanak dida salasilan ra,
nata ti wol ni wahan.
13 Tamata Yahudi ra rangal adat tali Musa ni inukun ra,
ma ka'i rfangra tenarira ra ovu afa ovi rotu ra.
Wean inyai bi,
Yahudi rira mela falurut ra rala bibi brana laran a ovu sapi brana laran a,
ma rasmir na'a ira,
boma rfamerat ira.
Ira rala vali sapi vata i wol yanan obin ma rasnuri ia ma ni kyavu a,
rala ma al rasmir na'a tamata avyai,
boma tenarira ra rmerat.*
14 Na'uk Kristus laran a lolin lia tali afa avyai,
tevek Ubu Ni Roh i nva'at kakiwal a nala ngrebat verin Ia.
Wean inyai bi,
Kristus ka'i nala tenan a ma neluk korban i nmerat urun,
tevek Ia wol Ni salasilan.
Ia notu wean inyai ma nfamerat raladida ila'a ra tali afa ovi totu ma wol ihir akataka,
boma bisma tfadawang Ubu i nva'at a.
15 Ba Kristus neluk leta verin ita na'a Ubu Ni tnorung ngorva'an yai,
boma tamata ovi Ubu nera roak ira,
bisma rira munuk kalolin ovi Ubu nfadoku roak na'a Ni tnorung a.
Kalolin avyai rna'a,
nata ti wol ni wahan.
Kristus nmata ma ntevut ira tali rira salasilan ovi rotu ma rangal Ubu Ni tnorung mnanat i nala verin Musa.
16 Wean i tamata isa mane nsiduk ni metan ra,
na ia notu surat kuasa verin yanan te ubun ra.
Na'uk wean i wol nmata obin,
na surat yai wol ihin akataka obin.
Surat yai bisma fyawan,
wean i tamata ra rka'a lahir ne,
tamata i notu surat yai nmata roak.
17 Tevek wean i tamata i notu surat yai nva'at obin,
na wol bisma rfabana surat yai obin.
Wean i tamata i notu surat yai nmata roak,
beti bisma rfabana surat yai.
18 Ba rfedan afwatan ovu rasmir laran a,
beti bisma rfabana nala tnorung i ula lalean.
19 Lalan ana,
Ubu nala Ni inukun ra verin Musa.
Na'ut i Musa nfamalik munuk inukun avyai verin tamata Yahudi ra,
na ia nala bibi brana ovu sapi ko'u lararira ra ma nsileti ovu wear.
Ia nala domba vulun i navuli a ovu aa ko'u i naran hisop anan ra,
beti nsovu na'a lara i nsileti roak ovu wear yai.
Notu wean inyai,
beti nasmir na'a buku lalulung i ntulis Ubu Ni inukun ra na'a,
ovu vali nasmir na'a tamata Yahudi ra.
20 Musa notu wean inyai,
beti nfalak ne,
“Ya'a ala lara ini ma al ufangrebat Ubu Ni tnorung verin mia ma musti myot-orang.”*
21 Ia notu vali wean inyai na'ut i nasmir lara na'a befak dawan i ba'i raraning Ubu na'a yai,
ovu afa ovi rna'a munuk befak yai ralan a,
ma mela falurut ra rfadawang Ubu.*
22 Musa ni inukun ra rfalak ne,
labir mane na'a afaka watan,
na musti rfamerat afa avyai ovu lara veki.
Wean i lara wol nvoat,
na Ubu wol na'i vatuk tamata rira salasilan ra.*
23 Ba wean inyai,
na afa ovi rna'a befak dawan i ba'i raraning Ubu na'a lanit ivavan ini,
rfaturu afa ovi rna'a lanit ratan.
Yahudi rira mela falurut ra musti rfedan tamata ra rira afwatan ra ma reluk korban verin Ubu,
ovu rala lara ma al nfamerat befak dawan i na'a lanit ivavan ini.
Na'uk korban i nfamerat befak dawan i na'a lanit ratan,
lolin lia tali inyai.*
24 Kristus wol nti befak dawan i tamata rotu a.
Befak dawan yai labir mane wean watan wan i nmerat rahi lia munuk a na'a lanit ratan.
Na'uk Ia nti lahir lanit ratan,
ma fiang ini ndiri Ubu wahan ralan ma naflurut verin ita.
25 Yesus wol nti lalawatan ma nala tenan a ma neluk Ni korban verin Ubu,
wean Mela Falurut Ila'a ba'i notu lokat varat ma ntaha afwatan laran,
ma neluk tamata ra rira korban verin Ubu.
Na'uk Yesus Kristus nti fasa watan wan i na'a lanit ratan ma neluk korban verin tamata ra munuk.
26 Wean i lokat varat,
na Kristus nala tenan a ma neluk korban,
na inyai wean i ntuan susa lalawatan tali na'ut i Ubu beti notu lanit ivavan a.
Na'uk fiang ini lanit ivavan sarseri roak mane namwear.
Ia nma roak lanit ivavan a fasa watan ma nala tenan a ma neluk korban,
al na'i vatuk tamata rira salasilan ra.
27 Ubu nfadoku roak ma tamata ra rmata fasa watan,
beti ti rdiri Ubu wahan ralan a ma nfaleka inukun verin ira.
28 Kristus wean vali inyai.
Ia nala tenan a ma nmata fasa watan ma na'i vatuk tamata rivun rira salasilan ra.
Ia veka nma ewal,
na'uk wol mane nmata ma ntevut dida salasilan ra.
Ia veka nma verin tamata ovi rnaban Ia,
ma nsikat ira tali rira salasilan ra,
ma rira vava'at kakiwal.*