Yesus neluk Mela Falurut Ila'a ma nlobang ita
1 Terang a valing averi,
tali afa ovi tangrihi munuk roak yai,
ihin a ne:
Ita dida roak Mela Falurut Ila'a wean ini.
Ia ndoku Ubu wan i nfareta a,
Ni lihir mela,
na'a lanit ratan.
Ubu Ni dawan lia munuk afakataka.*
2 Ia nkarya ma neluk Mela Falurut Ila'a na'a wan i nmerat rahi lia munuk.
Ihin a ne,
na'a rahan falurut mnga'un i na'a lanit ratan.
Duila'a sa'i not-nala rahan yai,
ovu rahan yai wol wean befak dawan i lalan a tamata ra rotu ma raraning Ubu na'a.
Yahudi rira befak dawan i rasnuri rira afwatan ra na'a ma raraning Ubu (Ibrani 8:2)
3 Ubu nfili lokat Mela Falurut Ila'a,
ma rfedan afwatan ovi tamata ra rala ma reluk rira korban verin Ia.
Ira rtaha vali afa liak ovi tamata ra rala ma reluk rira persembahan verin Ubu.
Yesus neluk Mela Falurut Ila'a verin ita,
ba Ia musti nala vali afa isa ma neluk Ni korban verin Ubu.*
4 Wean i Yesus nana'a lanit ivavan ini obin,
na wol neluk mela falurut.
Tevek tamata ovi reluk mela falurut ra rna'a roak,
ma rala korban ra verin Ubu,
ma rot-orang inukun ovi Ubu nala verin Musa.
5 Mela falurut ra rkarya na'a Rahan Dawan Falurut i na'a lanit ivavan a.
Rahan yai felan labir mane wean watan afa ovi rna'a lanit ratan.
Ita tka'a afa ini,
tevek na'ut i Musa mane nfadiri befak dawan ma raraning Ubu na'a,
na Ubu nfalak verin ia ne,
“Mungnanang!
Motu munuk befak dawan yai wean lahir i ufaturu roak verin oa,
na'ut i mna'a vuar Sinai.”*
6 Na'uk fiang ini,
Yesus Ni karya na'a lanit ratan a lolin rahi mela falurut ra rira karya na'a lanit ivavan a.
Yesus neluk leta verin ita na'a Ubu Ni tnorung ngorva'an i notu ma ita lolin ewal ovu Ubu.
Tnorung ngorva'an yai lolin urun ma nlia tnorung i mnanat a,
tevek afa ovi Ubu ntorung roak ma nala verin ita nahu Yesus,
lolin urun.*
7 Tnorung mnanat yai wol not-nala ma tamata rira vava'at ra lolin ewal ovu Ubu,
ba Ia nala tnorung ngorva'an a ma al nkati inukun avyai.
8 Ubu nsi'ik,
na Ni tamata ra rotu sala,
ba ntabu ira,
ma nfalak ne,
“Kena urun ma veka naran ni amar a,
na Ya'a veka otu tnorung ngorva'an verin tamata Israel ra,
ovu tamata ovi rtali arun dawan Yehuda.*
9 Tnorung ngorva'an ini wol wean tnorung i otu roak ovu uburir-nusirira ra,
na'ut i utaha limarira ra ma ovun ira ma rdir-talik negara Mesir.
Ira wol rot-orang afa ovi ufalak ra na'a Ning tnorung a,
ba wol ukamlabir roak ira.
10 Na'uk veka otu Ning tnorung ngorva'an verin tamata Israel ra wean ini:
Na'a amar ovi veka rma ini,
na Ya'a veka ufadoku Ning inukun ra na'a rira fikiran ra,
ovu veka utulis inukun avyai na'a ralarira ra.
Ya'a veka eluk Ubu verin ira,
ovu ira veka reluk Ning tamata ra.
11 Ira veka wol rair roak terarir-valirira ra,
ovu veka wol rair vali rira tiniman ra ma rka'a Duila'a,
tevek ira munuk,
ko'u te dawan,
veka rka'a Ya'a.
12 Na'ut inyai,
na Ya'a veka a'i vatuk rira sala ra,
ovu veka wol ungnanang roak rira salasilan ra.”*
13 Ba terang a valing averi,
Ubu nfalak roak na'a Ni tnorung ngorva'an a ne,
tnorung ngorva'an nkati roak tnorung i mnanat yai.
Tevek tnorung mnanat yai mnanat da'in roak,
ovu veka nmamu watan.