Ibrani 7

Kristus ovu Melkisedek

1 Terang a valing averi, lalan ana, Melkisedek neluk raja na'a kota Salem, ovu vali neluk mela falurut verin Ubu i Ni dawan nlia munuk afakataka. Ia nti ma ntuan Abraham. Na'ut inyai, na Abraham notu rihi ma nfaleka raja ra, ma newal roak ia. Ba na'ut inyai, na Melkisedek nera verin Ubu ma naflahar Abraham. 2 Ba Abraham nala ni perpuluhan tali afa ovi utun roak tali raja ra verin Melkisedek. Melkisedek naran ini ihin ne a, raja i notu lalawatan afa ovi rmalola ra. Ia neluk raja na'a Salem, ba naran isa vali ne, raja i nvua malinan, tevek Salem ihin a ne, malinan. 3 Wol tka'a lahir ne, Melkisedek ini renan-yaman ovu ubun-nusin aba. Wol tka'a vali ne, rarali ia na'ut ba, ovu nmata na'ut ba. Ia wean Ubu Yanan a ma neluk mela falurut, nata ti wol ni wahan.

4 Eka minovak! Melkisedek ini, dawan urun ia. Ubud-nusid i Abraham dawan vali wean ia, na'uk nalang Melkisedek ma nala ni perpuluhan tali afa ovi utun roak tali raja ra. 5 Inukun ovi Ubu nala verin Musa rfalak ne, mela falurut ra rtali arun dawan Lewi ubun-nusin ra ovu musti rasdovu perpuluhan tali terarir-valirira tamata Israel ra munuk, velik ne Abraham ubun-nusin munuk ira. 6 Melkisedek yai wol ntali Lewi ubun-nusin ra, na'uk Abraham nala ni perpuluhan yai verin ia. Melkisedek nera verin Ubu ma naflahar Abraham, velik ne Ubu nala roak Ni tnorung a verin Abraham. 7 Tka'a roak ne, tamata i naflahar tamata liak ra ni dawan nlia ira. 8 Yahudi rira mela falurut ra rala perpuluhan tali tamata Israel ra, na'uk veka naran ni amar a ma rmata vali. Na'uk Melkisedek nala vali perpuluhan tali Israel ra, ovu rtulis na'a Surat Ralan ne, nva'at, nata ti wol ni wahan. 9 Ba Lewi ubun-nusin ra ba'i rala perpuluhan tali tamata Israel ra. Na'uk bisma tfalak ne, nahu Abraham, na ira rala vali perpuluhan verin Melkisedek, wean lahir na'ut i Abraham nala ni perpuluhan verin Melkisedek. 10 Kena urun ma na'ut i Abraham ntuan Melkisedek, na wol rarali Lewi ovu ubun-nusin ra obin, na'uk rna'a roak Abraham tenan a. Ba Lewi wean i novu roak Abraham na'ut i Abraham nala ni perpuluhan verin Melkisedek, tevek Abraham ubun nusin Lewi.

Kristus neluk Mela Falurut Ila'a wean Melkisedek, ovu Ni dawan a nlia mela falurut ovi rtali arun dawan Lewi

11 Na'ut i Ubu nala Ni inukun ra verin tamata Yahudi ra nahu Musa, na nsikat Lewi ubun-nusin ra ma reluk Yahudi rira mela falurut ra, ovu nfalak ma rair tamata Yahudi ra, boma rot-orang afa ovi rna'a Ni inukun ra. Ba wean i rfabana nala munuk roak afa ovi rna'a inukun avyai, na tamata rira vava'at ra rmerat urun na'a Ubu wahan ralan a. Na'uk wol rfabana nala inukun avyai, ba tamata rira vava'at ra wol rmerat urun na'a Ubu wahan ralan a. Wean inyai bi, Ubu nsinir mela falurut liak nma wean Melkisedek. Mela falurut yai wol nahu Lewi ubun-nusin ra, wean Harun. 12 Ba wean i rkati roak mela falurut tali Lewi ubun-nusin ra ovu mela falurut liak, na inyai ihin a ne, rkati vali roak Musa ni inukun ra. 13 Mela falurut i Ubu nfili Ia ini, wol nahu Lewi ubun-nusin ra, na'uk nahu arun dawan liak. Tamata ovi rahu arun dawan liak yai wol fasa obin rkarya ma rtaha tamata rira korban ra verin Ubu, ma ti rfadoku na'a wan i ba'i rasnuri rira korban verin Ubu. 14 Ita tka'a munuk roak ne, Duila'a Yesus ntali arun dawan Yehuda. Ba Musa ni inukun ra wol rfalak ne, bisma rfili mela falurut tali arun dawan yai ma rkarya verin Ubu.

15 Duila'a Yesus nma ma neluk mela falurut wean lahir lan a Melkisedek neluk mela falurut. Ba lyawan lahir ne, Ia wol nahu Lewi ubun-nusin ra. 16 Duila'a Yesus neluk mela falurut, wol ntali inukun i nfalak ne, mela falurut musti rtali Lewi ubun-nusin ra. Na'uk Ia neluk mela falurut tevek Ni ngrebat, ovu Ni vava'at i wol ni wahan. 17 Tevek rtulis roak na'a Surat Ralan ne,

“Oa meluk mela falurut, nata ti wol ni wahan,

wean lan a otu vali verin Melkisedek.”

18 Ubu nfadok-aling roak Musa ni inukun ra, tevek wol fyawarira, ovu wol rot-nala ma tamata rfaseri Ubu. 19 Musa ni inukun ra wol rot-nala ma tamata rira vava'at ra rmalola. Ba wol tfaklo'i roak dida vava'at ra na'a inukun avyai. Na'uk fiang ini tfaklo'i a'uk dida vava'at ra verin Yesus, boma notu ma tfaseri Ubu.

20 Nlia tali inyai, na ita tka'a ne, Yesus neluk mela falurut ma Ni karya lolin lia mela falurut ovi rtali Lewi ubun-nusin ra, tevek Ubu nafwaba roak ma Yesus neluk mela falurut. Na'uk Ubu wol notu wean inyai verin mela falurut ovi ula roak ira. 21 Na'ut i Ubu nfili Yesus ma neluk mela falurut, na Ia nafwaba lahir ne,

“Ya'a ufwaba roak ma veka

wol ukati afa ovi ufalak roak na'a Ning fawaba a ne,

‘Oa meluk mela falurut, nata ti wol ni wahan.’ ”

22 Tali Ubu Ni fawaba yai, na ita tka'a tnorung ngorva'an a tali afa i Yesus notu a. Tnorung yai lolin lia Musa ni inukun ra, ovu Ia veka nfakena lahir Ni tnorung yai.

23 Terang a valing averi, eka tanovak ewal na'a afa isa ini. Tamata Yahudi rira mela falurut ra musti rivun ira, boma na'ut i rmata, na liak ra bisma rkati ira ma rfabana rira karya a. 24 Na'uk Yesus nva'at nata ti wol ni wahan, ba Ia neluk mela falurut, nata ti wol ni wahan. Wean inyai bi wol mela falurut liak roak ma rkati Ia. 25 Ba Yesus Ni ngrebat ma nsikat nala tamata ra tali rira salasilan ra, tali amar ini, nata ti wol ni wahan. Notu wean inyai verin tamata ovi rorang Ia ma rfaseri Ubu. Ia nva'at, nata ti wol ni wahan, boma nera verin Ubu ma nlobang ira.

26 Yesus Ni vava'at a lolin urun, ba inovan ma neluk Mela Falurut Ila'a verin ita. Ia Ni vava'at a nmerat urun, wol notu afa sala, ovu wol Ni salasilan. Ia Ni vava'at a naling ia tali tamata salasilan ra, ovu vali Ubu nala Ia ma nrata roak lanit ratan ma na'a wan i karatat lia munuk. 27 Ia wol wean Yahudi rira Mela Falurut Ila'a ra ma lokat amar, na musti rfedan afwatan ra ma reluk rira korban verin Ubu ma na'i vatuk rira salasilan ra. Rotu wean inyai, beti rfedan afwatan ovi tamata ra rala vali verin Ubu, boma na'i vatuk tamata rira salasilan ra. Na'uk Yesus ka'i nala tenan a ma neluk korban verin Ubu. Ia notu wean inyai fasa watan. 28 Musa ni inukun ra rfalak ne, tamata ra reluk Mela Falurut Ila'a, na'uk wol rira ngrebat, tevek tamata watan ira. Na'uk Ubu nala roak Ni inukun ra verin Musa, beti nafwaba ma nsikat Yanan a ma neluk Mela Falurut Ila'a. Ubu Yanan a Ni ngrebat dawan urun ovu wol Ni salasilan akataka, nata ti wol ni wahan.