1 Terang a valing averi,
deka myair watan afa ovi tamata inorang ra munuk musti rka'a,
na'ut i beti rorang Kristus.
Lan ana,
tair roak ma tamata ra musti rahil ma deka rotu kikyai afa ovi wol ihir akataka,
ovu tair vali na'a afa ovi rotu ma tamata ra rorang Ubu.
Ba deka tair ewal afa avyai,
na'uk mya ma tair na'a afa ovi rotu ma dida inorang a ntafal ma nangrebat.
2 Ita deka tair ewal afa ovi rfamalik roak na'a i wean inba ma rbaptis tamata ra,
rfadoku limarira ra na'a tamata ulurira ratan ra ma raflahar ira,
amar i Ubu veka nfava'at ewal matmatan ra,
ovu Ubu veka nukun tamata ovi rafena ma rorang Ia,
nata ti wol ni wahan.
3 Na'uk wean i Ubu ntorung,
na mya ma tair afa ovi veka rotu ma dida inorang ntafal ma nangrebat.*
4 Tevek wean i tamata ra rafla talik rira inorang na'a Kristus,
na wol afa isa vali bisma nlobang ira ma rahil ma rtalik tali rira salasilan ra.
Lan ana,
ira rna'a roak Ubu Ni lyawan ralan a,
ovu naflahar roak ira,
ovu vali nala roak Ni Roh a ma nleal ralarira ra.
5 Ira rka'a roak na'a rira vava'at ra ne,
Ubu Ni vaivatul ra lolin urun.
Ira rsi'ik roak mujizat ovi Ubu notu ra,
ba rfan-aran ne,
Ubu veka nfaturu vali Ni ngrebat yai na'a amar ovi veka rma ini.
6 Velik ne rfan-aran afa avyai munuk,
na'uk wean i rafla talik rira inorang a,
na wol afa isa vali bisma nlobang ira ma rahil ma rtalik tali rira salasilan ra.
Afa sala ovi rotu ra notu ma wean i rbaku ewal Ubu Yanan a na'a aa walwalur,
ovu rfalak sian Ia na'a tamata rivun waharira ralan ra.
7 Bisma tfalak ne,
tamata ra wean lanun i nisak ma dawan wear da'ut i ba'i nsuta a,
boma va'i ihin a lolin urun verin tamata i ni va'i a.
Ba Ubu naflahar roak lanun yai.
8 Na'uk wean i lanun wol ihin tevek lavurun-lesmat rarubu na'a,
na lanun yai wol ihin akataka lahir.
Ba inovan ma Ubu veka near nfasoba lanun yai,
ovu nasnuri lavurun-lesmat avyai ma kusan lahir.*
Dida inorang a musti nangrebat
9 Teramam-valimami averi,
velik ne amfalak wean inyai,
na'uk amlobang urun mia!
Amorang* urun ne,
mia wol weabira lanun i Ubu near nfasoba yai.
Amka'a ne,
myotu afa lolin ovi rfaturu ne,
Ubu nsikat roak mia tali bira salasilan ra,
ma bira vava'at kakiwal.
10 Ubu Ni inukun ra kena munuk,
ovu wol nsiklabir na'a inukun ovi nfasuka ra.
Ia veka wol nablufang bira karya ovi myotu ovu ralabira urun verin Ia,
ovu fyaturu bira silobang a verin Ia na'ut i mlyobang tamata inorang ra,
ma naran amar ini.
11 Na'uk inamami ma lokat mia fyaturu lalawatan ralabira lolin,
ti naran i lanit ivavan a namwear,
boma bisma mkya'a lahir afa lolin ovi mnyaban tali Ubu ma veka nala verin mia.
12 Amera verin mia ma deka byosa na'a bira inorang,
na'uk myorang urun Ubu.
Bira vava'at ra musti wean tamata ovi rorang urun Ubu ovu rtahang nal ralarira,
boma rira vali afa ovi Ubu nfadoku roak na'a Ni tnorung a.
Mya ma torang urun afa ovi Ubu nfalak na'a Ni tnorung a, tevek Ia wol nkati Ni tnorung a
13 Na'ut i Ubu notu Ni tnorung a verin Abraham,
na Ia ka'i nala naran a al nafwaba lahir,
tevek Ni dawan nlia munuk akataka.*
14 Ia nfalak ne,
“Ya'a ka'i ufwaba ne,
veka uflahar oa ovu otu ma ubum-nusim ra rivun urun i lahir.”*
15 Abraham ntahang nal ralan ma al nanaban Ubu Ni tnorung a.
Ba ti nata,
Abraham nala afa i Ubu nfalak roak na'a Ni tnorung a verin ia.
16 Tevek wean i tamata isa nafwaba,
na ia ba'i nala tamata i ni van dawan lia ia naran a,
ma al nafwaba.
Notu wean inyai ma neluk faneak ne,
veka nfakena ni tnorung yai,
boma tamata ra deka rfasala kikyai ia.
17 Ubu notu vali wean inyai.
Ia nfangrebat tamata ovi veka rira tnorung yai ralarira ra,
boma rka'a ma lolin ne,
Ia wol nsiklabir na'a Ni tnorung a.
Ia notu wean inyai,
tevek nala roak naran a ma al nafwaba ne,
veka not-nala afa ovi nfalak roak.
18 Ubu Ni tnorung ovu Ni fawaba kena munuk.
Ubu wol bisma nkati afa avyai,
tevek Ia wol nsiklabir.
Ba wean inyai,
bi tafnerung roak na'a Ubu ma nfangrebat raladida ra,
ovu tfaklo'i a'uk dida vava'at ra na'a Ia,
ma al tnaban Ni tnorung i veka nala verin ita.
19 Tfaklo'i a'uk dida vava'at ra verin Ubu,
wean a'ur i nka'i teri roak,
tevek ita tka'a roak ne,
Ubu veka nfakena munuk afa ovi nfalak roak na'a Ni tnorung a.
Tfaklo'i a'uk dida vava'at ra wean inyai,
na ita wean i tna'a roak wan i Ubu nana'a.
Lan a,
na'a Ubu Ni Rahan Dawan Falurut ralan a,
maloli dawan amafal nteri ma tamata ra wol bisma rahu rti ralan,
na'a ruang i nmerat rahi lia munuk.
Na'uk fiang ini wol afa isa notu teri ita ma wol tati ma tna'a Ubu wahan ralan.*
20 Yesus nti lan roak wan i Ubu nana'a ma nasusan roak linga'an verin ita.
Ia notu wean inyai ma neluk dida Mela Falurut Ila'a,
nata ti wol ni wahan,
wean lan a notu vali verin Melkisedek.*