Yesus Ni karya felan a naling ia ovu Yahudi rira Mela Falurut Ila'a rira karya
1 Terang a valing averi,
Ubu nfili Yahudi rira Mela Falurut Ila'a ntali tamata ovi rna'a lanit ivavan a.
Mela Falurut Ila'a nala tamata rira falurut ra ma nera verin Ubu,
ovu ntaha tamata rira persembahan ra verin Ubu.
Ia nfedan afwatan ovi tamata rala vali ma reluk rira korban verin Ubu,
boma na'i vatuk rira salasilan ra.*
2 Tamata i neluk Mela Falurut Ila'a yai bisma nfaturu ni rala lolin,
ovu ntahang nal ralan verin tamata ovi rboda ovu tamata ovi rban-sala ra,
tevek ia tamata watan ia wean vali ira,
ba wol ka'i nangrebat na'a afa rivun.
3 Wean inyai bi,
ia musti nfedan afwatan ovi tamata ra rala ma reluk rira korban verin Ubu,
boma Ubu na'i vatuk rira salasilan ra.
Wol mane notu wean inyai verin tamata ra watan,
na'uk verin ia vali,
boma Ubu na'i vatuk ni salasilan ra.*
4 Wol tamata isa vali bisma ka'i nfili tenan a ma neluk Mela Falurut Ila'a.
Ubu a'uk sa'i nfili tamata ma nfabana Ni karya a.
Inyai wean lahir i notu lan roak verin Harun.
5 Kristus wean vali inyai.
Ia wol nsikat tenan a ma neluk Mela Falurut Ila'a,
boma tamata ra rsoak ma rfadawang Ia,
na'uk Ubu a'uk sa'i nfili Ia.
Ubu nfalak verin Ia ne,
“Ya'a Yanak Oa!
Amar ini lahir,
ufalak verin Oa ne,
Yamam Ya'a.”*
6 Ubu nfalak vali roak na'a Surat Ralan ne,
“Ufili roak Oa ma meluk Mela Falurut,
nata ti wol ni wahan,
wean lan a otu vali verin Melkisedek.”*
7 Na'ut i Yesus nva'at na'a lanit ivavan a obin,
na Ia naflurut ovu nvakar ma nfaktanit,
ma nera verin Ubu i bisma nfatalik Ia tali matmatan a.
Ubu nrenar Yesus Ni falurut ra,
tevek Yesus nalang Ia ovu not-orang lalawatan afa ovi Ubu ralan nfalak ra.*
8 Velik ne Ubu Yanan Ia,
na'uk Ia nfakabava tenan ma not-orang lalawatan afa ovi Ubu nfalak ra,
na'ut i ntuan susa dawan,
nata ti naran i nmata.
9 Ubu nfaturu roak ne,
Yesus sa'i wol Ni salasilan.
Ia neluk linga'an ma nsikat tamata ra tali rira salasilan ra,
ma rira vava'at kakiwal.
Ia notu wean inyai verin tamata ovi rot-orang afa ovi nfalak ra,
nata ti wol ni wahan.
10 Ubu nfili roak Ia ma neluk Mela Falurut Ila'a,
wean lan a notu vali verin Melkisedek.
Deka mifla talik bira inorang a na'a Yesus Kristus
11 Inamami obin ma amfamalik afa rivun verin mia na'a Yesus ovu Melkisedek,
na'uk susa ma amfamalik afa avyai,
tevek byosa na'a bira inorang ma wol mryenar,
ovu mnanat beti fyan-aran.*
12 Velik aba,
bira amar naran roak ma myair tamata liak ra,
na'uk wol mkya'a ma dawan obin na'a afa ovi Ubu nfalak ra.
Amfalak wean ini,
tevek tamata liak rair mia obin na'a afa ovi Ubu nfalak ra,
ma lokat tamata inorang musti rka'a,
na'ut i beti rorang Yesus.
Ba afa ovi rair verin mia yai wean susu i kasiko'u yanat ra renu,
tevek ira wol bisma ra'an afamtahan ovi rangrebat obin.*
13 Iki watan ni inorang wol nangrebat obin,
na ia wean kasiko'u yanat obin ma nenu susu lalawatan.
Na'a ni vava'at a ni inorang wol nmela,
ovu wol nka'a ma dawan obin ne,
inba kena te inba sala.*
14 Na'uk tamata ovi raftibang roak,
ira bisma ra'an roak afamtahan ovi rangrebat ra.
Wean vali inyai verin tamata ovi rira inorang nangrebat roak.
Ira ba'i rot-orang afa ovi Ubu nfalak ra,
ba rka'a roak ne,
inba kena ovu inba sala.