Amar i Ubu nfadoku ma tyari ita
1 Terang a valing averi,
Ubu Ni tnorung nana'a obin.
Ni tnorung nfalak ne,
iki watan norang Ia,
na veka nyari ia ovu Ubu.
Ba msyi'ik wabira ma lolin,
beta ne tamata boku tali mia wol bisma ti ryari ira,
wean lahir i Ubu nfalak roak na'a Ni tnorung yai.*
2 Tamata ra rfamalik roak Ubu Ni Ivar Lolin a verin ita,
wean i lalan a rfamalik roak verin ubud-nusid ra.
Na'uk wol uturira akataka,
tevek rarenar Ivar yai,
na'uk rafena ma rorang.
3 Ita tamata ovi torang Ubu sa'i veka tyari ita ovu Ia,
wean nfalak na'a Ni tnorung a.
Ubu nfamalik na'a afa yai verin tamata ovi wol rorang Ia ne,
“Ungrova ovu ufwaba roak ne,
ira veka wol rti ryari ira ovu Ya'a.”
Na'ut i Ubu notu munuk roak lanit ivavan a,
na Ni karya roak rok,
ba nyari Ia.*
4 Ita tka'a roak ne,
Ubu nasusan munuk roak amar verin ita ma tyari ita,
tevek rtulis roak na'a Surat Ralan ne,
“Ubu notu munuk roak afakataka,
ba ti naran amar ifitu,
beti nyari Ia.”*
5 Ubu nfalak vali roak na'a Surat Ralan ne,
“Tamata ovi wol rorang Ya'a,
wol bisma ryari ira ovu Ya'a.”*
6 Ba lyawan roak ne,
tamata boku veka ryari ira ovu Ubu.
Tamata ovi rarenar lan roak Ubu Ni Ivar Lolin a,
na'uk wol rot-orang,
na ira wol ryari ira wean inyai.
7 Ba Ubu nfadoku amar ngorva'an ma tamata ra bisma ryari ira ovu Ia.
Amar yai ihin a ne,
fiang ini.
Tali na'ut i Musa nana'a,
nata varat ratratut relak roak,
beti Ubu nfalak afa ini nahu Raja Daud,
wean lahir i ufalak roak na'a ratan ne,
“Amar ini,
wean i mryenar Ubu vain a,
na deka fyangrebat ralabira ra.”*
8 Lan ana,
Yosua novun roak tamata Yahudi ra ma rti wan i ryari ira ovu Ubu,
na'uk wol ryari ira wean Ubu ralan nfalak a.
Wean i tamata Yahudi ra bisma ryari ira ovu Ubu na'a wan yai,
na Ia wol notu tnorung roak ma nala amar liak ma veka tyari ita ovu Ia.*
9 Ba Ubu nfadoku roak amar isa verin Ni tamata ovi rorang Ia,
ma irmunuk veka ryari ira ovu Ia.
Inyai wean i Ubu nkarya amar inean,
na'uk na'a amar ifitu a,
na nyari Ia tali Ni karya a.
10 Iki watan wean i nyari ia ovu Ubu,
na ia veka nyari roak ia tali ni karya ra,
wean lahir i Ubu nyari roak Ia na'ut i notu munuk lanit ivavan a.*
11 Mya ma did tinemun tkiwal ovu ralad urun ma tyari ita ovu Ubu.
Totu wean inyai,
boma deka tamata isa vali tali ita nleka na'a ni inorang a,
wean tamata Yahudi ovi lalan a rafena ma rorang Ubu,
ba wol ryari ira ovu Ia.
12 Ba tkiwal ma torang urun Ubu Ni Vaivatul ra,
tevek Ni Vaivatul ra rvua ngrebat ovu rala vava'at.
Ni Vaivatul ra ramneran urun,
nlia nahin blawat i namneran mela-balit a,
tevek rlahi dida fikiran ra ovu raladida ila'a ra.
Ni vaivatul ra rfaturu munuk afa fanfonak ovi rna'a raladida ra,
wean relat ovu lurid ovi rna'a tenadida ra.
Ia nfadoku vali ne,
afa fanfonak avyai munuk lolin te sian,
ovu Ia nka'a munuk afa ovi rna'a raladida ra.
13 Ia nrea ovu nka'a munuk afa ovi trea ovu afa ovi wol trea ra,
tevek afakataka munuk ratvelar na'a wahan ralan a.
Ita veka tvalat Ia na'a afa ovi totu ra.
Yesus neluk dida Mela Falurut Ila'a i nlia Yahudi rira mela falurut ra munuk
14 Ita dida Mela Falurut Ila'a Ni dawan nlia munuk afakataka,
ovu nrata roak lanit ratan ma nana'a Ubu wahan ralan a.
Inyai Yesus,
Ubu Yanan a.
Ni lolin a,
musti tatorung ovu ralad urun ne,
torang Ia.
15 Dida Mela Falurut Ila'a nfan-aran ovu nfarnuang dida laklekan ra.
Ia nka'a ma nlobang ita,
tevek nitdawan nlabir teman Ia na'a afakataka munuk wean ita vali,
na'uk Ia wol notu salasilan.
16 Ba deka tbobar ma tatuan Ubu na'a dida falurut ra,
tevek nfaturu Ni rala lolin verin ita.
Ia ntaha fareta a ovu nlobang lalawatan ita.
Tfaseri Ubu ma taflurut,
boma na'ut amar i tatuan angangal te susa ra,
na nlobang ita ovu nfaturu Ni rala lolin verin ita.