Yesus Ni dawan nlia Musa
1 Ba terang a valing ovi myorang Ubu,
bira vava'at ra rmalola,
ovu Ubu nfili roak mia ma veka ti mnya'a lanit ratan.
Fara minovak ma lolin na'a Yesus.
Ita torang ne,
Ia neluk Ubu Ni rasul,
ovu neluk Mela Falurut Ila'a verin ita.
2 Ia not-orang lalawatan Ubu i nfili Ia,
Ni afa ovi nfalak ra.
Musa notu vali wean inyai ma not-orang lalawatan afa ovi Ubu nfalak ra,
ma nsi'ik ma lolin Ubu Ni rahan a.
Ihin a ne,
ia nsi'ik ma lolin Ubu Ni tamata ra.
3 Na'uk inovan ma tfadawang ovu talang Yesus nlia tali Musa.
Inyai wean lahir i tamata ra rfadawang tamata i notu rahan,
nlia tali rahan i notu yai.
4 Rahan ra munuk tamata ra rfadiri ira,
na'uk Ubu a'uk sa'i notu munuk afaka watan.
5 Musa neluk tamata sansinir ma not-orang lalawatan afa ovi Ubu nfalak ra na'a ni karya verin Ubu Ni tamata ra.
Ia ni karya ma nfalyawang na'a afa ovi Ubu veka nfavotuk na'a amar ovi veka rma ini.
6 Na'uk Kristus,
Ubu Yanan Ia.
Ia not-orang lalawatan afa ovi Ubu nfalak ra,
ovu nfareta munuk afakataka na'a Ubu Ni Rahan a.
Ita tamata ovi torang Yesus weadida lahir Ubu Ni Rahan a,
wean i raladida ra wol kako'u ovu dida inorang a nangrebat,
ma tfaklo'i a'uk dida vava'at ra verin Ia.
Ubu nfangnanang tamata ovi wol rot-orang afa ovi nfalak ra
7 Ba terang a valing averi,
fara myorang afa ovi Ubu Ni Roh nfalak a wean ini,
“Amar ini*,
wean i mryenar Ubu vain a,
8 na deka fyangrebat ralabira ra wean ububir-nusibira ra.
Lalan ana,
ira rangal Ubu,
ovu rlabir teman Ia na'a wan lean vu dawan.*
9 Ubu nfalak ne,
‘Ira rlabir teman Ya'a,
velik ne rsi'ik munuk roak afa ovi otu ra na'a varat vutfa'at ralan a.
10 Afa avyai rotu ma ungrova,
ba ufalak ne,
ira rangal lalawatan Ya'a na'a ralarira ra,
ovu rafena ma rot-orang Ning vaivatul ra.
11 Ungrova,
ba ufwaba lahir ne,
ira veka wol rti ma ryari ira ovu Ya'a na'a wan i utorung roak ma ala verin ira.’ ”*
12 Ba terang a valing averi,
msyi'ik wabira ma lolin,
boma deka tamata isa vali tali bir tinemun ralan sian ovu inan ma notu watan salasilan ra,
ma ti naran i nafla talik Ubu i nva'at a ma wol norang roak Ia.
13 Na'uk msyifangrebat ralabira ra lokat amar,
boma ralabira ra deka wean vatu,
tevek salasilan ni siweang a.
Ba msyifangrebat ralabira ra na'a amar ovi tamata ra rfalak obin ne,
“amar ini.”
14 Tevek dida vava'at isa roak ovu Kristus,
ovu veka dida munuk afa lolin ovi Ubu nala roak verin Ia.
Na'uk musti tot-orang lalawatan afa ovi Ubu nfalak ra,
tali amar i beti torang Ia ma ti naran i wol dida amar roak.
15 Mingnanang afa ovi rtulis roak na'a Surat Ralan wean ini,
“Amar ini,
wean i mryenar Ubu vain a,
na deka fyangrebat ralabira ra wean ububir-nusibira ra.
Na'ut lalan a,
na ira rangal Ubu,
ma rafena ma rot-orang afa ovi Ia nfalak ra.”*
16 Tamata aba rarenar Ubu Ni vaivatul ra,
na'uk rangal Ia obin?
Tamata avyai,
tamata ovi Musa novun roak ira ma rban-talik Mesir.
17 Ubu nangrova tamata aba,
ti naran varat vutfa'at?
Ia nangrova tamata ovi Musa novun roak ira ma rban-talik Mesir.
Tamata avyai rmata na'a wan lean vu dawan,
tevek rotu salasilan.*
18 Na'ut inyai,
na Ubu near nfasoba ira wean ini,
“Mia veka wol ti mnya'a wan i utorung roak verin tamata ovi rorang Ya'a ma ryari ira ovu Ya'a!”
Ia nfalak verin aba?
Ia nfalak wean inyai verin tamata ovi rafena ma rorang Ia.
19 Ba misusan ralabira ra ma lolin,
tevek tka'a roak ne,
tamata avyai veka wol ryari ira ovu Ubu na'a wan i ntorung roak,
tevek wol rorang Ia.