Deka tafla talik dida inorang a
1 Ba terang a valing averi,
wean inyai bi musti tsi'ik wadida ma lolin ma torang urun Ubu Ni Ivar Lolin i trenar roak a,
boma deka tafla talik dida inorang a.
2 Ubu Ni vaivatul ovi Ni sansinir ra tali lanit ratan rfamalik verin ubud-nusid ra tali lalan,
kena lalawatan.
Ba tamata ovi wol rot-orang vaivatul avyai rtuan roak inukun i inovan ovu afa sala ovi rotu ra.*
3 Ubu nsikat roak ita tali dida salasilan ra,
ma dida vava'at kakiwal.
Afa i Ubu notu yai lolin urun,
ba tamata ovi wol rkamlabir afa yai,
na Ia veka nukun ira ma ntafal ma aleman.
Duila'a Yesus ka'i nfamalik lan Ubu Ni Ivar Lolin a.
Nata tamata ovi rarenar lan roak Ivar yai tali Yesus,
ti rfamalik vali verin ita ma tka'a ne,
Ivar yai kena lahir.
4 Ubu nfaturu ne,
tamata ovi rfamalik Ivar yai rira afa ovi rfalak ra kena.
Ia notu wean inyai nahu Ni faneak ovu mujizat ra,
ma nfaturu Ni ngrebat a ma tamata ra rtalkaka.
Ubu Ni Roh a nala Ni ngrebat a verin tamata ovi rorang Yesus,
wean lahir ralan nfalak a.
Yesus neluk linga'an ma tamata ra lolin ewal ovu Ubu
5 Lanit ivavan ngorva'an i tfamalik a veka nma.
Na'ut inyai,
na Ubu veka wol nala ngrebat verin Ni sansinir ra na'a lanit ratan ma rfareta.
6 Ita tka'a afa yai,
tevek rfalak roak na'a Surat Ralan ne,
“Ubu,
notu afakinimi mungnanang tamata ra?
Tamata ovi rna'a lanit ivavan ini tamata watan ira,
na afakinimi msi'ik tamata yanan a?*
7 Oa motu ma Mu sansinir ovi rna'a lanit ratan rira dawan nlia kedan ia watan,
na'uk wol mnanat.
*
Ba Oa fwakaratat ia ovu malang ma dawan ia.
8 Oa mala ngrebat verin ia ma nfareta munuk afakataka,
ma wean lahir i rsoak nulu ia.”
*
Beti tbas ne,
ia nfareta munuk afakataka.
Ihin a ne,
wol afa isa vali ma tamata ra wol rfareta.
Fiang ini wol trea obin ne, tamata ra rfareta afakataka munuk.
9 Na'uk ita tka'a roak ne,
Yesus Ni ngrebat ma nfareta afakataka munuk!
Na'ut i Ia nleal lanit ivavan ini,
na Ubu notu ma Ni sansinir ovi rna'a lanit ratan rira dawan nlia kedan Ia watan,
na'uk wol mnanat.
Fiang ini Ubu nfakaratat Ia ovu nalang ma dawan Ia,
tevek ntuan susa dawan ma nmata.
Ubu Ni rala lolin a,
bi Yesus nmata ma al nakvanak tamata ra munuk tali rira salasilan ra.
10 Ubu notu afakataka munuk,
ovu Ia notu ma tamata ra munuk rfadawang Ia.
Ia nfadoku roak ma Yesus ntuan susa rivun ma neluk Raja i wol Ni salasilan,
ma nsikat tamata ra tali rira salasilan ra.
Ba afa i nfadoku roak yai kena urun!
Ba tali Yesus Ni susa avyai,
na Ubu nasusan roak linga'an ma nala tamata rivun ma reluk yanan ra,
ma Ni dawan nvotuk na'a ira vali.
11 Yesus na'i vatuk roak dida salasilan ra,
ba Ia notu ma dida vava'at ra rmerat urun.
Yesus ovu ita tamata ovi notu roak ma dida vava'at ra rmerat urun a,
Yamadida isa watan.
Wean inyai bi,
Yesus wol nma'it ma nfalak ne,
Ni tiniman ita.
12 Yesus nfalak roak verin Ubu ne,
“Ya'a veka ufamalik naram a verin Ning tiniman ra,
ovu veka udedang verin Oa ma ufadawang Oa na'a rira sidovung a.”*
13 Yesus nfalak vali ne,
“Ya'a veka ufaklo'i a'uk Ning vava'at a verin Oa ta Ubu.”
Ia nfalak vali ne,
“Ini Ya'a ovu yanak ovi Ubu mala roak verin Ya'a.”*
14 Ubu yanan ra tamata vali ira,
ba amar isa veka rmata.
Wean inyai bi,
Yesus neluk tamata ma nva'at wean ita,
boma tali Ni matmatan a,
na not-visal nitdawan i ni ngrebat ma nfareta matmatan a.
15 Lan a,
tamata ra munuk rva'at wean watan wol rira akataka,
tevek rbobar lalawatan matmatan.
Na'uk Yesus nfatalik ita tali matmatan ni ngrebat a,
boma wol tbobar roak matmatan a.*
16 Ba terang a valing averi,
lyawan urun ne,
Yesus wol nlobang Ubu Ni sansinir ovi rna'a lanit ratan ra.
Na'uk Ia nlobang ita,
tamata ovi Abraham ubun-nusin ra.
17 Wean inyai bi,
Yesus musti neluk tamata ma wean lahir ita,
tamata ovi tna'a lanit ivavan ini,
ma ntuan susa vali wean susa ovi ba'i tatuan ra,
boma Ia neluk dida Mela Falurut Ila'a.
* Na'a Ni karya ma neluk Mela Falurut Ila'a,
na nfaturu Ni rala lolin verin tamata ra ovu notu lalawatan afa ovi Ubu nfalak ra.
Tali Ni karya yai bi na'i vatuk tamata rira salasilan ra munuk.*
18 Tevek Yesus ntuan susa dawan na'ut i nitdawan a nlabir teman Ia,
ba Ia bisma nlobang vali ita,
na'ut i nitdawan a nweang ita.