Surat verin tamata Ibrani ra
Yesus Ni dawan a nlia nabi ra
1 Terang a valing averi,
lalan ana Ubu nangrihi ma rivun roak verin ubud-nusid ra nahu Ni nabi ra.
Ia nala linga'an rivun ma nangrihi verin ira.*
2 Na'uk na'a amar ovi lanit ivavan a mane namwear roak ini,
na Ubu nangrihi roak verin ita nahu Yanan a.
Ubu nfalak ma Yanan a notu lanit a ovu afa ovi rna'a lanit ivavan munuk.
Ia nfadoku roak ma Yanan a veka Ni munuk afakataka.
3 Ia nfaturu lahir Ubu vanan i nfitik a nyadat,
ovu vali Ubu felan mnga'un a.
Ia Ni ngrebat ma nwanar afakataka munuk na'a lanit ovu lanit ivavan ovu Ni vaivatul ra.
Ia na'i vatuk tamata rira salasilan ra munuk roak,
beti ndoku Ubu i Ni dawan nlia munuk afakataka Ni lihir mela* a,
na'a lanit ratan ma nfareta vali.
4 Ubu Yanan ini Ni fareta a nlia munuk Ubu Ni sansinir ovi rna'a lanit ratan rira fareta.
Inyai wean watan Ubu nala naran i lolin urun verin Ia ma al nalang Ia,
ma nlia tali Ni sansinir ovi rna'a lanit ratan,
nararira ra.
Ubu Yanan a Ni ngrebat a nlia Ni sansinir ovi rna'a lanit ratan ra
5 Ubu wol mane nangrihi verin Ni sansinir ovi rna'a lanit ratan,
wean i nangrihi verin Yanan,
ma nfalak ne,
“Ya'a Yanak Oa!
Amar ini lahir,
na ufalak verin Oa ne,
Yamam Ya'a.”
*
Ubu nfalak vali ne,
“Ia Yaman Ya'a,
ovu Ya'a Yanak Ia.”*
6 Na'ut amar i Ubu novun Yanan i ula lalean a nma lanit ivavan a,
na Ia nfalak ne,
“Sansinir ovi rna'a lanit ratan munuk musti rsoak ma raraning Ia.”*
7 Ubu nfamalik Ni sansinir ovi rna'a lanit ratan a ne,
“Ya'a otu ma Ning sansinir na'a lanit ratan ra wearira lahir nait a,
ovu vali Ning sansinir ra wearira yafu ongan a.”*
8 Na'uk Ubu nfalak na'a Yanan a wean ini,
“Oa ini Ubu i fwareta lalawatan,
nata ti wol ni wahan,
ovu Oa fwareta ovu Ni malolan a.
9 Wean i tamata ra rotu afa ovi kena ra,
na Oa ralam a lolin urun,
na'uk wean i rotu afa ovi sian ra,
na Oa wol inam lahir.
Ba Ubu,
Duila'a i morang Ia yai,
nalang Oa nlia tali Mu kida liak ra:
Ia nli'i ngul na'a Oa ma neluk faneak ne,
nalang Oa ma notu ma ralam lolin urun.”*
10 Ubu nfalak vali verin Yanan ne,
“Oa ini Duila'a Oa!
Tali lalan a,
na Oa motu lanit ivavan ini,
ovu motu vali lanit a.
11 Afa avyai munuk veka rmamu,
na'uk Oa veka mna'a,
nata ti wol ni wahan,
ovu vali afa avyai munuk veka wearira kadaravit ovi viar roak a.
12 Oa veka motu ma lanit ivavan namwear munuk,
wean i rdulan ravit blawat vian i wol reluk roak ia.
Motu roak wean inyai,
beti motu lanit ivavan ngorva'an.
Na'uk Oa veka weam watan lan a,
ovu Mu vava'at a wol ni wahan.”*
13 Ubu wol nangrihi verin Ni sansinir ovi rna'a lanit ratan,
wean Ia nangrihi verin Yanan ne,
“Mdoku Ning lihir mela a,
ti naran i otu ma tamata ovi rira sian Oa rsoak nulu Oa.”*
14 Ba ita tanovak aka na'a Ubu Ni sansinir ovi rna'a lanit ratan a?
Sansinir avyai,
roh ovi Ubu nsinir roak ira ma rlobang tamata ovi Ia nsikat roak ira tali rira salasilan ra,
ma rira vava'at kakiwal.