Snurak verin dawan kareda ovi reluk penatua ovu tamata ovi rorang Yesus rira sidovung ra
1 Ya'a era urun verin mia dawan kareda ovi myeluk penatua* ma mryenar ya'a.
Ya'a vali dawan kareda i eluk penatua,
wean mia,
ovu ya'a una'a ma usi'ik roak Kristus na'ut i ntuan susa a.
Ya'a veka una'a vali Yesus Kristus vanan i nfitik a nyadat,
na'ut i Ubu nsinir ewal Ia ma nma lanit ivavan a.
2 Era verin mia ma msyi'ik ma lolin sidovung tamata inorang ovi Ubu nala verin mia,
wean domba duan a nsi'ik ma lolin ni domba ra.
Deka mane rkiwal mia beti fyabana bira karya ini,
na'uk fyabana ovu ralabira lolin,
wean lahir i Ubu ralan nfalak a.
Deka mane fyabana bira karya ini tevek mian kadi,
na'uk fyabana bira karya ini tevek inabira ma mlyobang sidovung tamata inorang ra.
3 Deka mane fyakaratat tenabira ra ma weabira raja ra ma fyareta ira.
Na'uk musti fyaturu bira vava'at i lolin a ma inovan verin ira,
boma rot-orang.
4 Wean i myotu wean inyai,
ti naran i Domba Duan nma ewal a,
na Ia veka nala kalulu i wean raja ba'i raklulu a verin mia.
Kalulu yai vanan a nfitik a nyadat ma wol ni wahan.
* Yesus Domba Duan Ia ovu Ni dawan a nrahi lia munuk.
5 Wean vali inyai verin tuvmarmuri ra.
Mryenar ma myot-orang snurak tali tamata ovi rira tuvu nrahi mia.
Terang a valing tamata inorang ra munuk:
fyakabava tenabira ra ma isa nalang isa,
tevek rtulis roak na'a Surat Ralan wean ini,
“Ubu nangal lahir tamata ovi rfakaratat tenarira ra,
na'uk nala Ni kalolin a verin tamata ovi rfakabava tenarira ra.”*
6 Ba fyakabava tenabira ra na'a Ubu wahan ralan a.
Ia Ni ngrebat dawan urun.
Myotu wean inyai,
ma naran amar i nfadoku roak a,
na Ia veka nsikat mia ma nalang mia.
7 Deka ralabira kako'u na'a afaka watan,
na'uk na'a afaka watan,
na miflurut verin Ubu na'a afa ovi rotu ma ralabira kako'u a,
tevek Ia nlobang urun mia.
8 Msyi'ik wabira ma lolin,
tevek nitdawan ni sian mia.
Ia wean singa i vain dawan ma nbana tia ma watan ala ndava fana'an.
9 Myangal ia,
ovu bira inorang i nangrebat,
tevek mkya'a ne,
terabir-valibira tamata inorang ovi rna'a lanit ivavan a munuk lahir,
rtuan vali susa wean mia.
10 Susa i mtyuan yai veka wol ka'i mnanat.
Ti ma susa yai roak rok,
na Ubu veka nala Ni rala lolin i dawan urun ma nfakena munuk afa ovi wol rna'a bira vava'at ra.
Ia vali veka nfabatar ovu nfangrebat ewal bira inorang a,
ovu vali notu ma mtyahang nal ralabira,
ba mdyiri watan na'a bira inorang.
Ia nera roak mia ma myovu na'a vanan i nfitik a nyadat ma wol ni wahan a.
Notu munuk afa avyai,
tevek dida vava'at isa roak ovu Kristus.
11 Ia nfareta munuk afakataka na'a lanit ivavan ini,
nata ti wol ni wahan!
Kena urun.
Petrus nala snurak situli
12 Terang a valing averi,
ning surat etal i ukirim verin mia ini,
era ma ning kida Silas nlobang ya'a ma ntulis.
Ia tamata i norang Yesus vali ovu not-orang lalawatan afa ovi Ubu nfalak ra.
Na'a surat ini,
usurak mia ma bira dardirin na'a bira inorang a musti nangrebat.
Ufalak vali verin mia ne,
Ubu Ni rala lolin i ufalyawang verin mia ini,
kena munuk lahir.
Mtyahang teri bira dardirin na'a bira inorang a.*
13 Tamata inorang na'a Babilon rala salam verin mia.
Ubu nfili vali ira wean mia ma reluk tamata inorang.
Ning kida i nlobang ya'a na'a ning karya a naran Markus.
Ia wean yanak a.
Ia nala vali salam verin mia.
14 Lokat mia myala vali salam ma msyivoan mia ovu msyilobang mia.
Era ma Ubu nala Ni malinan a verin mia munuk tamata ovi bira vava'at isa roak ovu Kristus.
Kena urun.
Ning surat a lawan watan ini.Salam tali ya'a,
Petrus