Duila'a veka nfaleka inukun verin tamata ra munuk, ba mtyahang ralabira ra na'a bira susa ra, ovu bya'at watan ovu vava'at i kena
1 Kristus ntuan susa dawan roak na'a tenan a na'ut i nana'a lanit ivavan obin.
Ba misusan wabira ma mtyuan vali susa wean Ia,
tevek tamata iki watan wean i ntuan susa,
na nahil roak ma wol notu salasilan.*
2 Ba myorang afa ovi Ubu ralan nfalak ra na'ut i bya'at obin na'a lanit ivavan a.
Deka mane myorang watan bira ininan sian ra.
3 Lan a,
myorang watan tamata ovi wol rka'a Ubu,
na'a rira afa ovi rotu ra.
Na'a bira vava'at lan ra,
na miktufan urun ovu myotu watan afa ovi wol inovan ra,
myorang watan bira ininan sian ra,
ovu boranavut mia.
Mia myotu vali bira snoba ra ma minavut sian ovu myotu afa ktufan ra,
ovu vali msyoak verin walut ra,
ma Ubu wol inan lahir afa avyai.
4 Fiang ini tamata ovi wol rka'a Ubu,
rabrian,
tevek mia wol myorang rira vava'at ra ma myotu lalawatan salasilan.
Wean inyai bi,
rfalak sian mia ne,
tamata ktufan mia.
5 Na'uk ira musti rlotar tenarira ra na'a Ubu wahan ralan na'a afa sian ovi rotu ra,
ovu fiang ini Ubu nasusan roak ma nfaleka inukun verin tamata ovi rva'at obin ovu tamata ovi rmata roak a.
6 Wean inyai,
bi Ubu ralan nfalak vali ma tamata matmatan ra rarenar Ni Ivar Lolin a.
Velik ne Ubu nfaleka inukun verin tenarira ra ma rmata,
wean lahir Ia nfaleka inukun verin tamata ra munuk.
Na'uk Ubu ralan nfalak wean inyai,
boma rira roh ra bisma rva'at vali na'a lanit ratan.*
Ita musti tala yabi ovi Ubu nala verin ita, ma tlobang tamata liak
7 Terang a valing averi,
lanit ivavan sarseri mane namwear roak,
ba misusan wabira ovu bira fikiran ra,
ovu vali mtyahang nal ralabira na'a afaka watan,
boma bisma miflurut lalawatan.
8 Na'uk afa i nlia tali afa akataka munuk wean ini:
mia musti ralabira urun al msyilobang mia.
Tevek wean i tsilobang ita,
na wol tfikir roak salasilan rivun ovi tamata ra rotu verin ita.
9 Inabira vali ma tamata liak rma ma rna'a teri bira rahan.
Myala ira ovu ralabira lolin,
ovu vali deka mifngamu'ur.
10 Ubu nala roak yabi ra verin lokat tamata ma rira yabi ra rsialing ira.
Wean inyai,
na myala bira yabi avyai ma ala mlyobang tamata inorang ra munuk.
Mkyarya ovu ralabira urun ovu yabi ovi Ubu nala roak verin mia,
tali Ni rala lolin a.
11 Wean i tamata isa ni yabi ma nfamalik Ubu Ni vaivatul ra verin tamata liak,
na afa ovi nfalak ra musti norang watan Ubu Ni vaivatul ra.
Wean i tamata iki watan ni yabi ma nlobang tamata liak,
na musti nlobang ovu ngrebat i Ubu nala verin ia.
Myotu wean inyai,
na tamata ra munuk veka rfadawang Ubu nahu Yesus Kristus.
Ubu Ni ngrebat dawan ila'a ovu inovan ma tfadawang Ia,
nata ti wol ni wahan!
Kena urun.
Iki ntuan susa tevek ni inorang a, na veka utun ma dawan
12 Terang a valing averi,
ulobang urun mia.
Fiang ini mtyuan susa ovi sian urun i lahir,
na'uk deka mibrian.
Deka minovak ne,
tamata inorang mia,
ba veka wol mtyuan susa wean inyai.
13 Na'uk ralabira lolin urun tevek mtyuan susa wean inyai,
tevek susa i mtyuan yai,
wean vali susa i Kristus ntuan a.
Myotu wean inyai,
boma na'ut i Kristus nma ewal ovu vanan i nfitik a nyadat a,
na mia veka inabira lolin ovu ralabira lolin urun.
14 Wean i tamata ra rfalak sian mia tevek myorang Kristus,
na utubira urun,
tevek Ubu Ni Roh a,
Ni ngrebat a dawan urun i lahir nana'a ralabira ra.
15 Deka mane tamata isa vali tali mia ntuan susa,
tevek nsifedan,
te nbori,
te notu afa liak ovi sian ra.
Deka vali ma ia ntuan susa,
tevek notu ma tamata liak rtuan sian.
16 Na'uk wean i mtyuan susa tevek myorang Kristus,
na deka mya'it.
Na'uk fyadawang Ubu,
tevek Kristus Ni roak mia.
17 Naran roak ni amar a ma Ubu mane nfaleka inukun verin lanit ivavan a.
Ia veka nfaleka inukun lan verin Ni tamata ovi rorang Ia.
Wean i Ubu nfaleka inukun lan verin ita,
na veka wean inba verin tamata ovi wol rorang Ni Ivar Lolin a?
Ia veka nfaleka inukun lahir verin ira ovu inukun i aleman urun.
18 Rtulis roak na'a Surat Ralan wean ini,
“Tamata ovi rot-orang afa ovi Ubu ralan nfalak a musti rtuan susa veki,
beti Ia nsikat ira tali rira salasilan ra,
ma rira vava'at kakiwal.
Na'uk tamata salasilan ra ovu tamata ovi wol rorang Ubu veka rtuan inukun i aleman urun.”*
19 Ba wean i mtyuan susa tevek Ubu ralan nfalak wean inyai,
na myotu lalawatan lolin a ovu myala munuk lahir bira vava'at ra verin Ubu i notu munuk afakataka na'a lanit ovu lanit ivavan a.
Ia notu lalawatan afa ovi nfalak ra.