Snurak verin vata ovu brana ovi rsifa roak
1-2 Ba wean vali inyai verin tamata ovi msyifa roak.
Vata ovi msyifa roak a fyakabava tenabira ra ma myot-orang watan afa ovi awabira rfalak ra.
Myotu wean inyai,
boma wean i boku tali mia,
awabira ra wol rorang Ubu Ni vaivatul ra,
na ira bisma rorang lahir vaivatul avyai,
velik ne wol fyalak afakataka verin ira.
Ira rorang wean inyai,
tevek rsi'ik roak bira sialang ovu bira vava'at lolin ovi fyaturu lokat amar a.*
3-4 Deka fyaloling da'in tenabira ra ma myotu ma bira vut ra lolin da'in,
te fyaturu bira masa ra,
te myeluk kadaravit ovi fyawar ra.
Na'uk ni lolin a,
myotu afa ovi lolin ra verin tamata ra,
ovu vali bira vava'at ra malinan watan ovu tamata ra.
Afa avyai rfaturu felabira lolin ovi rna'a ralabira ra.
Ubu nalang urun vata ovi felarira wean inyai,
ovu afa avyai veka wol rmamu.
5 Lan ana,
vata ovi rira vava'at ra rmerat a rfaloling vali tenarira wean inyai.
Ira rfaklo'i a'uk rira vava'at ra verin Ubu,
ovu rot-orang afa ovi awarira rfalak ra.
6 Sara notu vali wean inyai,
tevek ia not-orang afa ovi Abraham nfalak ra.
Na'ut i nangrihi ovu Abraham,
na nera Abraham ne,
bapa.
Mia vali weabira Sara ubun-nusin ra,
wean i myotu afa ovi kena ra,
ovu wol byobar akataka lahir.
7 Wean vali inyai verin brana ovi msyifa roak a.
Mia musti myotu lolin vali awabira ra,
tevek mkya'a ne ira wol rira ngrebat wean mia.
Myalang ira,
tevek Ubu veka nala vava'at kakiwal verin mia ovu ira tali Ni rala lolin a.
Myotu wean inyai,
boma wol angangal na'a bira falurut ra.
Ita tamata ovi torang Yesus musti tsiotu lolin ita ma raladida isa na'a dida fikiran ra
8 Afa ovi beti ufalak munuk yai,
ihin a wean ini.
Era ma mia munuk mian vai isa ovu myotu ralabira isa watan na'a bira fikiran ra,
ovu musti fyaloling tamata ovi ralarira lalau ra.
Era vali ma ka'i msyilobang mia,
tevek tamata inorang munuk mia.
Fyaturu bira rala lolin ovu msyiotu lolin mia,
ovu vali fyakabava tenabira ra ma fyikir tamata liak ra.
9 Wean i tamata ra rotu sian mia,
na deka myotu sian vali ira,
ovu wean i tamata ra rala vaivatul ovi ngra ra ma rfalak sian mia,
na deka fyalak sian vali ira ovu vaivatul avyai.
Na'uk myera verin Ubu ma naflahar tamata avyai,
tevek Ubu nera mia ma fyaturu bira rala lolin verin tamata liak ra.
Myotu wean inyai,
boma Ia veka naflahar vali mia.
10 Na'a Surat Ralan rtulis wean ini,
“Tamata iki inan ma ralan lolin ovu inan ma ntuan afa ovi lolin na'a ni vava'at a,
na musti nka'a nfarak sumarn a ma deka nangrihi afa ovi sian ra,
ovu deka nlabir tamata ra.
11 Ia musti nfaroa tenan a tali afa ovi sian ra ma notu a'uk afa ovi lolin ra,
ovu ndava lalawatan ma ni vava'at malinan watan ovu tamata liak.
12 Tevek Duila'a nsi'ik tamata ovi rira vava'at ra rmalola,
ovu Ia nrenar rira falurut ra,
na'uk nangal tamata ovi rotu afa ovi sian ra.”*
Tatahang raladida ma totu watan afa ovi lolin ra na'ut i tatuan susa
13 Wean i iva'ubira ma myotu a'uk lolin a,
na tamata ra veka wol rotu sian mia.
14 Na'uk velik ne mtyuan susa tevek myotu afa ovi Ubu ralan a nfalak a,
na utubira.
Deka byobar tamata avyai,
ovu deka ralabira kako'u.
15 Na'a bira vava'at ra,
msyangatur ovu myalang urun Kristus,
tevek Duila'a Ia.
Mia musti misusan wabira,
boma bisma fyalyawang verin tamata ra,
wean i rorat mia ne,
afakinimi fyaklo'i a'uk bira vava'at ra verin Ubu.
Na'uk fyakabava tenabira ra ovu myalang ira na'ut i fyalyawang afa yai verin ira.
16 Ralabira ila'a ra musti lolin lalawatan na'a afa ovi myotu ra.
Myotu wean inyai,
boma velik ne tamata boku rfalak sian mia tevek myorang Kristus,
ovu myotu a'uk afa ovi lolin ra,
na veka ka'i rfama'it watan tenarira ra.
17 Wean i Ubu nfadoku roak ma tatuan susa tevek totu afa ovi lolin ra,
na inyai lolin lia tali i tatuan susa tevek totu afa ovi sian ra.
18 Ufalak afa yai,
tevek Kristus nmata fasa watan ma nvara munuk tamata rira salasilan ra.
Velik ne Ni vava'at nmalola,
na'uk nmata verin tamata salasilan ra.
Notu wean inyai,
boma Ubu lolin ewal ovu ita.
Tamata ra rfedan Yesus tenan a,
na'uk Ubu Ni Roh a nfava'at ewal Ia.
19 Ubu Ni Roh nfangrebat Yesus,
ba Ia nti ma nfamalik Ubu Ni vaivatul ra verin tamata matmatan rira roh ovi rna'a wan sian i wean bu'i ralan,
ma rnaban watan ma Ubu nukun ira.*
20 Roh avyai rtali tamata ovi rmata roak.
Ira wol rot-orang afa ovi Ubu nfalak ra na'ut i Nuh nva'at a.
Na'ut i Nuh notu ni kabal a,
na Ubu ntahang watan ralan ovu nanaban ira,
boma tamata sian avyai rahil ma rtalik tali rira salasilan ra,
na'uk wol rahil.
Na'uk tamata iwalu watan rarata kabal yai ralan a,
ma Ubu nala ira ma rda rdir-ear tali wear dawan yai.
21 Wear dawan na'ut i Nuh nva'at yai labir mane wean wear i fiang ini rala ma al rbaptis mia.
Wear dawan yai nlobang Nuh ira,
tevek rna'a kabal dawan ralan a ma rva'at.
Tali wear i tamata ra rala ma al rbaptis mia,
na nala vava'at vali verin mia.
Wear yai wol mane rala ma al rfamerat ngra ovi rna'a tenabira ra,
na'uk rbaptis mia ma nfaturu ne,
myera verin Ubu ma nfamerat ralabira ra ovu bira fikiran ra.
Ia nsikat mia tali bira salasilan ra,
tevek Yesus Kristus nva'at ewal tali matmatan.
22 Ia nrata roak lanit ratan,
ma fiang ini ndoku Ubu Ni lihir mela ma nfareta.
Fiang ini Ia nfareta Ubu Ni sansinir ra munuk na'a lanit ratan,
roh ra munuk rira ngrebat ra,
ovu vali ngrebat ra munuk.