Yesus Ni tamata ra rira vava'at ra musti rmerat urun
1 Mia mryenar roak afa ovi Ubu notu ra verin mia,
ba era ma byatuk munuk lahir afa sian ovi ba'i myotu ra.
Deka msyiklabir,
ovu deka fyalak afa boku,
na'uk myotu afa liak.
Deka mlyobang tamata liak rira metan ra,
ovu deka fyalak sian tamata ma fyangra tamata naran a.
2 Mia musti mdyava lalawatan Ubu Ni vaivatul ra ma fyadoku na'a ralabira ra,
wean kasiko'u i beti rarali ia ma ndava lalawatan susu vahan.
Myotu wean inyai,
boma bira inorang a ntafal ma nangrebat,
ti naran amar i Yesus Kristus veka nma lanit ivavan a ma nsikat mia tali bira salasilan ra,
ma bira vava'at kakiwal.
3 Iva'ubira ma mdyava lalawatan Ubu Ni vaivatul ra ma fyadoku na'a ralabira ra,
tevek mkya'a roak ne,
Kristus Ni lolin dawan urun verin mia.
Yesus Kristus wean vatu i rfadoku lan na'a fanderen a
4 Fyaseri lalawatan Duila'a Yesus.
Ia wean vatu i nva'at kakiwal a.
Tamata ra rfikir ne vatu yai wol fyawan,
na'uk Ubu nfili roak Ia ovu nalang urun Ia.
5 Fyaseri roak Ia ma myala bira vava'at ngorva'an a,
ba mia weabira vali vatu ovi rva'at ra.
Ubu nala mia ma al nfadiri Ni rahan a,
ovu Ubu Ni Roh nleal roak ralabira ra.
Ia notu ma mia myeluk Ni tamata ovi nfili ra,
ma bira karya wean mela falurut ra ma myala korban verin Ia,
wean lahir i ralan nfalak a.
Ubu ntorung bira korban yai,
tevek afa ovi Yesus Kristus notu roak verin mia.
6 Ubu nfalak na'a Ni Surat Ralan a ne,
Yesus Kristus wean vatu i fyawan lia munuk ma al nfangrebat rahan a.
Vaivatul avyai ngoarira ra wean ini,
“Msyi'ik,
Ya'a ufili roak vatu isa i fyawan urun a ma neluk vatu i ufadoku lan lalean na'a kota Sion.
Tamata iki watan norang Ia,
na Ia veka not-nala afa ovi ntorung ma nala verin ia,
ma ralan a wol lalau.”*
7 Tamata ovi myorang Yesus Kristus,
na mia veka utubira urun.
Na'uk verin tamata ovi wol rorang Ia,
Surat Ralan nfalak ne,
“Vatu i tukan ra rvatuk yai,
fyawan lia munuk vatu ovi rala ma al rfangrebat rahan a.”*
8 Iki wol norang Yesus,
na ia veka ntuan afa ovi Surat Ralan nfalak ne,
“Vatu yai neluk angangal verin tamata ma rasvotun ma rleka lahir.”
Tamata avyai rasvotun na'a vatu yai,
tevek wol rot-orang Ubu Ni vaivatul ra.
Ia nfadoku roak ma musti wean inyai.
9 Na'uk Ubu nfili roak mia tamata ovi myorang Ia,
ovu mia weabira vali mela falurut ovi rkarya verin Ubu i neluk Raja ma nfareta mia.
Ubu notu ma weabira vali Ni sidovung dawan i nfamerat roak tali salasilan ra ma myerat urun.
Ubu Ni roak mia,
ovu nala roak mia tali dedan ralan ma mnya'a lyawan i lolin urun a,
boma fyamalik ovu fyadawang afa dawan ovi notu ra.
10 “Lan ana,
wol myeluk Ubu Ni tamata ra obin,
na'uk fiang ini myeluk roak Ni tamata ra.
Lan ana,
Ubu wol nfaturu Ni silobang a verin mia obin,
na'uk fiang ini Ubu nfaturu roak Ni silobang yai.”*
Tfakabava tenadida ra ma tot-orang afa ovi Ubu nfalak ra
11 Terang a valing averi,
ulobang urun mia,
ba ufalak verin mia ne,
mingnanang ne myeluk tamata dakan,
ovu bya'at teri watan na'a lanit ivavan ini.
Wean inyai,
ba era urun verin mia ma deka myot-orang bira ininan sian ovi rtali tenabira ra ma rangal lahir bira roh a.
12 Bira vava'at ra musti lolin na'a tamata ovi wol rka'a Ubu,
waharira ralan ra.
Myotu wean inyai,
boma wean i rfalak sian mia,
na veka rsi'ik bira afa lolin ovi myotu ra,
ma veka rfadawang Ubu na'ut amar i nma ewal lanit ivavan a.
13 Terang a valing averi,
na'a lanit ivavan ini,
na fara myot-orang dawan fareta ra munuk rira afa ovi rfalak ra,
boma tali bira afa ovi myotu yai,
na bisma myalang urun Ubu.
Mia musti msyoak verin raja i ntaha fareta dawan urun a,
14 ovu vali verin gubernur ovi raja nfaturu ira ma rukun tamata ovi raktufan ra,
ovu nalang tamata ovi rotu lolin a.
15 Ubu ralan nfalak ma myotu a'uk lolin a,
boma tamata boda ovi rfalak sian mia wol bisma rangrihi afakataka,
na'ut i rsi'ik afa lolin ovi myotu ra.
16 Fyaturu bira vava'at a wean lahir tamata ovi Ubu nfatalik roak ira tali rira salasilan ra.
Deka fyikir ne,
Ubu nfatalik roak mia tali bira salasilan ra,
ba neluk lola roak verin mia ma myotu ewal salasilan.
Na'uk bira vava'at a musti wean lahir Ubu Ni tamata sansinir ovi rfakabava tenarira ra ma rot-orang Ni vaivatul ra lalawatan.
17 Myalang tamata ra munuk,
mlyobang terabir-valibira ra,
ovu byobar Ubu.
Myalang vali raja a.
Ita musti tatuan susa wean susa i Kristus ntuan roak
18 Terang a valing ovi myeluk tamata sansinir ra mia musti myot-orang afa ovi bira dawan ra rfalak,
ovu myalang urun ira.
Wol mane msyoak watan verin dawan ovi rotu lolin mia ovu rfamafung rira vaivatul ra,
na'uk verin dawan ovi rotu sian vali mia.
19 Mia mkya'a afa ovi Ubu ralan nfalak ra,
bi mtyahang ralabira,
velik ne mtyuan susa i wol inovan ma mtyuan tali afa ovi myotu ra.
Wean inyai bi myotu ma Ubu ralan a lolin.
20 Wol utubira akataka,
wean i mtyuan susa ma bira dawan ra rfar-visal mia tevek myotu salasilan,
ovu mtyahang nal ralabira.
Na'uk wean i mtyuan susa,
velik ne wol myotu sala,
ovu mtyahang nal ralabira ra,
na afa yai notu ma Ubu ralan a lolin.
21 Ubu nera mia ma mtyuan susa wean inyai,
tevek Kristus ntuan susa ma al nlobang mia,
ovu vali nfaturu verin mia ma musti mtyuan susa wean vali Ia.
22 “Ia wol notu salasilan ovu wol nsiklabir.”
23 Na'ut i tamata ra rala vaivatul ovi ngra ra ma rfalak sian Ia,
na wol nangal ira ovu vaivatul avyai vali.
Na'ut i tamata ra rotu susa Ia,
na wol nfabobar ira ovu wol nera ma Ubu notu sian ira.
Ia nala munuk tenan a verin Ubu i wol nsiklabir na'a inukun ovi nfasuka ra.
24 Yesus Kristus ka'i nvara dida salasilan ra na'a aa walwalur,
boma salasilan wol nfareta roak ita,
ma dida vava'at ra rmalola.
Ni mngala ra ovu laran a rotu roak ma lolin ita.*
25 Tevek lan a,
bira vava'at a wean lahir domba i nban-sala a.
Na'uk fiang ini myorang roak Kristus,
ba Ia nban-ulu verin mia ma nwanar ovu nsi'ik mia,
wean lahir tamata i nwanar ovu nsi'ik ni domba ra.*