Petrus ni surat i ntulis lan
1-2 Terang a valing ovi Ubu nfili roak mia ma myeluk Ni tamata ovi myorang Ia.
Mia tamata dakan mia ma mlyeal soru munuk propinsi Pontus,
Galatia,
Kapadokia,
Asia Ko'u ovu Bitinia.
Ya'a ini Petrus.
Ubu nsinir ya'a ma ufamalik Ni vaivatul ra,
ovu utulis surat ini verin mia.
Era ma fara Ubu nala Ni rala lolin a ovu Ni malinan a ma nfangora lahir bira vava'at ra.
Yamadida Ubila'a nfili roak mia,
wean lahir i ralan a nfalak a,
ovu Ni Roh a notu ma bira vava'at ra rmalola,
boma msyoak verin Kristus ma myot-orang afa ovi nfalak ra,
tevek nfamerat roak mia ovu laran a.
Dida inorang a musti nangrebat ma al tnaban afa lolin ovi Ubu veka nala verin ita, ovu vali tfaturu dida silobang a
3 Terang a valing averi,
mya ma tfadawang Ubu i dida Duila'a Yesus Kristus Yaman verin Ia.
Ia nfaturu Ni silobang a verin ita,
bi nala roak vava'at ngorva'an verin ita.
Ia nfava'at ewal roak Yesus Kristus tali matmatan,
bi dida vava'at ngorva'an kakiwal yai.
Notu wean inyai,
boma tfaklo'i a'uk dida vava'at ra na'a Ia,
tevek tka'a urun ne,
Ia veka not-nala afa lolin ovi nfadoku roak a.
4 Ita tka'a roak ne,
veka dida vali kalolin ovi Ubu nfadoku roak ma veka nala verin Ni tamata ovi rorang Ia.
Ubu nfadoku kalolin avyai na'a lanit ratan,
ba wol bisma rmamu,
ovu wol bisma rbetan,
ovu vali wol bisma rburut.
5 Myorang roak Ubu,
ba Ia nsi'ik mia.
Ia nwanar mia ovu Ni ngrebat tevek myorang Ia,
ti naran amar i Yesus Kristus nma ewal lanit ivavan ini,
boma mia veka bira vali vava'at kakiwal a.
6 Wean inyai bi,
myotu inabira lolin a'uk,
velik ne fiang ini ralabira lalau,
tevek ba'i mtyuan susa ovi felarira rivun,
ovu tamata ra rotu sian mia.
Na'uk susa avyai wol mnanat,
na veka rlia.
7 Susa ovi mtyuan ra,
rotu ma fyaturu lahir ne,
myorang urun Ubu te wahal.
Tamata ra musti rasnuri masa ra na'a yafu,
boma rka'a ne,
inyai masa mnga'un te wahal,
velik ne masa avyai ilyan te ravrua veka wol rleal roak.
Mia bira inorang a fyawan lia masa ra,
ovu susa ovi mtyuan ra rfaturu ne,
myorang urun Ubu.
Wean inyai,
na Ubu veka nfadawang ovu nalang mia,
ovu vali nfakaratat mia na'a amar i Yesus Kristus veka nma ewal a.
8 Mlyobang* Ubu,
velik ne wol mryea Ia obin.
Ti naran amar ini vali,
na mia wol mryea Ia obin,
na'uk myorang Ia.
Inabira lolin urun i lahir ma wol tfamalik nala ia,
9 tevek Ubu nsikat mia tali bira salasilan ra,
ma bira vava'at kakiwal.
Ia notu wean inyai verin mia,
tevek bira inorang verin Yesus Kristus.
10 Vava'at kakiwal i Ubu nala verin mia yai,
lalan ana,
nabi ra rfalak roak.
Ira rfatlina ma lolin ovu ranovak urun Ubu Ni vaivatul avyai,
ma ti rfamalik roak.
11 Kristus Ni Roh* nfalyawang lan roak verin ira na'a sian i Kristus veka ntuan a,
ovu vali sian yai nlia roak,
beti Ubu nfakaratat ila'a Ia.
Ira rkiwal ma rka'a ne,
wean inba ovu lafira ba afa ovi Kristus Ni Roh nfamalik na'a ralarira ra veka rvotuk.
12 Ubu nfalyawang roak verin nabi avyai ne,
afa ovi rotu ra wol mane rotu verin ira,
na'uk verin mia.
Afa avyai,
afa ovi fiang ini mryenar tali tamata ovi rfamalik Ubu Ni Ivar Lolin a.
Ira rfamalik afa avyai verin mia ovu ngrebat tali Ubu Ni Roh i ntali lanit ratan.
Ubu Ni sansinir ra tali lanit ratan inar vali ma rka'a urun Ivar Lolin yai.
Ubu nera ita ma fara dida vava'at ra rmerat urun
13 Ba wean inyai,
bi misusan bira fikiran ra ovu msyi'ik wabira ma lolin,
boma myot-orang munuk afa ovi Ubu ralan nfalak a.
Fyaklo'i a'uk bira vava'at ra verin Ubu,
tevek myorang urun ne,
Ia veka naflahar mia na'ut i Yesus Kristus veka nma ewal.
14 Ubu yanan ita,
ba musti tot-orang afa ovi Yamadida nfalak ra.
Na'ut i wol mkya'a Ubu Ni Ivar Lolin obin,
na myot-orang watan bira ininan sian ra.
Na'uk fiang ini deka mtyorung ma bira ininan sian avyai rfareta mia na'a bira vava'at ra.
15 Na'uk mia deka myotu salasilan afaka watan na'a bira vava'at ra,
wean Ubu i nmerat urun ovu wol Ni salasilan lahir.
Ia ka'i nera mia ma myeluk Ni tamata ovi wol rira salasilan ra.
16 Ba ita deka totu salasilan,
tevek rtulis roak na'a Surat Ralan ne,
“Deka myotu salasilan,
tevek Ya'a wol Ning salasilan.”*
17 Tva'at teri watan na'a lanit ivavan ini.
Ti ma miflurut verin Ubu,
na myera Ia ne Bapa,
bi myalang urun Ia na'ut i bya'at obin na'a lanit ivavan a.
Ia wol nfili tamata na'ut i veka nfaleka inukun verin tamata ra munuk ma inovan ovu afa ovi rotu ra.
18 Mia mkya'a ne,
Ia ntevut roak mia tali bira salasilan ra.
Ba mia mtyalik roak tali bira vava'at vu ovi ububir-nusibira ra rala roak verin mia.
Ia wol nala masa te perak ovi bis rakvisal ma al ntevut bira vava'at yai.
19 Na'uk Ubu ntevut mia ovu Kristus laran a.
Laran yai fyawan urun.
Kristus wean lahir domba i wol namngala ovu nmerat urun,
ma nmata al neluk korban verin Ubu.
20 Na'ut i Ubu wol notu lanit ivavan obin,
na nfili roak Kristus.
Fiang ini lanit ivavan sarseri mane namwear,
ba Ia nsinir Kristus nma ma nmata,
ma nsikat mia tali bira salasilan ra.
21 Ubu nfava'at ewal Kristus tali matmatan ovu nalang urun Ia.
Fyaklo'i a'uk bira vava'at ra verin Ubu,
ovu myorang urun Ia,
tevek afa ovi Yesus notu verin mia.
22 Fiang ini Ubu nfamerat roak mia tali bira salasilan ra,
tevek myot-orang afa kena ovi mryenar roak na'a Yesus Kristus.
Wean inyai bi,
mlyobang urun terabir-valibira tamata inorang ra.
Ba musti ralabira urun ma msyilobang mia ovu bira silobang i ntali ralabira ila'a.
23 Mia musti msyilobang mia,
tevek Ubu notu ma bira vava'at ra ngorva'an ewal.
Bira vava'at ngorva'an yai wol ntali tamata ovi rna'a lanit ivavan ini ma veka rmata,
na'uk ntali Ia i wol nmat-nala.
Myala vava'at ngorva'an yai,
tevek myorang Ubu Ni vaivatul ovi rala vava'at,
ovu rna'a lalawatan.
24 Na'a Surat Ralan a rtulis wean ini:
“Tamata ra munuk na'a lanit ivavan a wearira ngrova ovi wol rva'at kakiwal.
Rira afa lolin ovi rotu ra wean ngrova rira fafun ra.
Ngrova rira fafun ra munuk veka rmata,
wean lahir tamata ra munuk veka rmata,
ovu rira afa lolin ovi rotu ra veka wol rna'a roak,
wean lahir ngrova ovi rakla ma rira fafun ra rabrofut.
25 Na'uk Duila'a Ni vaivatul ra rna'a lalawatan,
nata ti wol ni wahan.”
*
Vaivatul avyai Ubu Ni Ivar Lolin a. Tamata ra rfamalik roak vaivatul avyai verin mia.