Domba Yanan ovu tamata ovi rorang Ia
1 Ya'a usi'ik vali ma urea ne,
Domba Yanan ndiri Vuar Sion ratan a ovu tamata rivun ratut isa rivun vutfa'at rahin ifa'at* ovi rorang Ia.
Tamata avyai rira faneak na'a roak rearira ra.
Faneak yai,
Domba Yanan naran a,
ovu Yaman i Ubila'a naran a.
2 Urenar vai isa ntali lanit ratan nsuta,
wean saksakan dodun te wean dodung dawan.
Vai i urenar yai wean vali tamata ovi rma'in kecapi.*
3 Tamata rivun ratut isa rivun vutfa'at rahin ifa'at rdiri wan i Ubu ndoku ma nfareta ngoran a,
ovu afa ifa'at ovi rva'at ma raling ma lolan watan ira yai waharira ralan ra,
ovu vali fareta dawan ovi rna'a inyai waharira ralan ra.
Ira rdedang dadedang ngorva'an isa.
Wol tamata isa vali bisma nasahak nala ma nka'a dadedang yai,
teran a'uk tamata rivun ratut isa rivun vutfa'at rahin ifa'at yai.
Tamata avyai Ubu ntevut roak ira,
tali tamata ovi rna'a lanit ivavan a munuk.
4 Tamata avyai wearira brana ovi wol rtuba ovu vata obin,
tevek rira vava'at ra rmerat urun.
Ira rorang watan Domba Yanan yai ma rti inba watan.
Ubu ntevut roak ira ma nala lan ira tali tamata liak ra munuk na'a lanit ivavan a.
Ba wean i tamata ra rala lan rira karya enan tali rira va'i ihin ra verin Ubu,
na brana avyai wearira vali inyai ma ula lalean ira,
ma reluk karya enan verin Ubu ovu Domba Yanan yai.*
5 Tamata avyai wol rsiklabir ovu wol rira sala akataka.
Ubu Ni sansinir itelu tali lanit ratan rsuta ma rfaivar ne, Ubu mane nfaleka inukun verin tamata ra
6 Usi'ik vali ne,
Ubu Ni sansinir isa ntali lanit ratan noru vali ma karatat urun ia.
Ia ntaha Ivar tali Ubu mane nti nfaivar verin tamata ra rtali arun dawan ra munuk,
ovu bangsa ra munuk,
ovu negara ra munuk,
ovu vali verin tamata rira vai ra munuk na'a lanit ivavan a.
Ivar yai wol bisma tkati ia ovu nana'a lalawatan.
7 Ubu Ni sansinir yai vain dawan urun ia al nfalyawang ivar yai.
Ia nfalak ne,
“Mia musti byobar Ubu ma fyalak ne,
‘O Ubu,
Oa sa'i dawan Oa.
Amraning naram a,
tevek Mu amar a kena roak ma veka fwaleka inukun verin tamata ovi rna'a lanit ivavan a munuk.
Amraning ovu amfadawang Oa,
tevek motu lanit a ovu lanit ivavan ini,
ovu afa ovi rna'a ralan a munuk wean lanun,
tahat ovu wear matan ra munuk.’ ”
8 Ubu Ni sansinir i nban-orang i ula ia yai nma ma nfalak ne,
“Kota dawan Babel nama'ar roak!
Ubu nukun tamata ovi rleal kota yai,
tevek rotu ma bangsa ra munuk wol rorang Ubu.
Ira wearira lahir vata i nfanavuk brana ra ovu anggur,
boma nfaleka ira ma rot-orang rira ininan sian a,
ma rsifa ovu tamata ovi wol awarira verin ira.”*
9 Ubu Ni sansinir i nomor itelu norang vali ira ma nfalak ovu vain dawan ne,
“Wean i iki nsangatur ma nfadawang afwatan yai ovu ni walut a,
ovu rala roak faneak na'a rean a te liman a,*
10 na ia veka nenu Ubu Ni anggur i nli'i roak na'a kobi i nfaturu Ni ngrova a.
Ia wol nsileti anggur yai ovu wear,
ba nangrebat urun!
Ia veka notu ma rtuan susa dawan ila'a na'a yafu,
ovu vali vatu belerang rkena ira.
Ubu nukun ira na'a Ni sansinir ovi rna'a lanit ratan waharira ralan ra,
ovu Domba Yanan yai wahan ralan a.*
11 Yafuman i notu susa ma dawan ira yai,
ongan a wol ni wahan.
Ba tamata ovi rsoak verin afwatan yai,
ovu ni walut a,
ovu vali rotu afwatan felan a na'a rearira ra ma neluk faneak ne,
veka rtuan susa dawan ovan-amar,
nata ti wol ni wahan.”
12 Ba tamata ovi rorang Yesus musti rtahang nal ralarira na'a rira susa ra.
Ira musti rot-orang afa ovi Ubu nfalak ra,
ovu rorang Yesus ovu ralarira urun.
13 Nata urenar vali vai isa ntali lanit ratan nfalak ne,
“Mtulis vaivatul ini:
Amar ini ovu amar ovi veka rma,
na Ubu veka naflahar tamata ovi veka rmata,
tevek ralarira urun ma rorang Duila'a.”
Ubu Ni Roh nfalak ne,
“Kena!
Ia naflahar ira ma veka ralarira lolin watan,
ovu ryari ira tali rira karya aleman ra ovu afa ovi susa ra.
Ubu veka naval rira rala lolin ra,
tevek rorang urun Ia.”
Faneak na'a amar i lanit ivavan a veka nmamu ma Ubu nukun tamata ra
14 Usi'ik vali mutan ngangiar isa,
ovu afa isa felan a wean i ntali Ubu ma neluk tamata ndoku mutan yai ratan a.
Ia naklulu kalulu masa i wean raja ra ba'i raklulu,
ovu ntaha nahin ko'u mneran i ba'i rala al rafdiar a.*
15 Nata Ubu Ni sansinir liak isa vali ntali Ni Rahan Dawan Falurut nma murin.
Ia vain dawan urun ma nfalak verin Ia i ndoku mutan ratan yai ne,
“Mala mu nahin ko'u yai ma mufdiar kikyai.
Fiang ini na'ut fadiar roak,
tevek afa ovi rna'a lanit ivavan ramtaha munuk roak.”*
16 Ba Tamata i ndoku mutan ratan yai nala Ni nahin ko'u i ba'i rala al rafdiar yai,
ma ndiar lahir lanit ivavan a.
17 Ubu Ni sansinir liak isa vali ntali Ni Rahan Dawan Falurut i na'a lanit ratan yai nma murin.
Ia ntaha vali nahin ko'u mneran isa,
nahin yai ba'i rala al rafdiar.
18 Ba Ubu Ni sansinir liak isa vali i nfareta yafu na'a wan i rasnuri aa voan lolin verin Ubu,
ntali inyai nma.
Ia vain dawan urun ma nfalak verin sansinir i ntaha nahin ko'u mneran yai ne,
“Mala mu nahin yai ma mlorat kikyai anggur vuan ovi rna'a lanit ivavan a,
tevek vuarira rwavar roak.”
19 Ba sansinir yai nfasuka Ni nahin yai nsuta lanit ivavan a,
ma nlorat lahir anggur vuan ovi rna'a lanit ivavan a.
Nata nasba vatuk anggur avyai nti wan i rotu ma al raramat anggur ra na'a.
Wan yai nfaturu ne,
Ubu nangrova urun tamata ovi rotu afa ovi sian ra.
20 Raramat anggur avyai na'a kota murin,
na lara nava ma wean oar na'a afa i rala ma al raramat yai,
ma ni blawat a,
kilometer ratut itelu,
ovu laman a nlabas meter irua.*