Deka tsiefa tamata
1 Terang a valing averi,
mia myorang roak Duila'a Yesus Kristus i ba'i tfadawang Ia.
Ba deka fyakaratat tenabira ra ma myalang a'uk tamata boku,
na'uk boku wahal.
2 Wean i tamata ka'i isa npake sitana masa na'a liman a,
ovu neluk kadaravit ovi lolin ma nma bira sidovung a,
nata wol mnanat,
na tamata kasian isa nma vali.
Tamata kasian yai neluk kadaravit vian ovi ba'i neluk nti va'i.
3 Ba wean i myalang a'uk tamata ka'i yai ma fyalak ne,
“Baba te titi,
mwa ma mdoku kadera lolin ini.”
Na'uk fyalak verin tamata kasian yai ne,
“Mdiri watan inyai te mdoku watan fun ini.”
4 Myotu wean inyai,
na msyiefa roak tamata na'a ralabira ra ma isa nlia isa.
Mia ka'i fyaleka inukun roak verin tamata ra,
ovu bira fikiran sian.
5 Terang a valing averi,
ya'a ungnanang dalang mia.
Eka mryenar:
Ubu nfili tamata kasian ovi rna'a lanit ivavan ini ma notu ma rira inorang nangrebat.
Ia nfili roak ira ma rna'a Ni Fareta a,
ovu veka nala vava'at kakiwal i ntorung roak verin tamata ovi rlobang Ia ovu ralarira urun.
6 Na'uk mia fyaliak tamata kasian ra wean afwatan ra ma fyama'it ira,
velik ne mkya'a roak ne,
tamata ka'i ra rotu tia ma watan mia.
Tamata ka'i ra rangrihi visal-vasil mia,
ovu rtaha mia ti ma mdyiri wan i rfaleka inukun verin tamata ra.
7 Ira rfalak sian Yesus i mryaning Ia,
naran a,
velik ne Ni munuk mia.
8 Wean i myot-orang afa ovi kena ra,
na musti myot-orang lahir inukun dawan i nlia munuk tali inukun ovi rfadoku roak na'a Surat Ralan a ne,
“Mlobang tamata liak ra wean watan i mlobang tenam a.”
Myotu wean inyai,
na myotu kena roak.
9 Na'uk wean i myalang tamata boku nlia tali tamata liak ra,
na myotu roak salasilan.
Ba Ubu Ni inukun a veka nkena lahir mia,
tevek myangal roak Ni inukun a.
10 Ba tamata iki watan not-orang Ubu Ni inukun ra munuk,
na'uk wol not-orang afa isa tali inukun avyai,
na inyai wean watan i wol not-orang roak Ubu Ni inukun ra munuk.
11 Ubu ka'i nfalak wean ini,
“Tamata ovi rsifa roak,
na deka rtuba ovu tamata ovi wol awarira verin ira,
ovu deka rsifedan.”
Ba wean i msyifa roak,
ovu wol mtyuba ovu tamata ovi wol awabira verin ira,
na'uk msyifedan,
na inyai wean watan i wol myot-orang roak Ni inukun ra.*
12 Fara bira afa ovi fyalak ra ovu afa ovi myotu ra,
wean tamata ovi rka'a ne,
Ubu veka nfaleka inukun verin ira.
Ubu Ni inukun ra rfatalik tamata ra tali rira salasilan ra.
13 Tevek na'ut i Ubu veka nfaleka inukun verin tamata ra,
na wol nfaturu Ni silobang verin tamata ovi wol rfaturu rira silobang verin tamata liak ra.
Na'uk wean i tamata isa nka'a ma nala ni silobang verin tamata liak,
na Ubu veka nala vali Ni silobang verin ia,
tevek Ni silobang yai nlia tali inukun i nfaleka roak verin ia.
Tot-orang dida inorang
14 Terang a valing averi,
wean i tamata isa nfalak ne,
ia norang roak Yesus Kristus,
na'uk wol notu afa ovi lolin ra,
na ni inorang yai wol ihin.
Inorang i wean inyai,
bis nsikat tamata ra tali rira salasilan ra,
boma rira vava'at kakiwal?
15 Wean i terabir-valibira isa norang Ubu,
ovu wol ni kadaravit ma noru ovu wol ni afamtahan ma na'an ovan-amar, na
16 mia fyalak verin ia ne,
“Fara Ubu naflahar oa,
ma mu afamtahan ma muan ovu mu kadaravit ma moru,”
na'uk wol myala kadaravit ma noru ovu afamtahan ma na'an.
Wean i myotu wean inyai,
na afa ovi fyalak yai ihin aka?
17 Wean i dida afa ovi totu ra wol rfaturu ne torang Ubu,
na dida inorang a nmata ovu wol ihin akataka.
18 Snain tamata isa nfalak vali wean ini verin tamata ra ne,
“Tamata boku rfalak ne,
rira inorang,
na'uk wol rfaturu rira inorang na'a afa ovi rotu ra.
Boku vali rfaturu rira inorang tali afa ovi rotu ra.”
Ya'a mane uvalat tamata ovi rangrihi wean inyai,
ma ufalak ne,
“Mia fyaturu verin ya'a na'a i wean inba ma tsi'ik tamata ovi rorang Yesus,
na'uk wol rfaturu ne,
rotu afaka verin Ubu.
Ya'a mane ufaturu ning inorang tali afa ovi otu ra.”
19 Mia myorang ne,
Ubu ikisa watan.
Inyai kena urun,
na'uk nait sian ra rorang vali wean inyai,
ba rbobar ma raruru lalean ira.
20 Mia ini byoda-byadi urun!
Afakinimi mifena ma fyan-aran ne,
bira inorang wol ihin akataka,
wean i wol myotu afa lolin ma nfaturu ne,
bira inorang verin Ubu?
21 Eka tsi'ik ubud-nusid i Abraham a.
Abraham ni afa ovi notu ra lolin,
ba Ubu notu ma ni vava'at nmalola roak.
Ia nfadoku yanan i Ishak na'a wan i ba'i rasnuri rira korban verin Ubu.
22 Lyawan roak verin ita ne,
ia norang urun Ubu,
ba inan ma notu lalawatan afa ovi Ubu nfalak ma notu.
Afa ovi notu ra kena ovu ni inorang a.
23 Abraham ni afa ovi notu ra kena lahir ovu vaivatul ovi rtulis roak na'a Surat Ralan a.
Ubu nfalyawang na'a Surat Ralan a ne,
“Abraham ni vava'at nmalola na'a Ubu wahan ralan a,
tevek norang Ia.”
Ni inorang a notu mi Ubu nala ia ma neluk Ni kida.*
24 Lyawan roak verin mia ne,
Ubu notu ma tamata ni vava'at nmalola,
tevek afa ovi tamata yai notu ra,
wol mane tali ni inorang a watan.
25 Wean vali inyai verin vatlean i naran Rahab.
Ubu notu ma ni vava'at nmalola,
tevek afa ovi notu ra kena na'ut i nfonak tamata Israel ifira i rma ma rsi'ik fanfonak tamata Kanaan ra.
Rahab nfonak ira na'a ni rahan a,
beti ndava linga'an liak ma nlobang ira ma rafla rti murin.*
26 Bir tinemun,
wean i tamata isa nan a nakbosal,
na ni roh a wol nleal roak,
ba nmata roak.
Wean vali inyai verin tamata ovi rorang Ubu,
na'uk rira afa ovi rotu ra wol rfaturu rira inorang a,
na inorang yai nmata ovu wol ihin akataka!