Yakobus ni surat a
Salam tali Yakobus
1 Terang a valing Yahudi ovi myorang Yesus Kristus.
Ya'a ini Yakobus,
ususan surat ini verin mia arun dawan vutu rahin irua ovi mimir-mimar na'a lanit ivavan ini.
Ya'a ala salam verin mia munuk.
Ya'a eluk tamata sansinir* verin Ubu ovu Duila'a Yesus Kristus.*
Snurak ma inadida lolin watan na'a dida susa ra, ovu tera ma Ubu nala Ni kaka'a dawan verin ita
2 Terang a valing averi,
wean i mtyuan angangal te susa na'a bira vava'at ra,
na inabira lolin watan.
3 Tevek mia mkya'a roak ne,
wean i tatuan angangal ovu susa dawan,
na'uk torang a'uk Ubu,
na ita veka tatahang nal raladida na'a afaka watan.
4 Wean i tatahang nal raladida ma torang Ubu,
na veka taftibang na'a dida inorang verin Ia,
ba veka nfangrebat ita,
boma torang mnga'un Ia,
ovu tvar-nala akataka munuk.
5 Wean i tamata isa tali mia wol nka'a ma nroal te nra na'a ni susa ra,
na fara nera lablobang verin Ubu,
tevek Ia veka nala kaka'a verin tamata yai,
boma nka'a ne,
nahu linga'an ba.
Ubu ralan a lolin ovu nala Ni silobang verin tamata iki watan,
wean i naflurut verin Ia.
Ubu wol nangrova tamata i nera lablobang verin Ia.
6 Na'uk tamata iki watan wean i nera verin Ubu,
na musti nera ovu ralan urun.
Tevek tamata ovi ralarira raruan al rera verin Ubu ma nlobang ira,
na tamata avyai wean saksakan ovi nait nean tia ma watan.
7 Tamata ovi wearira inyai deka rnarin ne,
Ubu veka nrenar rira falurut ra ma naval ira.
8 Tevek tamata ovi ralarira raruan,
na ira rira vava'at ra wol ulun a kikur.
Snurak verin tamata kasian ra ovu tamata ovi rka'i ra
9 Terang a valing ovi myorang Yesus,
na'uk wol bira metan,
na deka fyikir ne,
wol bira akataka.
Inabira lolin watan,
tevek Ubu nfili roak mia ma myorang Ia.
10 Tamata inorang ovi bira metan rivun,
inabira lolin watan,
tevek Ubu veka notu ma wol fyaklo'i bira vava'at ra na'a bira metan ra,
na'uk fyaklo'i a'uk bira vava'at verin Ia.
Ubu nfakabava mia tali bira kalolin ra.
Tamata ovi rira metan rivun,
na ira veka rabrofut wean ngrova ni fafun ra.
11 Lera ndata ma ngnea urun,
na veka nfakla ngrova ra ma rira fafun ra rabrofut munuk,
ba ni lolin a wol nleal roak.
Wean vali inyai verin tamata ovi rira metan rivun.
Na'ut i rfedi-rfaha afa obin,
na rira metan ra veka rmamu munuk,
ovu veka rmata vali.
Tatahang nal raladida na'ut i tatuan susa
12 Ubu naflahar tamata ovi rtahang nal ralarira na'a rira susa ra,
tevek wean i rtahang nal ralarira,
na Ia veka nala vava'at kakiwal i ntorung roak verin tamata iki watan i nlobang Ia ovu ralan urun.
Ubu naval vali ira ovu Ni lolin a.
13 Wean i tamata isa ntuan sian ma sian yai mane nfaleka ia,
na deka nfikir ne,
Ubu nlabir teman ia.
Ubu wol inan lahir afa ovi sian ra,
tevek sian wol nlabir nala Ia.
Ia notu a'uk lolin,
ovu wol nlabir teman tamata ra ma rotu afa ovi sian ra.
14 Na'uk wean i tamata isa inan ma notu afa ovi sian ra na'a ni vava'at,
na afa ovi sian avyai rtali watan ralan a,
tevek nfikir afa avyai.
Wean i tamata yai norang ni fikiran sian a,
na ia wean ian i nsonga fan ra,
na'uk wol nka'a ne,
veka rving nala ia.
15 Ba wean i torang dida fikiran sian yai,
na inyai neluk salasilan roak verin ita.
Wean i dida salasilan ra rabwa'ar na'a raladida ra,
na sian ntaha roak ita,
nata ti naran i tmata.
16 Terang a valing averi,
ulobang urun mia.
Mingnanang tevek tamata boku inar ma rlabir mia,
boma fyikir afa ovi wol kena ra.
17 Tevek afa lolin ovi tatuan na'a dida vava'at ini,
Ubu nfakena munuk verin ita,
ovu Ia nfasuka munuk afa avyai tali lanit ratan verin ita na'a dida vava'at ra.
Ia notu lera ovu vulan a.
Yamadida Ubila'a Ni lolin a verin ita wol wean lera ovu vulan a,
ma suta rata ira ovu molarira ra.
Na'uk Ubu wol nkati Ni lolin a.
18 Ubu ralan a nfalak ma nala Ni Ivar Lolin a verin ita,
boma nfava'at ita ovu vava'at ngorva'an a.
Ia notu wean inyai ma ita tlia munuk tali afa ovi notu roak.
Trenar ovu tot-orang Ubu Ni vaivatul ra
19 Terang a valing averi,
ulobang urun mia.
Ba mingnanang afa i ufalak ini.
Misnga'ut ma mryenar afa ovi tamata liak rfalak ra,
na'uk mnyaban ma mnanat veki beti mingrihi,
ovu deka fyarlan ma mingrova.
20 Tevek wean i tangrova,
na ita wol tot-orang roak afa ovi kena ra wean lahir i Ubu ralan nfalak a.
21 Ba tvatuk munuk afa ro'i-ra'i ovi rna'a dida vava'at ra,
ovu afa ovi wol kena na'a raladida ra.
Tfakabava tenadida ra,
ma tala Ubu Ni vaivatul ra na'a raladida ra,
boma ntafal ma nfangrebat dida inorang a,
ma Ubu veka nsikat ita tali dida salasilan ra,
ma dida vava'at kakiwal.
22 Tamata ovi rarenar Ubu Ni vaivatul ra,
na'uk wol rot-orang afa ovi nfalak ra,
na ira ranovak ne,
rotu afa ovi lolin ra,
na'uk wahal.
Ba mryenar Ni vaivatul ra ovu myot-orang!
23 Tamata iki watan nrenar Ivar Lolin a,
na'uk wol not-orang,
na ia wean tamata i nsi'ik felan a na'a tatal.
24 Ia beti nsi'ik felan a na'a tatal,
na'uk ti ma nban-tamuri,
na nablufang ewal roak felan a.
25 Na'uk Ubu Ni inukun ra kena munuk ovu rangrebat,
ba nsikat tamata ra tali rira salasilan ra.
Tamata iki watan nrenar Ubu Ni vaivatul ra ma wol nablufang,
ovu nasahak ma not-orang,
na Ubu veka naflahar ia na'a afa ovi notu ra.
26 Wean i tamata isa nfikir ne naflurut ma dawan,
ovu ia iva'un ma nraning Ubu,
na'uk wol nfarak sumarn a ma nangrihi afa ovi sian ra,
na ia ka'i nlabir roak tenan a.
Ba ni falurut ra ovu afa ovi notu ma al nraning Ubu,
wol ihir akataka.
27 Agama i kena na'a Ubu wahan ralan a wean ini:
ti ma talola varu ra ovu kasiko'u ovi rwatat renarir-yamarira ra ma tlobang ira na'a rira susa ra,
ovu vali deka tfikir te tot-orang,
wean tamata ovi inar afa sian ovi rna'a lanit ivavan a.