Eardida ra rotu salasilan
1 Terang a valing averi,
era verin mia ma deka rivun da'in mia myeluk tamata ovi rair Ubu Ni vaivatul ra verin tamata ra,
tevek tka'a ne,
Ia veka nfaleka inukun verin tamata avyai nlia tali tamata ovi wol rsiair.
2 Ita munuk totu sala rivun,
na'uk tamata ovi wol rotu sala ovu rira vaivatul ra,
ira rira vava'at ra rmalola,
ovu vali rka'a ma rsi'ik ma lolin tenarira ra na'a afaka watan.
3 Afa ko'u isa bisma nfaret-nala afa dawan.
Wean i ita tkeak kuda isa sumarn a ovu kakeak ko'u,
na ita bisma tfareta kuda yai ma norang ita,
velik ne kuda yai dawan ia.
Kakeak i ba'i rala ala rkeak kuda sumarn a. (Yakobus 3:3)
4 Kabal ra wean vali inyai.
Kabal rira wilin ra ko'u lalean ira.
Ba velik ne kabal a dawan ovu nait dawan ntutu kabal a,
na'uk tamata i ntaha wilin na'a kabal yai bisma nfuri wilin a,
ma kabal a nafla orang watan ralan a.
5 Eardida ra wean vali inyai.
Velik ne ko'u,
na'uk notu ma tamata ra rfakaratat tenarira ra ovu rangrihi tia ma watan.
Eka msyi'ik yafu a.
Velik ne ko'u watan,
na'uk nlevur nala nangan dawan a.
6 Eardida wean vali yafu,
ma nngora ovu afa ovi sian ra.
Eardida na'a tenadida ra,
ba nfangra lahir tenadida ra munuk.
Eardida wean yafu ma nlevur na'a dida vava'at ra munuk ovu yafongan ovi rtali nitdawan.
7 Afwatan nangan ovi rla'a,
ovu ovi wol rla'a ra,
ian ra ovu afwatan liak ovi rna'a tahat ra,
ntafal vali manut nangan ra,
tamata ra bis rot-nala ma rmarut ovu rfamarut nala roak ira.
8 Na'uk wol tamata isa vali bisma nfamarut nala earn a!
Eardida notu afa ovi sian ra,
ma wol tateri nala ia,
ovu ia wean vali alanu i nfedan nala tamata ra.*
9 Ita tfadawang Yamadida Ubila'a ovu eardida ra.
Ita tala eardida ra al tear tfasoba vali tamata ovi Ubu notu ma felarira ra wean Ia.
10 Ita tfadawang Ubu ovu eardida ra ovu tear tfasoba tamata ra ovu eardida ra.
Terang a valing averi,
ini wol kena lahir!
11 Eka msyi'ik.
Wear i wol taltelas ovu wear i taltelas wol rava tali wear ulun isa.
12 Aa ara wol vuan zaitun,
ovu aa anggur vali wol vuan ara.
Wear ulun i taltelas wol not-nala ma wear a wol taltelas.
Kaka'a felan irua
13 Tali bir tinemun,
na iki ni kaka'a dawan ovu nsi'ik wan ma lolin?
Fyalak verin ia ma nfaturu afa avyai na'a ni vava'at i lolin,
ovu vali nfakabava tenan a,
boma tali ni kaka'a dawan a,
na ni afa ovi notu ra kena.
14 Na'uk wean i tamata isa wol inan lahir ma nsi'ik tamata liak ni lolin a,
ovu nfikir a'uk tenan a,
na deka nfakaratat tenan a ma nsiklabir ma nfulak nvali afa ovi kena ra.
15 Kaka'a i wean inyai wol nsuta tali lanit ratan,
na'uk ntali watan tamata ovi rna'a lanit ivavan a.
Ubu Ni Roh wol nala afa avyai,
na'uk afa avyai rtali nitdawan a.
16 Tevek wean i tamata isa ralan sian tevek nsi'ik tamata liak ni lolin a,
ovu vali nfikir a'uk tenan a,
na veka notu ma tamata ra rsingarahi,
ovu vali rotu munuk afa ovi sian ra.
17 Na'uk kaka'a i ntali Ubu notu ma tamata ovi rorang Yesus,
ralarira ra rmerat ovu wol inar ma tamata ra rsingarahi.
Ira rmarkai,
rafrenar,
rlobang ma dawan tamata ra ovu rotu lalawatan afa ovi lolin ra.
Ira ralarira ra wol raruan ovu wol rsiklabir ma rfalak afa boku,
na'uk rotu afa liak.
18 Ira wearira tamata ovi iva'ur ma rotu rira va'i ra,
ma ravuri-rava nabat ra.
Ira veka ka'i rala ihin a te vuan a.
Tamata ovi wol inar ma tamata ra rsingarahi,
ira rotu watan malinan a,
boma tamata rivun veka rorang ira,
ma rotu lolin a verin tamata ra.