Ubu wol nrenar falurut tali tamata ovi rorang watan rira ininan sian ra
1 Terang a valing averi,
mia mkya'a ne,
msyisala ralabira ma msyingarahi-sikual mia,
tevek inabira afa sian ovi rna'a roak ralabira ra.
Afa avyai rotu ma msyingarahi na'a ralabira ra.
2 Mia inabira afa liak,
na'uk wol mdyav-nala,
ma msyifedan.
Mia byo'itea afa ovi tamata liak rira ra,
na'uk wol bisma myal-nala,
ba msyingarahi-sikual mia.
Mia wol bira akataka,
tevek wol myera tali Ubu.
3 Velik ne miflurut ma myera tali Ubu,
na'uk Ia wol nala verin mia.
Afa i minovak na'a ralabira ra ma myera tali Ia yai wol kena,
tevek myera ma al fyakena watan tenabira ra.
4 Mia wol myot-orang afa ovi Ubu nfalak ra.
Mia mkya'a roak ne,
wean i inabira ma myorang tamata ovi rangal Ubu,
rira afa ovi rotu ra,
na mia myangal vali Ia.
Tamata iki watan,
wean i inan ma notu afa ovi sian ra na'a lanit ivavan ini,
na tamata yai ni sian roak Ubu.
5 Mia deka minovak ne,
afa ovi Ubu nfalak na'a Ni Surat Ralan a wol ihin.
Ubu Ni Roh nleal lahir raladida ra,
ba inan urun ma torang a'uk Ia,
ma wol tot-orang afa ovi rna'a lanit ivavan ini.
6 Ubu nala Ni rala lolin verin ita,
boma tfalek-nala afa sian ovi rna'a raladida ra.
Wean i nfalak roak na'a Surat Ralan a ne,
“Ubu nangal tamata ovi rfakaratat tenarira ra,
na'uk nlobang ovu nala ngrebat verin tamata ovi ba'i rfakabava tenarira ra.”*
7 Ba mia musti fyakabava tenabira ra verin Ubu,
ovu myorang afa ovi nfalak ra.
Myotu wean inyai,
na myangal roak nitdawan ni afa ovi notu ra,
ba veka nafla talik mia.
8 Fyaseri Ubu,
boma nfaseri vali mia.
Fyamerat limabira ra ovu ralabira ra tali bira salasilan ra.
Tamata salasilan mia!
Byatuk bira fikiran sian ra,
tevek afa avyai rotu ma ralabira raruan na'a bira inorang a.
9 Byakar urun ovu fyaktanit,
tevek myotu sala roak.
Mkyati bira malmalit a ovu lubira ra.
Mkyati ralabira lolin ovu ralabira lalau.
10 Fyakabava tenabira ra na'a Duila'a wahan ralan a,
na Ia veka nsikat mia ovu nalang mia.
Snurak verin tamata ovi rorang Yesus, boma deka sumarira sala verin tamata liak
11 Terang a valing averi,
deka msyifalak sian mia.
Tamata iki watan nfalak sian ovu nfaleka inukun verin teran a valin ra,
na ia nfalak sian roak Ubu Ni inukun ra,
ovu wol not-orang roak afa ovi Ubu nfalak ra.
Ba ihin a,
mia wol myot-orang roak Ni inukun ra,
na'uk myeluk tamata i ba'i nfaleka inukun,
ovu mtyasorat roak inukun avyai.
12 Velik aba tamata isa watan ntaha dasing ma al ntimbang tamata ra munuk.
Ia sa'i notu inukun ra ovu nfaleka inukun verin tamata ra ovu Ni ngrebat a,
ma nsikat tamata ra tali rira salasilan ra,
ovu nfamwear tamata ra.
Mia ini iki ma fyaleka inukun verin terabir-valibira ra?
Deka miblufang Ubu na'a afa ovi mane myotu ra
13 Terang a valing averi,
eka mryenar ma lolin.
Mia fyalak ne,
“Amar ini te ilyan,
na amati ahu eri ma veka amna'a ineri varat isa,
ma amfedi-amfaha afa na'a ineri ma amdava utumami.”*
14 Na'uk mia wol mkya'a ne,
ilyan veka mtyuan afaka.
Eka fyikir ma blawat.
Bira vava'at wean inba?
Bira vava'at wean yafuman ma nvotuk,
na'uk brian munuk,
na nlia roak.
15 Velik aba,
mia musti fyalak ne,
“Wean i Duila'a ralan nfalak ma amva'at,
na ami veka amotu afa ini te afa yai.”
16 Na'uk mia ba'i mingrihi ma fyakaratat tenabira ra.
Fyakaratat tenabira wean inyai,
na wol kena lahir.
17 Ba,
wean i tamata isa nka'a afa ovi kena ra,
na'uk wol not-orang,
na ia notu salasilan roak.