Snurak verin tamata ka'i ra
1 Tamata ovi fiang ini bira metan rivun,
eka mryenar ma lolin afa ovi mane ufalak ini.
Byakar ma fyaktanit,
tevek mia veka mtyuan sian dawan ila'a.
2 Bira metan ra veka rakvisal ovu ngafat ra veka ra'an munuk bira kadaravit ra.
3 Bira masa ovu perak ra veka rarawan munuk,
ovu vali bira masa ovu perak i rarawan yai veka rfaturu ne,
myotu salasilan roak ovu bira metan ra.
Afa avyai veka rotu ma Ubu nukun mia na'a yafu ralan.
Mia byakar,
tevek na'ut inyai,
na amar ra mane rlia roak,
na'uk mtyafal ma misdovuk watan bira metan ra na'a lanit ivavan ini.*
4 Mia myeang tamata ovi rkarya na'a bira va'i ra ma wol byahir rira kadi ra.
Eka mryenar rira maruhuk ra!
Tamata avyai rafwak ma rera lablobang ma rfalak ne,
“Duila'a,
mrenar ami o!”
Ira rafwak wean inyai verin Ubila'a i nfareta akataka munuk.
5 Mia mkya'i roak ovu myotu a'uk inabira lolin,
ma fyatemang roak lanit ivavan ini ihin a.
Mia weabira afwatan ovi rfawatak ma ngbabal roak ira,
na'uk wol rka'a ne,
tamata ovi rfawatak ira mane rfedan ira ma ra'an.*
6 Mia vali myukun ma fyedan tamata ovi rira vava'at ra rmalola,
ovu tamata ovi wol bisma rangal nala mia.
Tatahang raladida na'a dida susa ra
7 Terang a valing averi,
mtyahang ralabira ra ovu mnyaban watan amar i Duila'a veka nma.
* Eka msyi'ik tamata ovi rotu va'i ra.
Ira rnaban watan ma da'ut nma ma ravuri-rava,
ovu rnaban da'ut ewal ma notu ma rira afamtahan ra ihirira.
Afa yai nfaturu ne,
rtahang nal ralarira ra.
8 Ba mia vali musti mnyaban ovu mtyahang ralabira ra.
Myorang ovu ralabira urun,
tevek amar i Duila'a veka nma sarseri roak.
9 Terang a valing averi,
deka mifngamu'ur ovu deka msyifasala mia,
boma Duila'a deka nukun mia.
Ia i veka nukun mia sarseri mane nma roak.
10 Terang a valing averi,
mingnanang nabi ovi lan ana,
rfamalik roak Ubu Ni vaivatul ra.
Ira rtuan susa rivun,
na'uk rtahang nal ralarira ra.
Ni lolin a,
mia musti myot-orang vali rira afa ovi rotu ra.
11 Ita tfalak ne,
tamata ovi rtuan susa rira vava'at ra malinan,
tevek rtahang nal ralarira ra ma rorang Ubu.
Mia mryenar roak Ayub.
Duila'a naflahar ia,
tevek ntahang nal ralan na'a ni susa i dawan urun a.
Ba mia mkya'a roak ne,
Duila'a Ni silobang a dawan urun,
ovu nfaturu Ni silobang a verin Ni tamata ra.
12 Terang a valing averi,
nlia tali afa ovi beti ufalak verin mia yai,
na deka mifwaba.
Deka myala lanit ratan te lanit ivavan ini,
te afa liak vali ma al mifwaba.
Ni lolin a,
fyalak watan ne,
“O'u,
ya'a veka otu,”
te fyalak watan ne,
“Wahal,
ya'a wol otu.”
Ba myotu lahir afa ovi fyalak roak yai,
boma Ubu Ni inukun a deka nkena mia.
Traning Ubu ovu taflurut verin Ia
13 Tali bir tinemun,
na wean i tamata isa ntuan susa,
na fyalak verin ia ma naflurut verin Ubu.
Wean i tamata isa inan lolin,
na fyalak verin ia ma ndedang ma nfadawang Ubu.
14 Wean i tamata isa ntali bir tinemun nawar ia,
na nfalak ma dawan kareda ovi reluk penatua* rma ma raflurut verin ia,
ovu rala Duila'a naran ovu Ni ngrebat a,
beti ra'ung ngul na'a tenan a.
15 Ba tamata ovi raflurut ovu ralarira urun,
na Ubu veka notu ma tamata i nawar ia yai lolin ewal ia.
Ba wean i notu salasilan,
na Ubu veka na'i vatuk ni salasilan ra.
16 Ba mia ka'i mtyorung ma fyalak bira salasilan ra ovu isa naflurut verin isa,
boma lolin mia.
Tamata ovi rira vava'at ra rmalola,
wean i raflurut,
na rira falurut yai ni ngrebat a dawan urun.
17 Eka mingnanang nabi Elia.
Ia tamata watan ia wean ita,
na'uk naflurut ovu ralan urun ma da'ut wol nsuta.
Ba da'ut wol nsuta lanit ivavan ini,
ti naran varat itelu vulan inean.
18 Ba naflurut ewal ma da'ut nsuta,
ma lanun a notu ma afamtahan ra ihirira.
Fyakena tamata ovi rti talik Ubu Ni linga'an
19 Terang a valing averi.
Tali bir tinemun,
na wean i tamata isa nban-talik roak linga'an i kena,
na ni lolin a tamata boku rsurak ia ma nahil ma ntalik tali ni salasilan ra,
ma norang ewal Ubu.
20 Eka mingnanang vaivatul ini:
Tamata iki watan notu ma tamata salasilan isa nahil,
ma norang ewal roak Ubu Ni linga'an a,
na ia nala roak tamata yai tali matmatan,
ovu Ubu veka na'i vatuk ni salasilan rivun yai.
Surat i ususan ini,
lawan watan ini.Ya'a Yakobus,
ala salam verin mia