Tamata dawan ovi rorang Yesus rasdovu ira na'a Yerusalem mane ra'an vai isa
1 Amar isa,
na tamata boku rtali propinsi Yudea rma kota Antiokhia ma rair tamata ovi rorang Yesus,
na'uk wol Yahudi ira.
Ira rfalak ne,
“Musa ni inukun ra rfalak ne,
wean i wol rsunat mia,
na Ubu wol nsikat mia tali bira salasilan ra,
ma bira vava'at kakiwal.”*
2 Paulus irua Barnabas wol inar lahir afa i tamata avyai rfalak a,
ba vair ma dawan.
Nata ra'an vai isa ma irua ovu tamata boku ovi rorang Yesus rti Yerusalem,
ma rfamalik afa ini verin rasul ra ovu dawan kareda ovi reluk penatua.
3 Ba tamata ovi rorang Yesus na'a Antiokhia rfatuang ira rti kota murin a,
beti rbana rti propinsi Fenisia ovu propinsi Samaria ma rfamalik na'a tamata ovi wol Yahudi ira na'uk rorang Yesus.
Tamata ovi rorang Yesus na'a inyai rarenar ivar yai,
na inar lolin.
4 Ti raran Yerusalem,
na tamata ovi rorang Yesus ovu rasul ra,
ntafal vali dawan kareda ovi reluk penatua,
rti ma rala ira.
Ira rfamalik munuk afa ovi Ubu notu roak verin ira na'a rira karya verin tamata ovi wol Yahudi ra.
5 Na'uk tamata ovi rorang Yesus boku rtali Yahudi rira sidovung isa naran Farisi rdiri ma rfalak ne,
“Tamata ovi wol Yahudi ira,
na'uk rorang roak Yesus,
musti rot-orang Musa ni inukun ra ovu rsunat vali ira.”
6 Ba rasul ra ovu dawan kareda ovi reluk penatua rasdovu ira ma rfamalik afa ini.
7 Rasdovu ira ya'i mnanat vali ma rsiforat ira,
beti Petrus ndiri ma nfalak ne,
“Terang a valing averi,
mia mkya'a roak ne,
amar rivun nti roak veli,
na Ubu nfili ya'a tali bir tinemun ma ti ufamalik Ni Ivar Lolin verin tamata ovi wol Yahudi ra,
boma rarenar ma rorang vali Yesus.
8 Ubu nka'a munuk lahir tamata ralarira ra.
Ia nfaturu roak ne,
nfili ira ma nala Ni Roh verin ira wean i notu roak verin ita.
9 Ubu nsi'ik ita tamata Yahudi,
ovu tamata ovi wol Yahudi,
wead isa watan,
ba notu vali ma ralarira ra rmerat,
tevek rorang roak Yesus.
10 Ba afaki notu mi mlyabir teman Ubu ma myala varvara aleman* verin tamata ovi wol Yahudi ra?
Deka mkyiwal tamata ovi rorang Yesus,
na'uk wol Yahudi ira,
ma rorang Musa ni inukun ra!
Ita ovu ubud-nusid ra wol tvar-nala vali varvara yai.
11 Deka tkiwal ira ma rorang Musa ni inukun ra,
tevek ita torang ne,
Duila'a Yesus nala Ni rala lolin verin ita ma nsikat ita tali dida salasilan ra,
ma dida vava'at kakiwal.
Tamata ovi rorang Yesus,
na'uk wol Yahudi ira,
na ira wean vali ita ma rira vava'at kakiwal!”
12 Nata tamata rivun ovi rna'a inyai wol vair lahir,
ba Barnabas irua Paulus rfamalik lalawatan Ubu Ni ngrebat i nala verin ira,
ma rotu mujizat ovu rotu faneak ovi tamata ra wol rot-nala verin tamata ovi wol Yahudi ra.
13 Rangrihi munuk roak,
beti Yakobus* nfalak ne,
“Terang a valing averi,
eka mryenar ya'a!
14 Simon Petrus nfamalik roak ne,
lalan ana Ubu nfaturu Ni rala lolin verin tamata ovi wol Yahudi ra,
ma nfili boku tali ira ma reluk Ni tamata ra.
15 Afa yai wean lahir i nabi ra rfamalik lan roak.
Nabi isa ntulis ne:
16 ‘Amar liak,
na veka uma ma ufadiri ewal Raja Daud ni rahan i nleka roak.
* Rahan yai nama'ar,
na'uk Ya'a veka ufadiri ewal ia na'a wan a,
17 boma tamata ra munuk bisma rdava Duila'a.
Otu wean ini,
boma tamata ovi ufili roak ira,
velik ne Yahudi te wol Yahudi ira,
veka rorang Ya'a.
*
Ya'a Duila'a Ya'a,
18 ba tali lalan a ufavotuk roak afa ovi otu ra verin tamata ra.’ ”
19 Yakobus ntafal ma nfalak ne,
“Ya'a unovak ne,
tamata ovi wol Yahudi ira,
na'uk inar ma rorang vali Ubu,
na ita deka totu susa ira.*
20 Ni lolin a tasusan surat verin ira ma tsurak ira ma deka ra'an afamtahan ovi rala roak al raraning walut ra,
te ra'an afwatan ihin tali afwatan ovi rfungal ma rfedan ira,
ovu deka renu te ra'an lara.
Deka rsifa tia ma watan ovu tamata ovi wol awarira* verin ira.
21 Tali lalan ana,
tamata ra rfamalik Musa ni inukun ra.
Lokat amar i ryari ira,
na tamata ra rfamalik inukun avyai na'a rira rahan falurut ra na'a ahu ra munuk.”
Dawan kareda ovi reluk penatua rkirim surat verin tamata ovi wol Yahudi ira, na'uk rorang roak Yesus
22 Rasul ra ovu dawan kareda ovi reluk penatua,
irmunuk tamata ovi rorang Yesus na'a rira sidovung a ra'an vai isa ma rfili tamata ifira tali ira,
ma irmunuk Paulus ovu Barnabas rti Antiokhia.
Ba rfili Silas ovu Yudas i rfanara vali ia ne Barsabas.
Tamata irua ini rban-ulu vali na'a rira sidovung.
23 Ira rala surat ma rtaha.
Surat yai ihin wean ini:
“Ami ini rasul ra,
dawan kareda ovi ameluk penatua,
ovu terabir-valibira ra amasusan surat ini verin tamata ovi rorang Yesus,
na'uk wol Yahudi ira,
ma rleal Antiokhia,
propinsi Siria ovu propinsi Kilikia.
Amala salam verin mia!
24 Ami amrenar ne,
tamata ifira rtali mami sidovung ti rlolak mia,
ma rotu ma wahabira rwa'uk na'a afa ovi rair ra.
Ami wol amsinir ira ma rotu afa avyai.
25 Amasdovu ami ma ama'an vai isa ma amfili brana ifira ma ti rdoku ovu mia.
Ira veka irmunuk Barnabas ovu Paulus.
Irua ini amlobang urun ira.
26 Tamata irua ini wol rbobar ma rmata na'a karya ini,
tevek dida Duila'a Yesus Kristus.
27 Ba amsinir Yudas irua Silas ma ti rfalyawang mami vaivatul ovi rna'a surat ini verin mia.
28 Ubu Ni Roh ntorung roak,
ovu ami amtorung vali,
boma deka amala varvara aleman verin mia,
ba amala watan varvara ovi byar-nala,
wean ini:
29 deka mian afamtahan ovi rala roak al raraning walut ra,
deka mian afwatan ihin tali afwatan ovi fyungal ma fyedan ira,
ovu deka myenu te mian lara.
Deka msyifa tia ma watan ovu tamata ovi wol awabira verin ira.
Wean i fyaroa tenabira tali afa avyai,
na kena roak mia.
Lawan watan inyai ta bir tinemun,
ba ki tsituan ewal ita.”
30 Rsituli munuk roak ira,
beti irfa'at rban-talik ira ma rti Antiokhia.
Ira rasdovu munuk tamata ovi rorang Yesus na'a inyai ma rala surat yai verin ira.
31 Tamata ovi rorang Yesus rbas munuk surat yai,
ba ralarira lolin urun,
tevek ihin nfaloling ralarira ra.
32 Yudas irua Silas nabi vali ira.
Ira rsurak ma mnanat terad a valid ovi rna'a Antiokhia ma rfaloling ovu rfangrebat ralarira ra.
33 Irua rna'a inyai ma ya'i mnanat roak,
beti tamata ovi rorang Yesus na'a inyai rsinir ira ma rewal ira rti Yerusalem,
ma rfalak verin tamata ovi rsinir ira ne,
fara Ubu naflahar ira. [
34 Na'uk Silas ralan nfalak ma nana'a watan inyai.]*
35 Paulus irua Barnabas mnanat vali ira na'a Antiokhia.
Ira ovu tamata rivun vali rair ovu rfamalik Duila'a Ni vaivatul ra.
Paulus irua Barnabas rsitaku ulurira na'a rira fikiran ra ma ka'i rban-sialing ira
36 Ba amar isa,
na Paulus nfalak verin Barnabas ne,
“Mwa ma ti tfalokat ewal ahu ovi lan a tfamalik roak Ubu Ni vaivatul ra,
ma talola terad a valid ovi rorang roak Yesus,
boma tsi'ik ne,
rira vava'at a wean inba.”
37 Barnabas inan ma novun Yohanes i rfanara vali ia ne Markus,
38 na'uk Paulus nanovak ne,
wol lolin ma rovun Markus,
tevek ia nban-talik roak ira na'a propinsi Pamfilia,
velik ne rira karya nbana obin.
39 Barnabas irua Paulus rsitaku ulurira na'a rira fikiran ra,
ma ti nata rban-sialing roak ira,
ba Barnabas nala Markus ma irua ravul kabal lar ma robal rti nuhu isa naran Siprus.
40 Na'uk Paulus nfili Silas ma nkarya ovu ia.
Wol rti obin,
na tamata ovi rorang Yesus na'a kota Antiokhia rera verin Ubu ma nala Ni rala lolin verin ira.
41 Irua rti ma rban-lilit propinsi Siria ovu propinsi Kilikia,
ma rfangrebat sidovung tamata ovi rorang Yesus na'a inyai,
boma rira inorang nangrebat.