Paulus irua Barnabas rna'a kota Ikonium
1 Paulus irua Barnabas rti raran kota Ikonium,
na rti Yahudi rira rahan falurut ralan ma rfamalik Ubu Ni Ivar Lolin.
Ira rangrihi ma rala lahir tamata Yahudi ovu ovi wol Yahudi ralarira ra,
ba rivun ila'a rorang Yesus.
2 Na'uk tamata Yahudi ovi wol rorang Yesus rfakeri tamata ovi wol Yahudi ralarira ra ma wol inar lahir tamata ovi rorang Yesus.
3 Paulus irua Barnabas mnanat ira na'a inyai.
Irua rabrahi ma rfamalik Duila'a.
Ba Ubu nala ngrebat verin ira ma rotu mujizat ra,
ovu rotu faneak ovi tamata ra wol rot-nala ma al rfaturu ne,
afa ovi rfalak na'a Ubu Ni rala lolin a,
kena.
4 Tamata ovi rna'a kota yai ralarira ra rsifarsangal ira,
ba boku rorang tamata Yahudi ra,
na boku vali rorang rasul irua yai.
5 Tamata ovi wol Yahudi ra,
ovu tamata Yahudi ra,
ovu vali rira dawan ra ra'an vai isa mane rotu sian Paulus irua Barnabas ma rtev-fedan ira.
6 Na'uk irua rka'a roak,
ba rafla rti kota Listra,
kota Derbe ovu ahu liak ra na'a wan isa naran Likaonia.
7 Na'a inyai,
na rfamalik vali Ubu Ni Ivar Lolin.
Tamata ovi wol Yahudi rnarin ne, Paulus irua Barnabas ubu ira
8 Na'a Listra,
na brana isa ean ra rmafun ma wol nbana nala,
tevek natlukut tali amar i rarali ia.
9 Tamata yai nrenar afa ovi Paulus nfalak ra.
Paulus nsi'ik ia ma nka'a ne,
ni inorang a dawan ma veka lolin ia.
10 Paulus vain a dawan ma nfalak ne,
“Mdiri kikyai!”
Ba tamata yai naswatil ma ndiri,
ma nbana lahir.
11 Tamata rivun ovi rarenar Paulus rsi'ik afa ovi beti notu ra,
ba rala vai Likaonia al rafwak ne,
“Ubu ra rtali lanit ratan reluk tamata ma rsuta roak!”
12 Ira rfanara Barnabas ne Zeus,
ovu vali rfanara Paulus ne Hermes,
tevek ia nangrihi ma dawan.*
13 Rira ubu Zeus ni mela falurut nkarya na'a rira rahan falurut i ndok-ebang kota yai.
Mela falurut yai nala karba brana ifira ovu aa ni fafun ra,
ma rovun ira rti falfolat ila'a i na'a Listra ni fidu,
boma rasnuri afwatan avyai ma al raraning Barnabas irua Paulus.*
14 Irua rarenar afa ovi tamata avyai mane rotu verin ira,
na rkamadir lahir rira kadaravit ra ma rafla ti rdiri tamata avyai waharira ralan ra ma rafwak ne,*
15 “Kida averi,
afakinimi myotu wean ini?
Ami tamata watan ami wean mia!
Amna'a ini ma amfamalik Ubu Ni Ivar Lolin verin mia,
boma myahil ma deka mryaning ubu ovi wol rot-nala akataka.
Myorang a'uk Ubu,
tevek Ia nva'at ma notu lanit,
lanit ivavan a,
tahat ovu afa ovi rna'a munuk lahir ralan a.
16 Lalan ana,
Ubu nsi'ik watan ma bangsa ra munuk ka'i rban-orang afa ovi ralarira ra rfalak ra.
17 Na'uk Ia notu ma tamata ra rka'a Ia.
Ia nfaturu Ni lolin a,
ma lokat varat nala da'ut ovu vali notu ma bira va'i ra ihirira.
Ia nala afamtahan rivun verin mia ovu notu ma inabira lolin.”
18 Velik ne rasul irua yai rfalak roak wean inyai,
na'uk susa watan obin ma rangal tamata rivun avyai,
ma deka rasnuri rira karba ra ma raraning ira.
19 Nata Yahudi boku rtali Antiokhia ovu Ikonium rma Listra,
ma rweang tamata rivun na'a inyai ma rteva Paulus,
beti rving soli-sasan ia ma rti kota murin.
Ira rnarin ne,
Paulus nmata roak.
20 Na'uk tamata ovi rorang Yesus rdir-lilit ia,
nata nbatar ma newal ia nti kota ralan.
Ni ilyan ana,
irua Barnabas rti kota Derbe.
Paulus irua Barnabas rewal ira rti Antiokhia
21 Na'a Derbe,
na Paulus irua Barnabas rfamalik Ubu Ni Ivar Lolin a,
ba tamata rivun rorang Yesus.
Irua rotu munuk roak wean inyai,
beti rewal ira rti Listra,
Ikonium ovu Antiokhia.
22 Ira rna'a kota avyai,
na rala snurak lolin ma al rfangrebat tamata ovi rorang Yesus ralarira ra,
boma rorang a'uk Yesus.
Ira rfalak ne,
“Kida averi,
ita tatuan lan susa rivun veki,
beti ti tna'a Ubu Ni Fareta Ralan.”
23 Paulus irua Barnabas rfaturu tamata ra verin lokat sidovung tamata ovi rorang Yesus ma rna'a rira dawan kareda ovi reluk penatua.
* Nata irua raflurut ovu rtolat,
beti rera verin Duila'a ma nwanar ira,
tevek rorang lan roak Ia.
24 Rotu munuk wean inyai,
na rahu propinsi Pisidia ma rti raran propinsi Pamfilia.
25 Ira rfamalik munuk Ubu Ni vaivatul ra na'a kota Perga,
beti rti kota Atalia.
Ira ravul kabal lar ma robal rti ewal kota Antiokhia (Kisah 14:26)
26 Tali inyai,
na ravul kabal lar ma robal rti ewal Antiokhia.
Lan a na'a Antiokhia,
na tamata ovi rorang Yesus rera verin Ubu ma nala Ni rala lolin verin Paulus irua Barnabas,
boma rfabana rira karya i beti rotu munuk a.
27 Ti ma raran Antiokhia,
na rasweang sidovung tamata ovi rorang Yesus ma rasdovu ira,
beti rfamalik munuk Ubu Ni afa ovi notu roak verin ira na'a rira karya ra.
Ira rfamalik vali ne,
wean inba ma Ubu nala Ni linga'an lolin verin ira,
boma tamata ovi wol Yahudi ra rorang vali Yesus.
28 Paulus irua Barnabas mnanat lahir ira na'a kota yai,
ma irmunuk tamata ovi rorang Yesus rleal inyai.