Yahudi rira dawan ra rfakeri tamata ralarira ra, ma rangal Paulus na'a Kota Tesalonika
1 Paulus irua Silas rahu linga'an i nti kota Amfipolis ovu kota Apolonia ma rti raran kota Tesalonika.
* Yahudi rira rahan falurut isa na'a inyai.
2 Paulus ba'i nti Yahudi rira rahan falurut yai.
Lokat amar i ryari ira,
na ia ovu tamata Yahudi ra rfamalik Ubu Ni Surat Ralan,
ti naran karedralan itelu.
3 Ia nfamalik ne,
“Ubu nfadoku roak ma rotu sian ma rfedan Raja i ntevut dida salasilan ra,
beti nva'at ewal tali matmatan.
Raja i ntevut dida salasilan ra,
inyai Yesus i ufamalik verin mia!”
4 Ba tamata Yahudi boku rorang Yesus ma rovu Paulus irua Silas.
Wean inyai vali verin tamata Yunani ovi rorang Ubu,
ovu vata mela ra,
rivun ira rorang afa ovi Paulus nfalak ra.
5 Na'uk dawan Yahudi ra ralar sian,
ba rera tamata ktufan ifira tali linga'an ra ma rasdovu ira.
Tamata ktufan avyai rti ma rotu ma vangoa-vanga dawan na'a kota ralan.
Ira rti tamata isa naran Yason ni rahan,
mane rot-visal rahan yai ma rdava Paulus irua Silas,
tevek inar ma rtaha ira ti verin tamata rivun.
6 Na'uk wol rdav-nala Paulus irua Silas na'a inyai,
ba rlia soli-sasan Yason ovu tamata ovi rorang Yesus boku vali,
ma ti rdiri dawan ovi rfareta kota yai waharira ralan ra.
Ira rafwak ne,
“Kida averi,
tamata ovi rotu sian tamata ra na'a wan inba watan,
fiang ini rma roak dida ahu a!
7 Yason nala roak ira ma rna'a ni rahan.
Ira munuk wol rorang inukun ovi Roma rira Kaisar nfadoku ra,
tevek rfalak ne,
raja isa vali naran Yesus!”
8 Ba rira vaivatul avyai rfakeri tamata rivun ralarira ra na'a kota yai,
ovu rfakeri vali rira dawan fareta ralarira ra ma rangrova urun.
9 Nata tamata ovi rfareta kota yai rfalak ma Yason ovu tamata ovi rorang Yesus rfadok-teri rira kubang na'a inyai veki,
ma wean i rtorung ne,
wol rotu roak afa avyai,
beti rfatalik ira.
Paulus irua Silas rna'a kota Berea
10 Lervava roak,
na tamata ovi rorang Yesus na'a Tesalonika rsinir Paulus irua Silas ma rti kota Berea.
Ti raran inyai,
na rti lahir Yahudi rira rahan falurut.
11 Tamata ovi rna'a Berea yai rira sialang verin tamata liak ra lolin lia tamata ovi rna'a Tesalonika.
Ira inar urun ma rarenar Ubu Ni vaivatul ra,
ovu vali lokat amar rbas ma lolin Surat Ralan ma al rsi'ik ne,
afa ovi Paulus nfalak ra kena te wahal.
12 Ba tamata Yahudi rivun ovi rna'a inyai rorang Yesus.
Vata mela Yunani boku ovu brana Yunani rivun vali rorang Yesus.
13 Ti ma Yahudi ovi rna'a Tesalonika rarenar ne,
Paulus nfamalik Ubu Ni vaivatul ra na'a Berea,
na rti inyai ma rfakeri tamata ralarira ra,
boma vangoa-vanga dawan.
14 Ba tamata ovi rorang Yesus ti rovun lahir Paulus ma rti tahat nelan a,
na'uk Silas irua Timotius rna'a watan Berea.
15 Nata rovun Paulus rti kota Atena.
Paulus nsurak tamata avyai ma rfalak verin Silas irua Timotius ma yarak ti rtuan ia na'a Atena.
Ia nfalak munuk wean inyai,
beti rewal ira rti Berea.
Paulus nfamalik Ubu na'a kota Atena
16 Paulus nana'a Atena al nanaban Silas irua Timotius,
na ralan lalau urun,
tevek nsi'ik kota yai nngora lahir ovu walut ovi tamata ra raraning.
17 Ba nti Yahudi rira rahan falurut,
ma ia ovu Yahudi ra ovu Yunani ovi rorang Ubu rfamalik afa ala rsiforat ira na'a inyai.
Lokat amar Paulus notu wean inyai vali verin tamata ovi ntuan ira na'a wan i rfedi-rfaha afa.
18 Guru ovi rira kaka'a dawan rira sidovung naran Epikuros,
ovu tamata ovi rira sidovung naran Stoa rsisoal ira ovu ia.
Boku tali ira rfalak ne,
“Tamata ini sumarn batbitin ma nangrihi tia ma watan!”
Boku vali rfalak ne,
“Beta ne nfamalik tamata liak rira ubu ra.”
Ira rfalak wean inyai,
tevek Paulus nfamalik Ubu Ni Ivar Lolin i nfamalik Yesus,
ovu nfamalik vali ne,
tamata ra veka rva'at ewal tali matmatan.
19 Nata guru avyai rovun ia,
ma ti rasdovu ira na'a rira sidovung dawan a naran Areopagus.
Ira rfalak verin ia ne,
“Baba,
inamami ma amrenar afa ngorva'an ovi mair yai.
20 Tevek amrenar afa ovi fwalak ra,
na'uk afa avyai rfabriang ami.
Inamami ma amka'a vaivatul avyai ihirira ra.”
21 Tamata Atena ra ovu tamata dakan ovi rna'a kota yai inar ma rdoku ma rfamalik ovu rarenar lalawatan afa ngorva'an ra.
Paulus nfamalik Yesus verin tamata Atena ra na'a rira sidovung dawan naran Areopagus (Kisah 17:19)
22 Ba Paulus ti ma ndir-ulu na'a sidovung dawan Areopagus yai ma nfalak ne,
“O tamata Atena averi!
Usi'ik tali afa ovi myotu ra,
na myorang urun bira agama,
ma mryaning bira ubu ra.
23 Tevek uban-lilit bira kota ma usi'ik wan ovi mryaning bira ubu ra.
Urea vali wan i ba'i misnuri bira korban ra na'a.
Na'a wan yai rtulis vaivatul ovi ne,
‘Verin Ubu i wol amka'a.’
Mia fyadawang Ubu,
na'uk wol mkya'a Ia.
Ba mane ufamalik Ia verin mia.
Paulus nrea wan i ba'i rasnuri rira korban ra na'a. (Kisah 17:23)
24 Ubu i notu lanit ivavan ovu afa ovi rna'a munuk ralan a,
Ia Duila'a verin afa ovi rna'a lanit ratan ovu ovi rna'a lanit ivavan.
Ia wol nleal rahan falurut ovi tamata ra rotu,
wean rahan ovi fyadoku bira walut ra na'a.
25 Ia wol nera afa tali tamata ra,
tevek Ni munuk afakataka!
Ubu a'uk sa'i nala dida vava'at ovu nad ra,
ntafal vali afakataka munuk verin tamata ra.
26 Ubu not-nala tamata ra munuk na'a lanit ivavan a tali tamata isa i naran Adam,
ma nsiduk ira lokat nuhu ovi rna'a lanit ivavan.
Tali lalan,
nfadoku roak dida vava'at ovu matmatan a,
ovu vali tamata ra veka rna'a inba.
27 Ubu notu wean inyai,
boma tamata ra rdava Ia,
ma fara ne rtuan Ia na'a amar ovi rdava Ia.
Velik aba,
Ubu wol raroa tali ita.
28 Tamata ra ba'i rfalak ne,
‘Ia novun ita ma tna'a lanit ivavan a,
ovu tasdai ma tva'at,
tevek Ni ngrebat a.’
Inyai wean vali bira tamata boku ovi rasusan surat ra rfalak ne,
‘Ubu yanan verin ita munuk.’
29 Ubu yanan ita,
ba deka tanovak ne,
Ubu wean walut ovi rotu tali masa te perak te vatu,
ma tamata ra rotu tali rira kaka'a.
30 Lalan ana,
wol tka'a Ubu ralan ma totu afa boda-badi rivun.
Ubu nablufang roak afa avyai,
na'uk fiang ini Ia nfareta tamata ra munuk na'a wan inba watan ma rahil ma rtalik tali rira salasilan ra.
31 Ubu nfadoku roak amar ma veka nfaleka inukun ovu Ni malolan a verin tamata ra munuk na'a lanit ivavan a.
Ia nfili roak tamata isa ma veka nukun tamata ra.
Ia nfava'at ewal roak tamata yai tali matmatan ma nfaturu verin tamata ra munuk ne,
Ubu nfili Ia!”
32 Ira rarenar Paulus nfalak ne,
Ubu nfava'at ewal tamata isa tali matmatan,
ba boku rangrihi lablabir ia.
Na'uk boku rfalak verin ia ne,
“Inamami ma fwamalik ewal afa ovi verin ami.”