Popasintobua Basa Buku Nagasa 1

Popasintobua Basa Buku Nagasa

Ana Daud Mbagou Daud nampotumpuka i Yesus. Etumo pade niuli i Yesus muli nu Mbagou Daud. To Yahudi nanguncani ande Mesias ee muli nu Mbagou Daud. Mamala rakalio ri 2 Sam. 7:12-13; Mzm. 89:3-37; 132:11-18; Yes. 9:6-7; 11:1-11; Yer. 23:5-6; 30:8-9; 33:15-17; Yeh. 34:23-31; 37:24-28. Nadea ngaya sabana pade to Yahudi tado nadota nantarima i Yesus newali Mesias. Sangaya, to Yahudi nosarumaka i Mesias ee ngoni ewa Tadulako pade Mbagou ewa i Daud.

Ana Manusia ‘Ana Manusia’ ei niala lako ri basa Aram to nipake tou nangkasangai korora – batuana “Yaku”. I Yesus mbii nampake sanga ee nangkasangai wotoNa, nanguli ane Iamo Mesias. Basa ee nialaNa lako ri awili to nampololita i Mesias ri rara Buku Dan. 7:13-14. Sumawee to nampobali i Yesus nanguncani sanga ee popakalusuNa nangkasangai wotoNa, noudamo iwee, isira to nantutuYa nipahara ane sanga ee patujuna nanguli i Mesias. Sanga ee nasimbei patujuna ante porapa-porapa ni Yesus nampakanoto ri to pantutuYa, ane Iamo Kristus. (Mat. 13:10-13).

Basa Aram Basa nipake ni Yesus eo-eona (Mrk. 5:41; 15:34). Tempo katuwua ni Yesus ri dunia, basa ei nipake to Israel najadi basara eo-eona. Basa Aram ei mbii naria katetokaiana ante basa Ibrani.

Buku Taurat Buku nanguli Parenta nu Allatala niweikaNa i nabi Musa bona natutu to Israel. Alima ngaya Buku ri Pojanji Nasae nitulisi ni Musa to nikasangai Buku Taurat.

Dua Bose Dua bose ei nabiasa nikasangai kusta. Tou nadua bose nipasimbaei ante tou to narumu. Tou nokakamu to nadua bose ei majadi marumu, jadi ane tou mambela dua ei, rapopeari ntani makawao lako ri pongataa. To Yahudi nanguli, nopakulisi to nadua bose ei nasimbei kasusana ante mampopemata to mate. Aga Allatala namala mampakaori dua bose. Atura-atura nanguli dua bose ei nitulisi ri rara Buku Bil. 5:1-3; Im. 12-14 pade Ul. 24:8.

Eo bete Roti Tado Niragii Eo Posusa nipowia to Yahudi, kasaena pitu eo, pitu mbengi, maopu Eo Paskah. Sumawee to Yahudi nangkondi roti tado niragii, sabana nampalinga totuara ngkoulu nesuwu lako ri Mesir nangkeni roti tado niragii. (Kalio Kel. 12).

Eo kasadiaa Eo jumaa, eo kasadiaa mopea Eo Peuntua to Yahudi. Eo Peuntua to Yahudi nambela ri eo sabtu. Ane to Yahudi nopamula nobila eona lako ri tinti aono kinowia.

Eo Paskah Eo posusa to Israel, nampatora pangkeni mpesuwura nu Allatala lako ri Mesir, sabana to Israel najadi batua ri ngata Mesir. Ri Eo Paskah ei, to Israel nampatora beiwa popatesi nu malaeka sumawee ana ulumbua to Mesir, pade nampalambaka ana ulumbua to Israel natuwu, sabana to Israel nogerei wombo nu soura ante raa nu bimba (Kel. 12:21-27). Tempo ee nipalambaka-ramo nu mbagou Mesir nesuwu lako ri ngata Mesir.

Eo Peuntua To Yahudi Eo pogambaraa pade peuntua to Yahudi. Ri Eo Peuntua ee tado mamala mowia nuapa-nuapa. Eo Peuntua to Yahudi eo kapapitu.

Farisi Farisi ei sabagia lako ri to Yahudi to neliu katigura ri parenta Buku Taurat to nitulisi ni Musa, kadeara maria aono njobu. Niulira isiramo to neliu lako ri tou ntanina ri ngayo nu Allatala. Farisi ei batuana “Nopatani”.

Hosana Hosana ei niala lako ri basa Aram, batuana “Pakasalamaka Pue”. Lako pamulana Hosana nibatuasi “Pakasalamaka eo ei”. Kasae-saea basa ei nipake to Yahudi ane mampotomu tou pade nipakera nangune tou. Noudamo iwee, Hosana ei mbii nipake ane mangune i Yesus ante Allatala.

Kareba Belo Kareba nanguli Allatala nowia dala mampakasalama tou najeko, bona matuwu ante Allatala duu-na masae-sae. Kareba to nanguli ane i Yesus Ana nu Allatala. Iamo Mesias to mampakasalama manusia lako ri jekora, ewa to nitipa pade nipoawili ri Buku Pojanji Nasae. (kalio Mrk. 1:14-15; 16:15-16).

Kurban to nitunu Ewua to nitunu nu Tobalia Bete ri Sou nu Allatala to nipajadi penomba si Pue Allatala. Ri tempo Pojanji Nasae, Allatala noparenta to nantutuYa mampopewei penombara, ewa motunu sambaa ewua. (Im. 1-7).

Malaeka nu Allatala Malaeka ei Inosa nipowia nu Allatala bona majadi suroNa. Malaeka ei tado ewa seta, bo tado mbii malaeka nto mate. Polence malaeka nu Allatala ei nadea ngaya, naria nolence ewa lence nu manusia. (kalio Mat. 28:2; Mrk. 1:13; 13:26-27; 16:5; Luk. 24:4).

Mbagou Bete Mbagou bete ei sanga nu mbagou Romawi to paramulana. Sanga ee mbii nipoposanga mbagou-mbagou to nancambeiya.

Mbagou nu Seta Mbagou nu Seta ei to nopasiromu seta-seta pade sumawee wao tuwu. Panguli to pande ri Buku Taurat, mbagou nu seta ei pamulana sadua lako ri malaeka nu Allatala. Agiana, apaa nangewa Allatala, etumo sabana niwura lako ri suruga. Mbagou nu Seta ei nikasangai i Beelzebul. Kakuasa ni Yesus neliu lako ri kakuasa Mbagou nu Seta. Pade ri kasudua nu dunia ei rasukuya duu-na masae-sae ri naraka ante sumawee to nantutuya. (Kej. 3:1-5;14:15; Luk. 11:15, 18; Yoh. 8:44; 2 Pet. 2:4; 1 Yoh. 3:8; Yud. 6; Why. 12).

Mesias Batuana “To nibokai nu lana zaitun.” Tou nipelisi nu Allatala mowia bagoNa ri dunia. (kalio 1 sam. 16:13). Tempo katuwua ni Yesus ri dunia, Mesias ei To Petolosi to nitipa ri rara Buku Pojanji Nasae, to nipopea nto Israel. (kalio Mrk. 8:29; 12:35; 14:61-62).

Nangkanene Allatala Ande maria tou manguli ia nasimbei ante Allatala, tou ee nangkanene Allatala. Nangkanene Allatala ei kakono-konona rasuku mate. (Im. 24:13-16; 1 Raj. 21:13).

Notampeasi rambu ntana ri paa Ande manculi to Yahudi lako ri ngata ntanina, kana ratampeasi ncalara rambu ntana to nentaka ri paa pade ri powarura pade mesua-rada ri ngatara. Sabana, niulira tou tado to Yahudi narumu. I Yesus nantudu ana-ana guruNa mowia nuanu nasimbei ante ada ee ri to Yahudi to tado nadota nantarima lolita nu Allatala bona rancanira karumura ri ngayo nu Allatala. (Mrk. 6:11; Kis. 18:6).

Petrus Pamulana i Petrus ei nisanga i Simon (Mrk. 3:16; Yoh. 1:42). Najadi-yapa ana guru ni Yesus, nisanga-yamo ni Yesus i Petrus, batuana “Watu naroso.” I Petrus ei nosarara ante i Andreas (Mrk. 1:29-30).

Pilatus Pilatus ei niongko nu Mbagou Bete Romawi najadi Gubernur, noparenta ri ngamba Yudea lako ri mpae rompulu aono duu-na ri mpae tolu mpulu aono Masehi. Ia ei to mamala mobotusi sumawee kara-kara ri ngamba Galilea, ngamba Samaria tudu ri ngamba Idumea.

Poparentaa nu Allatala Nasimbei ante Poparenta ri Suruga. Yema mamparisaya i Yesus, ia kana mesua ri rara Poparentaa nu Allatala. Batuana, Allatala majadi Mbagou ri dunia pade ri suruga. (Mrk. 4:26-32; 10:13-27; 12:26-34).

Saduki To pangkeni ri matana agama Yahudi. Isira ei kawule namparisaya alima Buku paramulana lako ri Pojanji Nasae to nisanga Buku Taurat ni Musa. To Saduki ei mbii tado niparisayara ande tou mamatemo matuwu nculi, pade tado nitarimara lolita nanguli katuwu nculi nu manusia lako ri kamatea.

Sesawi Sanga nu tinuda to natuwu ri ngata Israel, kalangkona neliu lako ri kalangko nu manusia ante tinuda ntanina. Agiana besana neliu kakodina lako ri besa nu tinuda ntanina.

Seta Sumawee seta bo wao tuwu nipajadi nu Allatala ewa malaeka to molayaniYa. Agiana, apaa nemo ewa etumo sabana niwura-ra lako ri suruga pade najadi nadaamo goura. Kakuasa ni Yesus neliu lako ri kakuasa nu seta bo wao tuwu, pade ane masudumo dunia ei sumawee seta pade wao tuwu rasuku duuna masae-sae ri rara nu naraka. (Mrk. 1:34; 3:11; 5:1-20; 9:14-29; Yak. 2:19).

Sou nu Allatala Sou nu Allatala ei tado naria ri ngata ntanina, aga saongu ngkola ri ngata bete Yerusalem. Sou nu Allatala ei nipake to Yahudi nangkeni kurban penombara ri Allatala.

Sou Penombaa To Yahudi Sou ei ri rara basa Yunani nisanga Sinagoge. Sou Penombaa ei niposambayai, meguru agama Yahudi pade rapogambarai ri Eo Peuntua. Sou Penombaa ei mbii nipake to Yahudi mobotusi ane maria kara-kara ri rara ngata. Nadea Sou Penombaa nipowia, sabana riumba maria sampulu baleilo to Yahudi masintobu mogambara, rapowia mbiira saongu sou isee.

Suro To nipelisi ni Yesus sampulu rodua mamporoaYa mowia bagoNa ri dunia, moparata Kareba Belo lako ri Allatala (Mrk. 3:14).

Topande ri Buku Taurat Sanga ei nipoposanga to pande ri Buku Taurat, alima ngaya Buku pamulana lako ri Potipa Nasae to nikasangai Taurat. To pande ri Buku Taurat ei, to nobatuasi, to nopaguru sumawee parenta pade ada to nitulisi ri Buku Potipa Nasae, parenta lako ri Allatala to nitulisi ni Musa (Kel. 20-31). Kalio to nitulisi nanguli to Farisi pade to Saduki.

To potangara Agama Yahudi Ri rara basa Ibrani nisanga Sanhedrin. Isira ei nasimbei ante tobalia ri matana, kadeara maria pitu mpulu bo sadua. Tempo katuwua ni Yesus, isira ei niparenta nu mbagou Romawi, i Pontius Pilatus (Mrk. 15:1-15; 16:64).

Tobalia To pangkeni agama Yahudi lako ri muli ni Harun. Bago nu Tobalia ei mangkeni kurban penomba ri Allatala (Kej. 28:1; Luk. 1:8-9).

Tobalia Bete Pangka bete ri rara agama Yahudi to neliu kakuasara. Isira ngkola to mamala mesua sampae sangkani ri rara kamara nagasa ri Sou nu Allatala mopasowa penomba nu tou-tou ntani ri Allatala (Im. 19:29-34; Mrk. 14:53-65).

Tobalia to Yahudi ri matana Tobalia to Yahudi ri matana ei, tou mobotusi sumawee kara-kara ri rara agama Yahudi.

Wao tuwu Sumawee seta bo wao tuwu nipajadi nu Allatala ewa malaeka to molayaniYa. Agiana, apaa ne'ewa etumo sabana niwurara lako ri suruga pade najadi nadaamo goura. Kakuasa ni Yesus neliu lako ri kakuasa nu seta bo wao tuwu, pade ane masudumo dunia ei sumawee seta pade wao tuwu rasuku duuna masae-sae ri rara nu naraka. (Mrk. 1:34; 3:11; 5:1-20; 9:14-29; Yak. 2:19).