Susa ponikaa ri Kana
2:1-11
2
1 Roeyo naliu naopu ee, naria susa ponikaa ri ngata Kana, ri ngamba Galilea, pade tina ni Yesus mbii naria isee. 2 I Yesus ante ana-ana guru-Na nikasowai mbii malou ri susa ponikaa ee. 3 Ranca-ra nosusa, naopumo anggur. Nanguli-mo tina ni Yesus si-Ya: “Naopu-mo anggur-ra.” 4 Nesono-mo i Yesus, “Tina, nuapa pade niuli-mu si Yaku? Tadopa tempona-Ku mampopakalio kuasa-Ku.” 5 Pade nangulimo tina-Na si sira to nelayani ri susa ee: “Powiamo sumawee nuapa to Na-uli si komi!” 6 Isee naria aono gumba bete to nipasadia rapamboli ue, rapopoelasi paa bo pale mantutu ada nto Yahudi. Butungkou gumba ee isina rapa-rapana saatu lite. 7 Nanguli-mo i Yesus si sira to nelayani ee: “Keisini-mo sumawee gumba etu ante ue.” Jadi nikeisini mpuu-ramo duuna naponu. 8 Naopu ee nanguli i Yesus si sira: “Tombumo saodi ue etu pade keni ri topoatoro susa.” Pade nikeni-ramo ue ee ri topoatoro susa ee. 9 Nipetomimo nu topoatoro susa ue to nobali najadi anggurmo ee. Tado nincani-na lako riumba anggur ee, kawule topotombu ue ngkola ee nanguncani. Naopu ee nipokio-namo pongante baleilo, 10 pade nangulikaka-ya: “Biasana tou nojuju anggur to nabelo ntoto ulu ncala, pade ande maosadamo sumawee torata manginu, pade rajujuda anggur to tado gaga nabelo. Agiana iko namboli anggur to neliu kabelona duuna ri tempo ei.” 11 Ee-mo kadupaa paramulana to nipowia ni Yesus. Kadupaa ee nipowia-Na ri ngata Kana ri ngamba Galilea. Ante kadupaa ee-Yamo nampopakalio kabete nu kuasa-Na. Jadi ana-ana guru-Na namparisaya-Ya.I Yesus ri Kapernaum
2:12
12 Naopu ee naloumo i Yesus ri Kapernaum noroa-roa ante tina-Na, sarara-sarara-Na, bo ana-ana guru-Na. Neari-ramo isee rarana basangkia eo.
I Yesus nopagasa Sou nu Allatala
2:13-25
13 Najungkupa Eo Bete Paskah nto Yahudi, naloumo i Yesus ri Yerusalem. 14 Ri karawaa Sou nu Allatala, nirata-Na topobalu japi, bimba, pade tonci banggebodo, pade naria mbii toposula doi noncunda isee. 15 Nipowia-Namo pesalapea lako ri kaloro, pade nowura sumawee binata ee, bimba bo japi to nibalu lako ri karawaa Sou nu Allatala. Pade nikalibantua mbii-Na meja nu toposula doi, nangkajadika doi-ra nokamburaka ri tana. 16 Pade niulikaka-Namo topobalu tonci banggebodo: “Ongko sumaweena ei lako isei. Nemo mi-pajadi sou pobalu-balua Sou nu Tuama-Ku!” 17 Jadi, nitoramo nu ana-ana guru-Na nuanu to nitulisi ri Buku Nagasa: “Pampotowe-Ku Sou-Mu, Pue, kana Ku-pomate.” 18 Topangkeni-topangkeni to Yahudi nangewa i Yesus. Nanguli-ra: “Powia kadupaa majadi pampetonondi-ka bakote Iko nakuasa mowia nuanu ewa ei.” 19 Nisonoi-ra ni Yesus: “Robomo Sou nu Allatala ei, pade rarana tolu eo ngkola Ku patindaki mpanculi.” 20 Nangulimo to Yahudi ee si-Ya: “Rarana aopo mpulu aono mpae nowia Sou nu Allatala ei, mala-mala Iko mowia rarana tolu eo ngkola?” 21 Agiana patuju ni Yesus nanguli Sou nu Allatala ee, nanguli koro dodo-Na. 22 Natuwu mpanculi-Yapa lako ri kamatea, nitoramo nu ana-ana guru-Na bakote nuanu ee nariamo niuli-Na. Jadi niparisaya-ramo nuanu to nitulisi ri Buku Nagasa bo nuanu to niuli ni Yesus.
23 Ranca ni Yesus ri Yerusalem sinungka Eo Bete Paskah to Yahudi, nadea tou najadi neparisaya si-Ya sabana nangkalio kadupaa-kadupaa to nipowia-Na. 24 Agiana i Yesus dodo tado namparisaya-ra, apaa nincani pura-rada ni Yesus. 25 Tado niparalou-Na tou mambei posabiti si-Ya nancambelai inggu nu manusia, apaa nincani dodo-Nada nuanu to naria ri rara nu manusia.