I Yesus nipemabose ri ngata Yerusalem
11:1-11
11
1 Pade nipapolamo ni Yesus ante ana-ana guru-Na polumako-ra,
narata-ramo najungku ri ngata Yerusalem pade neuntu ri bulu Zaitun najungku ngata Betfage pade ngata Betani.
Peuntu-ra nitudumo ni Yesus rodua ana guru-Na mokoulu,
2 pade nitetesi-Na:
“Malou komi ri ngata ri ngayo-ta emei,
pesua-mi ri ngata ee,
maria ngoni mi-kalio saongu keledai pagurua nitaka,
to tadopa naria nisawi nu tou.
Kakasimo keledai ee pade keni tumei.
3 Pade ande maria tou mampekutana komi nuapa sabana pade nikakasi-mi keledai etu,
mi-sonoi-ya:
‘I Pue namparalou,
Ia dodo-damo mampopanculi isei.’ ”
4 Nalou-ramo,
pade nirata-ramo saoungu keledai pagurua nitaka ri wombo wala ri soso dala.
Nikakasi-ramo keledai ee.
5 Pade basangkia dua tou naria isee nampekutana-ra:
“Hee,
nuapa nipowia-mi?
Nuapa pade nikakasi-mi keledai etu?”
6 Nesono-ramo ewa petetesi ni Yesus.
Pade nipalambaka-ramo nu tou-tou ee nangkeni keledai ee.
7 Karatara si Yesus nilampini-ramo kuntongo nu keledai ee ante powaru ndoe-ra,
naopu ee nencawimo i Yesus pade noncunda ri kuntongo nu keledai ee.
8 Nadea mbii tou nowente powaru ndoe-ra ri dala,
naria mbii tou ntanina notantare raa-raa ngkou notawa ri dala to niala-ra lako ri bonde.
9 Tou-tou nolumako nokoulu pade to petutu nopuri ri bengo ni Yesus nongare neune,
niuli-ra:
“Hosanaa!
‘Nipemabose-Yamo to narata ante kuasa ni Pue,’
10 Nitiroi-Yamo to marata meparentaa,
ewa poparentaa ni Daud tumpu-ta.
Nipemabosemo Allatala To Neliu Kalangkona!”
11 Kaopuana naratamo i Yesus ri ngata Yerusalem,
pade nesua ri karawaa Sou nu Allatala.
Isee nekamata-Yamo ntiku-ntikuna.
Apaa nalerumo,
nalou-Yamo ri ngata Betania noroa-roa ante sampulu rodua ana guru-Na.
I Yesus nampokaranalaka kou ara
11:12-14
12 Kaneilenapa,
ranca-ra nolumako lako ri ngata Betania,
naoromo i Yesus.
13 Lako nakawao-dapa nikalio-Na sampuu kou ara notawa narumbu.
Nalou-Yamo ri kou ee nangkalio ba naria wuana.
Agiana karata-Na ri puu nu kou ee,
tado namo nuapa nirata-Na,
aga tawa-tawa ngkolana,
sabana tempo ee tadopa uatuna kou ee mowua.
14 Pade nipokaranalakamo ni Yesus kou ara ee:
“Mopamula lako ri eo ei tado-mo maria saduaa tou mangkondi wuamu duu-na masae-sae!”
Ana-ana guru-Na namparonge lolita ee.
I Yesus nopagasa Sou nu Allatala
11:15- 19
15 Naopu ee narata-ramo ri ngata Yerusalem,
pade naloumo i Yesus ri karawaa Sou nu Allatala.
Isee-Yamo nowura sumawee topobalu-balu pade topangoli ri karawaa Sou nu Allatala.
Nikalibantua-Namo meja-meja nu toposula doi,
pade polanga-polanga nu topobalu tonci banggebodo nibalingkoa-Na.
16 Pade tado-mo nipaliu-Na tou nangkeni nuapa-pa moliu ri karawaa Sou nu Allatala ee.
17 Naopu ee nipatudukimo ni Yesus tou-tou isee.
Nanguli-Ya:
“Ri rara Buku Nagasa nitulisi ewa ei:
‘Sou-Ku kana rakasangai sou posambayaa nu sumawee tou ri wongko dunia.’
Agiana ikomi nopajadi pentabongoa nu tou nadaa!”
18 Tempo nu tobalia-tobalia ri matana pade topande ri Buku Taurat namparonge i Yesus nowia ewa ee nopamula-ramo nangonco dala bona mamala mopatesi-Ya.
Agiana naeka mbii-rada si Yesus,
apaa nadea tou nadonu mpuu pade namoleara namparonge pepatududiki-Na.
19 Moliwo madedipa,
nangkosumo i Yesus pade ana-ana guru-Na lako ri ngata ee.
Kou ara to nabangimo
Pepatuduki ni Yesus nancambelai sambaya
11:20-26
20 Sangkabaa-baa mpisi kaneilena,
tempo-ra nampaliu kou ara ee,
nikalio-ra puu nu kou ee nabangimo tudu ri lari-larina.
21 Pade nitoramo ni Petrus kajadia saeo naliu.
Pade nangulimo i Petrus si Yesus:
“Guru,
kaliomo!
Kou ara to nipokaranalaka-Mu ee nabangimo!”
22 Nesono i Yesus:
“Parisayamo Allatala.
23 Ku'ulikaka komi:
Kakono-konona mamalada komi mangulikaka bulu ei:
‘Kateongko-moko pade matetadi ri rara nu tasi!’
Nuanu ee kana rapowiaka komi,
asala tado morandua rara-mi,
pade mi-parisaya nuanu niuli-mi ee mpuu-mpuu kana madupa.
24 Etumo sabana toramo ei:
Ande mosambaya komi pade merapi sangaya-sangaya,
parisayamo nipasadiakamo komi nu Allatala nuapa to niperapi-mi ee,
pade ikomi kana mantarima.
25 Pade ande mosambaya komi,
agiana rara-mi tado masana ri tou ntanina,
ampungi ncala ulu tou ee,
bona Tuama-mu ri suruga mbii moampungi jeko-jeko-mu. [
26 Agiana ande tado madota komi moampungi tou ntani,
Tuama-mu ri suruga mbii tado madota moampungi jeko-jeko-mi.]”
Pepekutana nancambelai kakuasa ni Yesus
11:27-
27 Naopu ee nanculimo i Yesus ante ana-ana guru-Na ri ngata Yerusalem.
Ranca-Na nolumako nantoleliki karawaa Sou nu Allatala,
nameimo tobalia-tobalia ri matana,
topande ri Buku Taurat pade topangkeni-topangkeni to Yahudi si Yesus.
28 Pade nipekutana-ramo i Yesus:
“Ante kuasa nuapa-Ko nowia sumawee nuanu etu?
Yema to nambei-Ko kuasa ee,
nangkajadika namala-Ko nowia nuanu etu?”
29 Nesono i Yesus:
“Yaku mbii madota mampekutana komi.
Mi-sono ncala ulu pade Ku'ulikakada komi ante kuasa ni yema-Ku nowia sumawee nuanu ei.
30 I Yohanes nebaptis ante kuasa ni yema,
ante kuasa nu Allatala-da ba kuasa nu manusia-da?”
31 Naopu ee nombepekutana dodomo tobalia-tobalia ri matana pade topangkeni-topangkeni to Yahudi.
Nanguli-ra:
“Ande ta-uli,
‘Ante kuasa nu Allatala,’
Naulimo ngoni,
‘Nuapa pade tado niparisaya-mi i Yohanes?’
32 Agiana nakaja mbii ande ta-uli:
‘Ante kuasa nu manusia.’
Sabana naeka mbii-rada ri tou dea,
apaa sumawee tou namparisaya bakote i Yohanes ee mpuu-mpuu nabi.”
33 Jadi nesono-ramo:
“Tado nincani-ka.”
Pade nangulimo i Yesus si sira:
“Ande iweetu wea,
Yaku mbii tado madota mangulikaka komi ante kuasa ni yema-Ku nowia sumaweena ee.”