Pepekutana nancambelai kuasa ni Yesus
20:1-8 `
20
1 Sauatu eo, i Yesus ranca-Na nepatuduki pade nampopowole Kareba Belo lako ri Allatala ri tou dea ri rara Sou nu Allatala. Tobalia-tobalia ri matana, topande-topande ri Buku Taurat ante topangkeni-topangkeni to Yahudi narata, 2 pade nanguli si Yesus: “Uli si kami ante kuasa nuapa pade namala-Ko nowia sumawee ei? Yema nambeikaka-Ko kuasa ee?”3 Nisonoi-ra ni Yesus: “Yaku mbii madota mampekutana komi. Ulikaka-Ku, 4 i Yohanes nebaptis ante kuasa ni yema? Ante kuasa nu Allatala-da ba kuasa nu manusia-da?”
5 Pade nopasaongu wotu-ramo: “Ande ta-uli ante kuasa nu Allatala, Naulimo ngoni: Ande iweetu wea, nuapa pade tado niparisaya-mi Ya?’ 6 Agiana ande ta-uli, ante kuasa nu manusia, sumawee tou kana mowunu-ta ante watu, apaa isira namparisaya i Yohanes ee sadua nabi.” 7 Jadi nesono-ramo: “Tado nincani-ka.”
8 Pade nangulimo i Yesus si sira: “Ande iweetu wea Yaku mbii tado madota manguli si komi ante kuasa ni yema Ku-nowia sumawee ei.”
Porapaika nancambelai topobago-topobago bonde anggur
20:9-19
9 Naopu ee niulimo ni Yesus porapaika ei ri tou-tou ee: “Nariamo sadua to nampotudai bonde anggur. Nipopesewa-namo bonde ee ri basangkia dua topobago pade neongko-yamo nalou ri ngata ntanina pade neari nasae radou. 10 Narata-pa tempona rapuputimo wua nu anggur ee, nitudumo nu tumpu bonde ee batuana malou ri topobago-topobago ee bona mangala bagia-na. Agiana topobago-topobago bonde ee nonampa batua ee pade nantudu nculi-ya ante palengkaloa-na. 11 Naopu ee nitudu mbiimo nu tumpu bonde ee sadua batua ntani-na. Agiana batua ee mbii ninampa nu topobago-topobago bonde ee, pade nipakaeya-ra, pade nitudu nculi-ra ante palengkaloa-na. 12 Naopu ee nitudu mbiimo nu tumpu bonde ee batua-na katotoluna. Agiana batua ee mbii ninampa nu topobago-topobago bonde ee, pade nitadi-ra ri sawaliku nu bonde ee.
13 Kaopuana nangulimo tumpu bonde ee: Nuapa-pa to kana kupowia? Kana kutudumo ana dodo-ku to nipotowe-ku. Tantu ia kana rabila-ra!
14 Agiana nikaliopa nu topobago-topobago bonde ee ana nu tumpu bonde ee, nombeulikaka-ramo: Ei-yamo to mancosora bonde ei. Kamei-tamo mopatesi-ya, bona ikita-damo to mancosora bonde ei! 15 Pade nidisimpokoe-ramo ana ee ri sawaliku nu bonde ee pade nipatesi-ra.”
Pade nepekutanamo i Yesus: “Ande manculipa tumpu bonde ee, nuapamo to kana na-powia ri topobago-topobago bonde ee? 16 Tantu ia kana marata pade mopatesi topobago-topobago bonde ee, pade na-weimo bonde ee ri topobago-topobago ntanina.”
Namparonge ee, nangulimo tou-tou si Yesus: “Tado mamala ewa ee!”
17 Niolole-ramo ni Yesus pade niuli-Namo: “Ande iwetu wea, nuapa batua nuanu to nitulisi ri rara Buku Nagasa ei?:
Watu to nitadi nu basi
najadi parawatu to niparalou ntoto-mo?
18 Sumawee tou to manawu ri watu ee kana marogatei, pade yema to naparuncu nu watu ee kana marututei.”
19 Topande-topande ri Buku Taurat pade tobalia-tobalia ri matana nincani-rada bakote porapaika ee niwunuka ni Yesus si sira. Eemo sabana pade madota-ra mosoko i Yesus tempo ee mbii, agiana naeka-ra ri tou dea.
Nancambelai pobayari balasitee ri Mbagou Bete
20:20-26
20 Topande-topande ri Buku Taurat pade tobalia-tobalia ri matana nangonco loga-ra to nabelo. Pade nibayari-ramo tou bona mabelo wongko, pade nantudu tou-tou ee mopanawu i Yesus ante pepekutana-pepekutana, bona mamala-ra mambei i Yesus ri kakuasaa nu gubernur. 21 Pade tou-tou to nibayari ee nanguli si Yesus: “Guru, nincani-kada sumawee nuanu to niuli-Mu pade to nipopepatudukii-Mu etu nakono. Nincani mbii-kada Iko nepatuduki ante kakonoana nancambelai dota nu Allatala ri manusia, apaa Iko tado nampelisi tou. 22 Ee-mo sabana, ulikaka-ka: Mantutu atura nu agama-ta, mamala-da mobayari balasitee ri Mbagou Bete ba tado?”
23 Agiana nincani-da ni Yesus akala-ra, pade niuli-Namo si sira: 24 “Popakakalioka-Ku sampeka doi pera. Gambara pade sanga ni yema ei?”
Nesona-ra: “Gambara pade sanga nu Mbagou Bete!”
25 Nanguli i Yesus si sira: “Ande iweetu wea, weimo ri Mbagou Bete nuapa to najadi bagia-na, pade weimo ri Allatala nuapa to najadi bagia-Na.” 26 Ri ngayo nu tou dea ee, tado namo sangayaa kasalaa ni Yesus nirata-ra. Namoleara-ramo namparonge sono-Na ee pade nalino dodo-ramo.
Pepekutana nu to Saduki nancambelai katuwu mpanculi
20:27-39
27 Nameimo basangkia dua to Saduki si Yesus. Isira ei tou to tado namparisaya bakote tou namatemo mamala matuwu mpanculi. Nipekutana-ramo i Yesus: 28 “Guru, i Musa notulisi parenta ei si kita: Ande sadua baleilo mamate pade tado noana-ya, sarara-na kana mampobangkele balu nu sarara-na bona maria muli nu sarara-na to namate ee. 29 Nariamo tou papitu nosarara paka baleilo. To ulumbua-na nobangkele, agiana namate pade tado noana. 30 Pade tuei-na karoduana nampobangkele balu nu tuaka-na ee, agiana ia mbii namate pade tado noana. 31 Nuanu ee najadi oa ri sarara-na katotoluna duu-na ri sarara-na kapapituna. 32 Kaopuana bangkele ee mbii namate. 33 Ri eo katuwu mpanculi ntomate, birantua ni yema bangkele ee? Apaa isira papitu ee nampobangkele pura-yamo.” 34 Nesono i Yesus si sira: “Tou-tou natuwu ri dunia ei kana moncamboko, 35 agiana tou-tou to kana rapatuwu mpanculi lako ri kamatea-na pade matuwu ri eo ngkapurina ngoni isira tadomo moncamboko. 36 Inggu-ra ewa malaeka nu Allatala, to tadomo mamala mamate. Isira eemo ana-ana nu Allatala, apaa isira nipatuwu nculimo lako ri kamatea-ra. 37 I Musa dodomo to nopanotosi ande tou mamate kana rapatuwu mpanculi. Ri rara nu tulisia-na nancambelai kawoko mporui to nengkalalaa ee ia nokasangai i Pue ee: Allatala ni Abraham, Allatala ni Ishak pade Allatala ni Yakub. 38 Allatala ee tado Allatala nu tomate, agiana Allatala nu tou natuwu, apaa ri ngayo-Na sumawee tou natuwu.”
39 Namparonge ee basangkia dua topande ri Buku Taurat nanguli: “Guru, sono-Mu etu nakono mpuu-da!” 40 Eemo sabana tadomo nabia-ra nampekutana banuapa-pa si Yesus.
Katetokaiya ni Yesus pade i Daud
20:41-44
41 Naopu ee nipekutana-ramo ni Yesus: “Beiwa mbii pade mamalamo rauli Mbagou Topepakasalama ee muli ni Daud? 42 Bo ee i Daud dodomo nanguli ri rara nu buku Mazmur:
I Pue Allatala nanguli si Pue-ku:
Poncundamo mbiira ri ngkana-Ku,
43 duuna kupowia bali-bali-Mu matundu si-Ko.
44 Ande i Daud dodo nanguli bakote Mbagou Topepakasalama ee i Pue, beiwa mbii pade niulimo Ia muli ni Daud?”
I Yesus nepatuduki bona mainga ri topande-topande ri Buku Taurat
20:45-47
45 Ranca nu tou-tou namparonge i Yesus nololita, niulikaka-Namo ana-ana guru-Na: 46 “Mainga-da komi ri topande-topande ri Buku Taurat. Nipobelo-ra nolulumako ante powaru ndoe-ra, pade madota rabila ri potomu. Nipobelo-ra poncundaa to nibila ri rara sou penombaa pade ri posusaa. 47 Isira nampabagiu tobalu-tobalu pade norampaki sou-ra. Pade bona motalendusi kadaa nu inggu-ra ee, nosambaya-ramo nipakalanga-langa-ra. Isira ee kana mantarima suku to mantomo mpuu.”