Yohanes i

Kareba Belo to nitulisi

Ni Yohanes

Popamulana

Buku ei nitulisi nu ana guru to nipotowe ni Yesus. Ia dodomo to nangkalio mata sumawee kajadia to nipololita ri rara buku ei. (Pasal 21:24). Nadea topande nanguli bakote ana guru to nipotowe ei i Yohanes.

Ri rara buku ei, i Yesus niuli “Lolita nu Allatala.” Ia-mo to nitudu nu Allatala mamei ri dunia mewali manusia pade matida riolo nu manusia. Patuju nu buku ei nitulisi bona sumawee topobasa lolita ri buku ei mamala mamparisaya i Yesus, Ana nu Allatala, Mbagou Topepakasalama, pade bona ratarima-ra tuwu liu-liu duuna masae-sae (20:31).

Lako ri pasal 2 duuna ri pasal 12 nampololita papitu ngaya kadupaa to nipowia ni Yesus. Kadupa-kadupaa ee nopanotosi bakote i Yesus mpuu-mpuu Mbagou Topepakasalama to nakuasa. Butu ngkani nipololita kadupaa, nipololita mbii pepatuduki ni Yesus ri tou dea. Patuju ni Yesus nowia kadupaa ee, nipanotosi ri rara nu pepatuduki-Na. Nangkalio kadupaa-kadupaa ee, naria tou namparisaya i Yesus pade najadi topantutu-Ya, agiana naria mbii tou to nesapuaka pade tado nadota namparisaya-Ya. Nadea mpuu topangkeni to Yahudi to nangewa-Ya.

Ri pasal 13 duuna ri pasal 17 naria lolita ni Yesus ri ana guru-Na kawengina tempo tadopa nisoko-Ya. Ia nopatuduki-ra bo nampakaroso rara-ra. Ri pasal 18 duuna ri pasal 21 nampololita posoko i Yesus, potangara-Ya, popatesi-Ya, pade katuwu mpanculi-Na lako ri kamatea.

Kareba Belo to nitulisi ni Yohanes ei nampololita tuwu liu-liu duuna masae-sae to nopamula lako ri tempo ei. Nadea porapaika nipake ri buku ei bona mopanotosi tuwu liu-liu ee pade nopatosi pombencani-ta ante i Yesus. I Yesus nirapaika ewa ue to nambei katuwua, nirapaika ewa roti, ewa kabaasana, ewa dala, ewa topoewu nabelo, nirapaika ewa puu nu anggur pade ntani-ntanina.

Isi nu buku

Popamulana (1:1-18)

I Yohanes Topebaptis pade ana guru ni Yesus paramulana (1:19-51)

Pobago ni Yesus ri ngayo nu tou dea (Pasal 2 duuna pasal 12)

Pepatuduki ni Yesus ri ana-ana guru-Na (Pasal 13 duuna pasal 17)

I Yesus namate ri kou salib pade natuwu mpanculi ri eo katolueona (Pasal 18 duuna pasal 21)