24:1-12
24
1 Ri eo Minggu, sangkaba-baa mpisi, naloumo bangkele-bangkele ee ri dayo nangkeni rampa-rampa to nipasadia-ra ee. 2 Nirata-ra watu powunta dayo ee, nadulimo. 3 Pade nesua-ramo ri rara dayo ee. Nikalio-ra tadomo naria bata ni Yesus isee. 4 Ranca-ra nokongkore isee pade neingu nampekiri, ncamole-mole nariamo tou rodua nokongkore ri siawe-ra nampake powaru nerangkila. 5 Naeka mpuu-ra pade notumpa-ramo. Agiana tou rodua ee nanguli: “Nuapa komi pade nioncomimo to natuwu riolo ntomate? 6 Tadomo naria-Ya isei. Natuwu nculi-Yamo. Mi-tora nuapa to niuli-Na si komi tempo-Na ri Galilea: 7 Apaa Yaku, Ana Manusia kana rawei ri tou to najeko pade rasalibkan. Pade matuwu mpanculi-Ku ri eo katolu eona.’ ” 8 Pade nitora-ramo lolita ni Yesus tempo ee.9 Panculi-ra lako ri dayo ee, nipatuntu-ramo sumawee kajadia ee ri sampulu sadua suro-suro ni Yesus pade ri sumawee topetutu ntanina. 10 Bangkele-bangkele eemo to nanguli ri suro-suro ee. Isira eimo, i Maria Magdalena, i Yohana pade i Maria tina ni Yakobus, pade bangkele-bangkele ntanina to noroa ante isira. 11 Agiana suro-suro ee tado namparisaya nuanu to niuli nu bangkele-bangkele ee, apaa tado nesua ri pekiri-ra.
12 Noudamo iwee i Petrus nembangu pade nagasi-gasi nokumbeno nalou ri dayo. Karata-na ri rara nu dayo ee, nikalio-na kawule pobungu bata ni Yesus damo isee. Namoleara mpuu i Petrus, pade nanculi ante nadea pepekutana ri rara-na nancambelai nuapamo to najadi.
I Yesus nampopesuwu koro-Na ri dala malou ri Emaus
24:13-35
13 Ri eo ee mbii, rodua topantutu i Yesus nolumako nalou ri saongu ngata to nisanga Emaus, rapa-rapana sampulu sakilo kawaona lako ri Yerusalem. 14 Pade nombepololitaka lako-ramo nancambelai sumawee nuanu to najadi ee. 15 Bula-ra nololita pade nombepepekutana, naratamo i Yesus dodo pade nolumako noroa-roa ante isira. 16 Nikalio-rada i Yesus, agiana naria to nampalawa mata-ra, nangkajadika tado nincanira-Ya. 17 Pade nangulimo i Yesus si sira: “Nuapa to nipololita-mi ranca-mi nolumako ei?”
Neuntu-ramo ante susa rara. 18 Naopu ee sadua lako ri tou rodua ee, to nisanga i Kleopas, nampekutana i Yesus: “Ba sadua ngkola-Mu ei-damo torata ri Yerusalem to tadopa nanguncani kajadia nuapa to najadi basangkia eo naliu ei?” 19 Nesono i Yesus: “Kajadia nuapa?”
Nesono-ra: “Kajadia to najadi si Yesus to Nazaret ee. Ia ee sadua nabi. Lolita-lolita-Na pade sumawee nuanu nipowia-Na nakuasa mpuu ri pangkalioa nu Allatala pade pangkalioa nu sumawee tou. 20 Agiana tobalia-tobalia ri matana pade topangkeni-topangkeni-ka nambei-Ya bona rasuku mate pade isira mbii nosalibkan-Ya. 21 Bo ee nisarumaka-ka Ia-mo to kana mampakabebasi to Israel. Pade eo ei kaganana tolu eo-mo naliu lako ri kajadia ee. 22 Agiana basangkia dua bangkele lako riolo-ka nampakabatoro-ka. Sangkabaa-baa mpisi-ra nalou ri dayo-Na, 23 agiana tado naria nirata-ra bata-Na isee. Naopu ee nanculi-ramo pade nanguli bakote naria nikalio-ra malaeka nu Allatala, pade malaeka-malaeka ee nanguli bakote i Yesus natuwu mpanculi. 24 Basangkia dua roa-ka nalou ri dayo ee pade nirata-ra sumawee to niuli nu bangkele-bangkele ee nakono mpuu, agiana tado naria nikalio-ra i Yesus.”
25 Pade nangulimo i Yesus si sira: “Nadoyo mpuu-da komi! Nawewe mpuu komi namparisaya sumawee to niuli nu nabi-nabi! 26 Mbagou Topepakasalama to nitipa nu Allatala kana mangkolo sumawee kapepaa ncala pade rapemabose-Yada” 27 Naopu ee nipanotosimo ni Yesus si sira nuapa to nitulisi ri rara Buku Nagasa nancambelai koro-Na, nopamula lako ri tulisia ni Musa pade sumawee tulisia nu nabi-nabi ntani-na.
28 Najungku-ramo ri ngata Emaus, pade i Yesus ei ewa to madota mopapola polumakoa-Na. 29 Agiana nipatetaa-ra Yamo, nanguli-ra: “Pearimo-Ko ulu isei moroa ante ikami, apaa nakinowiamo ei, bo nalerumo.” Pade nesuamo i Yesus bona masambengia ri sou-ra. 30 Ranca-Na noncunda nangkondi noroa ante isira, nialamo ni Yesus roti, pade nosukuru ri Allatala, naopu ee nitibe-tibe-Na, pade niwei-Na si sira. 31 Naopu ee nanotomo rara-ra bakote i Yesus-da ee. Agiana nalipo-Yamo lako riolo-ra. 32 Pade nombeulikaka-ramo: “Nasagena mpuu rara-ta tempo-Na nampololitaka-ta ri tongo dala ee see, pade popanotosi-Na isi nu Buku Nagasa si kita.”
33 Bulawee ee mbii neongko-ramo nanculi ri Yerusalem. Isee nirata-ra sampulu sadua ana guru ni Yesus ranca-ra notobu ante topantutu-topantutu Yesus to ntanina. 34 Nanguli-ra ri tou rodua ee: “Nakono mpuu-da i Pue natuwu mpanculi! Nipopesuwu-Namo koro-Na si Simon!”
35 Pade tou rodua ee mbii nopatuntu nuapa to najadi ri tongo dala, pade beiwa panguncani-ra i Pue tempo-Na notibe-tibe roti.
I Yesus nampopesuwu koro-Na ri sumawee ana guru-Na
24:36-49
36 Ranca-ra nololita-dapa, ncamole-mole nokongkoremo i Yesus ri tongo-tongo-ra pade nanguli: “Masanamo komi!”
37 Nabatoro-ramo pade naeka, apaa niuli-ra nangkalio seta-rada. 38 Agiana nanguli-Ya si sira: “Nuapa pade naeka komi? Nuapa pade norandua rara-mi? 39 Kalio pale-Ku bo paa-Ku. Yaku dodomo ei. Kakamumo pade kalio, apaa seta tado noisia bo nodongkea, ewa to nikalio-mi si Yaku ei.” 40 Ranca ni Yesus nololita, nipopesuwu lako-Namo pale-Na bo paa-Na si sira. 41 Pade bula-ra tadopa namparisaya apaa nadonu gaga pade namoleara, nepekutanamo i Yesus si sira: “Naria nuanu mamala rakondi eirilou?” 42 Pade niweikaka-ra Ya-mo sampua bou nisole. 43 Nialamo ni Yesus bou ee, pade nikondi-Na ri ngayo-ra.
44 Naopu ee nanguli-Yamo si sira: “Eimo nuanu to niuli-Ku si komi bula-Ku naria-dapa namporoa komi: Sumawee nuanu to nitulisi nancambelai-Ku ri rara Buku-buku ni Musa, ri tulisia nu nabi ntanina, pade ri buku Mazmur, kana rapadupa.” 45 Pade nipakanotomo ni Yesus pekiri-ra bona rancani-ra patuju Buku Nagasa. 46 Pade nanguli-Yamo si sira: “Ri rara Buku Nagasa naria nitulisi: Mbagou Topepakasalama kana mangkolo kapepaa, pade kana matuwu nculi lako ri kamatea ri eo katolu eona. 47 Pade ante kuasa-Ku kana rapopowole ri sumawee manusia, isira kana mancoro lako ri jeko-jeko-ra, bona Allatala moampungi jeko-ra. Pade kareba ee kana rapopowole mopamula lako ri Yerusalem. 48 Ikomimo sabi-sabi nu sumaweena ee. 49 Pade Yaku dodo kana mopakatu si komi nuapa to nitipamo nu Tuama-Ku. Agiana ikomi kana matida ri ngata ei duuna kuasa lako ri Allatala marata mokuasai komi.”
I Yesus nateongko ri suruga
24:50-53
50 Naopu ee nikeni-ramo ni Yesus nesuwu lako ri ngata ee duuna najungku ri Betania. Isee-Ya no'ongko pale-Na, pade nantiroi-ra. 51 Ranca-Na nantiroi-ra, nateongko-Yamo ri suruga, pade nampogaaka-ra. 52 Notumbukotu-ramo nampenombai-Ya, naopu ee nanculi-ramo ri Yerusalem ante nadonu mpuu, 53 pade nangune oa-ramo Allatala ri karawaa Sou nu Allatala.