I Yesus ri ngayo ni Pilatus
23:1-7
23
1 Sumawee topolibu ee nokongkore, pade nangkeni i Yesus ri ngayo ni Pilatus. 2 Isee nopamula-ramo norei-Ya, nanguli-ra: “Nirata-ka Tou ei nampakapusa tou dea. Pade nopatuju tou dea bona nemo mobayari balasitee ri Mbagou Bete, pade nancambelai koro-Na niuli-Na, Ia-mo to nipelisi nu Allatala, sadua Mbagou.”3 Pade nepekutanamo i Pilatus si Yesus: “Nakono-Ko Mbagou to Yahudi?”
Nesono i Yesus: “Ewa panguli-mu etu.”
4 Pade nangulimo i Pilatus ri tobalia-tobalia ri matana pade ri tou dea ee: “Tado naria nirata-ku sangayaa kasalaa ri Tou ei bona rasuku-Ya.”
5 Agiana naroso ntotopa noa-ra: “Ante pepatuduki-Na, nopatuju tou ri sumawee ngamba Yudea, nopamula lako ri Galilea duuna narata isei!”
6 Pamparonge ni Pilatus lolita ee, nepekutana-yamo: “To Galilea tou ei?” 7 Niulipa i Yesus ei lako ri ngamba to nikuasai ni Herodes, nipakatumo ni Pilatus i Yesus si Herodes, to tempo ee mbii naria-ya ri ngata Yerusalem.
I Yesus ri ngayo ni Herodes
23:8-12
8 Nasana mpuu rara ni Herodes nangkalio i Yesus, apaa nasaemo nironge-na sumawee nuanu nancambelai i Yesus, pade madota mangkalio-Ya. Nisarumaka-na mamala na-kalio i Yesus mowia kadupaa. 9 Eemo sabana pade nadeamo pepekutana ni Herodes si Yesus. Agiana tado namo nisonoi-ya ni Yesus. 10 Tobalia-tobalia ri matana pade topande ri Buku Taurat namei mbii isee pade namparei oa i Yesus. 11 I Herodes pade basangkia dua surodado-na nampopowadi-wadi bo nangkanene i Yesus, pade nopasuaka-Ya powaru nabelo mpuu, naopu ee nopakatu nculi-Ya si Pilatus. 12 Ri eo ee mbii i Herodes pade i Pilatus to nombepodaa ee mpia, nowega mpanculi-ramo.
I Yesus nanculiki ri ngayo ni Pilatus
23:13-25
13 Nipasintobumo ni Pilatus tobalia-tobalia ri matana pade sumawee topangkeni to Yahudi bo todea, 14 pade nanguli si sira: “Nikeni-mi Tou ei si yaku pade nanguli Ia nampakapusa tou-tou. Nikalio dodo-mimo bakote nipekutana-ku Yamo, agiana tado naria sangayaa kasalaa ewa to nireika-mi Ya. 15 Iwee mbii i Herodes, apaa ia mbii nopakatuki nculi i Yesus si kami. Tou ei tado nampowia namo sangayaa to masipato bona rasuku mateka-Ya. 16 Etumo, kutududamo tou mosalapea-Ya, pade kupakabebasi-Yada.”
17 [Apaa butu Eo Paskah, i Pilatus kana mampakabebasika tou dea sadua to nitarungku.] 18 Sumawee tou to notobu isee nongare: “Patesi-Ya! Pakabebasika-ka i Barabas!” 19 I Barabas ei nitarungku ami-yamo, apaa nampakagesoa ngata pade nepatesi. 20 Sangkani mbiipa i Pilatus nololita ante wotu narimboso si sira, apaa ia madota mampakabebasi i Yesus. 21 Agiana tou dea ee nongare: “Salibkan-Yamo! Salibkan-Yamo!”
22 Pade nanguli mbiimo i Pilatus katolungkanina si sira: “Agiana nuapa kasalaa-Na? Tado namo sangayaa nirata-ku kasalaa-Na to masipato bona rasuku mate ka-Ya. Kusalapea-Yadamo pade kupakabebasi-Yada.”
23 Agiana narimboso mbiipa pongare-ra oa nanguli bakote i Yesus kana rasalibkan. Kaopuana pongare-ra ee nedagi. 24 Naopu ee nibotusi ni Pilatus bona rasuku mate i Yesus nantutu dota nu tou dea isee, 25 pade nampakabebasi tou to niperapi-ra, tou to nitarungku apaa nampakagesoa ngata pade nepatesi. Agiana niwei-namo i Yesus si sira bona rapowia-ra mantutu dota-ra.
I Yesus nikeni bona rasalibkan
23:26-32
26 Pade nikeni-ramo i Yesus. Ri tongo dala, nipotomu-ramo sadua tou to nisanga i Simon, tou lako ri Kirene, bula-na mesua ri rara ngata. Nisoko-ra yamo, pade nitudu-ra mesimbu salib ri bengo ni Yesus.
27 Nadea tou netutu nolumako ri bengo ni Yesus, riolo nu tou dea ee naria mbii basangkia dua bangkele. Bangkele-bangkele ee nampokeosi pade nantumangisi i Yesus. 28 Agiana neilimo i Yesus si sira pade nanguli: “Bangkele-bangkele ri Yerusalem, nemo mipokeosi-Ku, pokeosimo koro dodo-mi pade ana-ana-mi. 29 Apaa marata dodo-da tempona tou kana manguli: Nountu mpuu bangkele-bangkele to tado naria notiana, to tado noana pade to tadopa naria nopasusu ana kodi. 30 Tempo ee mbiimo ngoni tou kana manguli ri bulu-bulu: Parumpisi-kamo, pade iwu-kamo! 31 Sabana ande ri kou to natuwudapa, nipowia nu tou-tou ewa eimo, nuapa mbii to kana rapowia-ra ri kou to nabangi-moa?”
32 Naria mbii rodua tou ntani. Tou rodua ee tou daa to nikeni-ra bona rasuku mate moroa ante i Yesus.
I Yesus nisalibkan
23:33-38
33 Karata-ra ri bulu to nisanga Dongke Woo, nisalibkan-ramo i Yesus ante rodua tou daa ee, sadua mbira ri ngkana pade sadua mbira ri ngkabeo ni Yesus. 34 Pade nosamba-yamo i Yesus: “Oo Tuama, ampungi-ramo, apaa tado nincani-ra nuapa to nipowia-ra.”
Pade noundi ncala-ramo, bona matatapu yema to mamparata powaru ni Yesus. 35 Tou-tou to nokongkore isee nangkalio sumaweena. Pade topangkeni-topangkeni to Yahudi nangkanene i Yesus ante lolita: “Tou ntani nipakasalama-Na, palambaka-Ya tempo ei mampakasalama koro dodo-Na, ande nakono mpuu Ia ei Mbagou Topepakasalama to nipelisi nu Allatala.”
36 Surodado-surodado mbii nokanene-Ya. Namei-ramo pade nambei anggur podi si Yesus, 37 ante nanguli: “Ande Iko ei mbagou to Yahudi, pakasalamamo koro-Mu!” 38 Ri wumbu woo ni Yesus ri salib-Na, naria tulisia nipataka:
“Eimo Mbagou to Yahudi.”
39 Sadua lako ri tou daa to nisalibkan isee nangkanene i Yesus. Nanguli-yamo: “Apa tado Mbagou Topepakasalama-Ko ei? Pakasalamamo koro-Mu bo ikami!”
40 Agiana tou daa to saduana nangontika roa-na, niuli-na: “Tado naeka-ko ri Allatala? Iko etu mbii nisuku mate ewa Ia edou. 41 Ikita ei masipato ami rasuku mate, sabana ikita nantarima balasia to nasimbei ante nuanu nipowia-ta. Agiana Ia ei tado naria kasalaa-Na!” 42 Pade nanguli-yamo: “Yesus, toraku-da ande marata-Ko majadi Mbagou!” 43 Nanguli i Yesus ri tou ee: “Parisayamo, eo ei mbii iko moroa ante i Yaku ri Firdaus.”
I Yesus namate
23:44-49
44 Tempo ee rapa-rapana tinti sampulu rongu, sumawee ngamba ee nadedi mbongo duu-na ri tinti tolu kinowiana, 45 apaa eo tadomo neindo. Powide ri rara nu sou nu Allatala nogaa ntongo. 46 Pade nongaremo i Yesus ante wotu narimboso : “Oo Tuama, ri rara mpale-Mu Ku-wei inosa-Ku!” Naopu nanguli ewa ee, namate-Yamo. 47 Pangkalio nu tadulako nuanu to najadi ee, niune-namo Allatala. Nanguli-ya: “Nakono mpuu-da, tado naria kasalaa-Na!”
48 Tou dea to namei nosintobu isee, nangkalio nuapa to najadi ee. Nanculi pura-ramo ante notitimbolu lako koro-ra apaa nancoso rara mpuu. 49 Pade sumawee tou to nanguncani i Yesus, ante bangkele-bangkele to nantutu-Ya lako ri Galilea, nokongkore ri kakawaoaana pade nangkalio sumaweena ee.
I Yesus nipatana
23:50-56a
50 Naria sadua tou nisanga i Yusuf. Ia ei sadua lako ri Topotangara Agama Yahudi, pade to nabelo bo nanoa. 51 Tado nipomakono-na botusia pade nuanu nipowia nu topotangara agama ee. Ia ei lako ri ngata Arimatea ri ngamba Yudea, pade nampopea tempo-na Allatala mopamula moparenta majadi Mbagou. 52 Nalou-yamo nampotomuka i Pilatus, pade nerapi bata ni Yesus. 53 Naopu ee nisomponaka-namo bata ni Yesus lako ri salib, pade nisompui-na ante kae linen. Naopu ee nidule-na ri dayo to nipowia ri rara bulu watu. Dayo ee tadopa naria nipotanai tomate. 54 Eo ee, eo kasadiaa to Yahudi, pade mapara mopamulamo Eo Peuntua to Yahudi.
55 Pade bangkele-bangkele to namei noroa ante i Yesus lako ri Galilea, nantutu i Yusuf pade nangkalio dayo ee. Isira mbii nangkalio beiwa podule bata ni Yesus ri rara nu dayo ee. 56a Naopu ee nanculi-ramo pade nopasadia rampa-rampa bo lana wongi bona rapopolanai-ra bata ni Yesus.
Katuwu mpanculi ni Yesus
23:56b
56b Pade ri Eo Peuntua to Yahudi, neuntu-ramo nantutu parenta ni Musa.