Liwo mopatesi i Yesus
22:1-2
22
1 Eo Bete Roti Tado Nampake Ragi to niuli Eo Paskah najungkumo. 2 Tobalia-tobalia ri matana pade topande ri Buku Taurat nangonco akala bona mamala mopatesi bongo-bongo i Yesus, apaa naeka-ra ri tou dea.I Yudas nampobalu i Yesus
22:3-6
3 Pade nesuamo Mbagou nu Seta si Yudas to nisanga mbii i Iskariot, sadua lako ri sampulu rodua ana guru ni Yesus. 4 Eemo sabana pade naloumo i Yudas nolibu ante tobalia-tobalia ri matana pade tonokapalani topojaga Sou nu Allatala nancambelai beiwa kamalana mampobalu i Yesus si sira. 5 Nasana mpuu rara-ra pade notipa-ramo mambeikaka-ya doi. 6 Nipomambelamo ni Yudas, pade nopamula-yamo nangonco loga to nabelo bona mambei i Yesus si sira, bona nemo nancani nu tou dea.
Popasadia pangkondi mo Paskah
22:7-13
7 Naratamo tempona Eo Bete Roti Tado Nampake Ragi, eo nu tou-tou kana mosambale bimba Paskah. 8 Pade nitudumo ni Yesus i Petrus pade i Yohanes: “Malou komi mopasadiaka-ta kondia mo Paskah.” 9 Nepekutanamo i Petrus pade i Yohanes: “Riumba dota-Mu kapasadiaka?” 10 Nesono i Yesus: “Tempo-mi mesua ri ngata Yerusalem, ikomi kana mampotomu sadua baleilo to nangkeni gumba to nikeisini nu ue. Tutu-yamo malou ri sou to nipesua-na, 11 pade mi-uli ri tumpu sou ee: Guru-ka nepekutana. Riumbamo pearia nu ana-ana guru-Na bo Ia mangkondi kondia Paskah? 12 Tumpu sou ee kana mantudoka komi saongu kamara bete ri wumbuna, nagana ante parewana. Pasadiamo sumaweena isee.” 13 Pade naloumo i Petrus bo i Yohanes, nirata-ra sumawee nasimbei ewa to niuli ni Yesus. Pade nipasadia-ramo kondia Paskah ee.
Potoa pangkondi kawengina
22:14-23
14 Narata-pa tempona mangkondi kondia Paskah ee, noncundamo i Yesus noroa ante ana-ana guru-Na ri pangkondia. Isira ee mbii nisanga suro-suro-Na. 15 Pade nangulimo i Yesus si sira: “Madota mpuu-Ku mangkondi kondia Paskah ei moroa ante ikomi sintou tadopa mangkolo kapepaa-Ku. 16 Parisaya-mo: Tadomo Ku-kondi oa ei duuna marata tempona ri rara Poparentaa nu Allatala.” 17 Naopu ee nialamo ni Yesus panginua to nakeisia ante anggur, pade nosambaya-Yamo ri Allatala, naopu ee niuli-Namo: “Alamo ei pade bagi-bagimo, 18 bona mi-ncani mopamula eo ei tadomo Ku-inu oa anggur ei duuna tempona Poparentaa nu Allatala marata.” 19 Naopu ee nialamo ni Yesus roti. Naopu-Yapa nosambaya, nitibe-tibe-Namo roti ee ante pale-Na pade niweikaka-Na ra-mo ante nanguli: “Eimo koro-Ku to niweikaka komi, powiamo oa ei bona majadi pantorami-Ku.” 20 Naopu-ra nangkondi niwei-Namo panginua anggur ee si sira pade nanguli: “Anggur ri rara nu panginua eimo to najadi potipa to nabou lako ri Allatala, to napakaroso nu raa-Ku, raa to kana rabubuka komi.
21 Agiana, kalio! Tou to mampobalu-Ku naria isei namporoa-Ku. 22 Yaku, Ana Manusia kana mamate ami-da, ewa to nipakatatapu nu Allatala, agiana mawesomo tou to nampobalu-Ku!” 23 Pade nopamula-ramo nombepekutana, yema lako riolo-ra to kana mowia nuanu ee.
Pombebili tempo pangkondi kawengina
22:24-38
24 Riolo nu ana-ana guru ni Yesus najadi pombebili, nancambelai yema lako riolo-ra majadi to bete ntoto. 25 Nanguli i Yesus si sira: “Mbagou-mbagou to tado nanguncani Allatala noduasi todeana, pade nokuasai todea agiana isira nikasangai mbii ‘Topotalendusi Todea’. 26 Agiana ikomi tado mamala ewa ee. Pegoliana tou to nabete ntoto riolo-mi kana majadi ewa to kodi, pade topangkeni kana majadi ewa topelayani. 27 Yemapa to neliu betena: Tou to noncunda nangkondi ba tou to nolayani-ya? Tantu tou to noncunda ee. Agiana Yaku naria riolo-mi bona molayani komi. 28 Ri rara nu sumawee kasesaa-Ku, ikomi namporoa oa-Ku. 29 Beiwa pambei-Ku nu Allatala kuasa bona moparenta, iwee mbiimo Yaku kana mambei komi kuasa ee. 30 Ante eemo mamalamo komi metutu masana-sana ante Yaku ri tempo-Ku majadi Mbagou. Pade ikomi kana moncunda ri wumbu nu sampulu rongkou poncundaa bete moparentai sampulu rongu suku ri Israel.”
31 “Simon, Simon, ronge! Mbagou Seta nipaliumo bona mampesori komi, ewa gando nipatani lako ri kulina, nangkajadika to nabelo nigaa lako ri to nadaa. 32 Agiana nisambayani-Kumo-ko, Simon, bona peparisaya-mu tado magontu. Pade ande manculipa-ko si Yaku, iko kana mampakaroso sarara-sarara-mu.” 33 Nesono i Petrus: “Pue, masadia-ku mesua ri rara ntarungku pade mamate moroa ante Iko, Pue!” 34 Agiana nanguli i Yesus: “Parisayamo Petrus, tadopa motuturua manu eo ei, tolu ngkanimo-ko mampesapuka-Ku.”
35 Naopu ee nanguli i Yesus si sira: “Pantudu-Ku komi impia, mampopowole kareba belo lako ri Allatala pade tado nampaliu komi mangkeni doi, kusou ba sapatu, naria komi nakabu nuapa-pa?” 36 Nesono-ra: “Tado.” Nanguli i Yesus: “Agiana tempo ei, yema naria doi ba kusou-na, kana nakeni, pade yema tado naria taonona, kana nabalu powaru ndoena bona rapopangoli taono. 37 Sabana Ku'ulikaka komi: Nuanu nitulisi ri rara Buku Nagasa ei kana rapeganai si Yaku:
‘Ia nireke riolo nu tou-tou daa.’
Sabana nuapa to nitulisi ri rara Buku Nagasa nancambelai-Ku bula nipeganaimo tempo ei.” 38 Nanguli ana-ana guru-Na: “Pue, kalio isei naria romata taono.” Nesono i Yesus: “Weetumo.”
Ri bulu Zaitun
22:39-46
39 Nipawiamo ni Yesus ngata ee pade nalou ewa kabiasaa-Na oa ee ri bulu Zaitun, pade ana-ana guru-Na mbii nalou ante Ia. 40 Karata-ra isee, niuli-Namo ri ana-ana guru-Na: “Posambayamo komi, bona nemo manawu komi ri rara nu pesori.” 41 Naopu ee nalou-Yamo nakawao saodi lako si sira, rapa-rapana sampewunua watu kawaona, pade notumbukotu bo nosambaya. 42 Niuli-Na: “Tuama-Ku, ande mamala pakakawaoka-Ku kapepaa to kana Ku-kolo ei. Agiana nemo mantutu dota-Ku, aga mantutu dota-Mu Tuama.” [ 43 Pade naratamo sadua malaeka nu Allatala nampakaroso-Ya. 44 Napepa mpuu nirasai ni Yesus nangkajadika-Ya nosambaya mpuu-mpuu. Pane-Na ewa raa natiti ri tana.] 45 Naopu-Ya nosambaya, nanculi mbiimo i Yesus ri ana-ana guru-Na, agiana nirata-Na bula-ra naleta apaa nikeni nu susa rara-ra. 46 Pade niuli-Namo si sira: “Nuapa pade naleta komi? Pembangumo pade mosambaya bona nemo manawu komi ri rara nu pesori!”
I Yesus nisoko
22:47-53
47 Ranca ni Yesus nololita-dapa, naratamo sarombonga tou. Isira ei nikeni ni Yudas, sadua lako ri sampulu rodua ana-ana guru-Na. Naopu ee naloumo i Yudas si Yesus pade noeki-Ya nantutu ada-ra. 48 Agiana i Yesus nanguli si Yudas: “Yudas, ante pe'ekimu etumo-ko madota mampobalu-Ku, Ana Manusia?” 49 Pangkalio nu ana-ana guru ni Yesus kajadia ee, nanguli-ramo: “Pue, kana katimbe-ramo ante taono?” 50 Pade sadua lako ri ana-ana guru-Na notimbe batua nu tobalia bete ante taono nangkajadika naputu talinga ngkana-na. 51 Agiana nanguli i Yesus: “Iweetu-mo!” Pade nikakamu-Namo talinga nu tou ee pade nipakaori-Na.
52 Naopu ee nangulimo i Yesus ri tobalia-tobalia ri matana pade tadulako-tadulako to nojaga Sou nu Allatala, pade ri topangkeni-topangkeni to Yahudi to narata isee bona mosoko-Ya: “Niuli-mi Yaku ei tou daa pade naratamo komi nangkeni taono bo pato mosoko-Ku? 53 Butu eo-Ku naria oa noroa ante ikomi ri karawaa Sou nu Allatala, tado nisokomi-Ku. Agiana eimo loga-mi mentida, ri kawengi mbongona ei, apaa Mbagou nu Seta nekuasai.”
I Petrus nampesapuka i Yesus
22:54-62
54 Nisoko-ramo i Yesus pade nikeni-Yamo ri sou nu tobalia bete nu to Yahudi, pade i Petrus netutu ngkawao. 55 Ri tongo-tongo nu karawa ee tou-tou nopatuwu apu pade noncunda-ramo nantoleliki apu ee. Pade naloumo i Petrus noncunda namporoa tou-tou to noncunda isee. 56 Naria sadua batua bangkele nangkalio i Petrus noncunda ri soso apu ee, pade batua ee nampenoto i Petrus. Naopu ee nanguli-yamo: “Tou ei mbii see naria namporoa i Yesus!” 57 Agiana nesapu-da i Petrus ante nanguli: “Tado nincani-ku ba yema tou etu!” 58 Tadopa nasae naopu ee naria mbii to sadua-na nangkalio i Petrus pade nanguli: “Iko mbii sadua to lako si sira!” Agiana nesono i Petrus: “Tado, tado yaku!” 59 Rapa-rapana sa-jaa naopu ee nanguli mbiimo sadua tou ntanina: “Nakono, tou ei mbii topantutu i Yesus, apaa ia mbii to Galilea.” 60 Agiana nesono i Petrus: “Nuapa patuju-mu, tado nincani-ku to niuli-mu!” Bula wee mbii, ranca ni Petrus nololita-dapa, notuturuamo manu. 61 Neili-mo i Yesus nangolole i Petrus. Pade nitoramo ni Petrus lolita ni Yesus siya: “Tadopa motuturua manu eo ei, tolu ngkanimo-ko nampesapuka-Ku.” 62 Pade nesuwumo i Petrus lako isee pade nokeo ante susa rara-na.
I Yesus ri ngayo nu Topotangara Agama
22:63-71
63 Tou-tou to nojaga i Yesus nampopowadi-wadi pade nonampa-Ya. 64 Niwunta-ra mata-Na pade nampekutana-Ya: “Ande nakono-kono-Ko nabi, ulimo wea yema to nonampa-Ko?” 65 Nadea mbii-dapa lolita pekanene to niulikaka-ra Ya.
66 Sangkabaanapa, nolibumo Topotangara Agama to Yahudi. Topolibu ee topangkeni-topangkeni to Yahudi, tobalia-tobalia ri matana pade topande ri Buku Taurat. Nitudu-ramo tou mangkeni i Yesus si sira. 67 Nanguli-ra si Yesus: “Ulika-ka, Iko eimo Mbagou Topepakasalama?” Nesono i Yesus: “Noumbiipa Ku'ulika komi, tado mi-parisaya. 68 Pade ande Ku-pekutana komi, tado mbii misono. 69 Agiana mopamula tempo ei, Yaku, Ana Manusia kana moncunda mbira ri ngkana nu Allatala To Nakuasa mpuu.” 70 Pade nanguli-ramo pura: “Ande iweetu wea, Iko ei Ana nu Allatala?” Nesono i Yesus: “Ikomi dodomo nanguli etu.” 71 Pade nanguli-ramo: “Tadomo taparalou sabi! Nironge dodo-tamo lako ri wiwi-Na.”