11
1 Tutumo inggu-ku, nasimbei ewa yaku mbii nantutu inggu ni Kristus.Nancambelai pobungu woo nu bangkele tempo mosambaya
2 Yaku kana mangune komi, apaa nitora oa-mi ku pade nantutu pepatuduki to niwei-ku si komi. 3 Agiana naria mbiipa sangaya to nipodota-ku bona mi-ncani, bakote i Kristus najadi woo nu sumawee baleilo, nasimbei ewa baleilo najadi woo nu bangkele-na, pade Allatala najadi woo ni Kristus. 4 Ande maria sadua baleilo tempo-na mosambaya ba tempo-na moparata petetesi lako ri Allatala ri ngayo nu tou dea, ante mobungu woo-na, tou ee nangkanene i Kristus to nakuasa ri woto-na 5 Pade ande maria sadua bangkele tempo-na mosambaya ba tempo-na moparata petetesi lako ri Allatala ri ngayo nu tou dea, ante tado mobungu woo-na, bangkele ee nangkenene baleilo-na to nakuasa ri woto-na. Tado naria pontania-na lako ri bangkele to nikurorika wulua-na. 6 Apaa ande sadua bangkele tado madota mobungu woo-na agilounamo ragunci wulua-na. Agiana ande sadua bangkele rakurori ba raguncika wulua-na, nuanu ee najadi pekanene si-ya. Ee-mo sabana agilounamo nabungu woo-na. 7 Baleilo tado mamala mobungu woo-na ranca mosambaya, apaa ia nopanotosi kuasa bo inggu nu Allatala. Agiana bangkele kana mobungu woo-na, apaa ia nopanotosi inggu nu baleilo-na, 8 apaa baleilo tado nipajadi lako ri bangkele, agiana bangkeleda to nipajadi lako ri baleilo. 9 Pade, bangkele mbii nipajadi bona maria to mantulungi baleilo, tado baleilo nipajadi bona mantulungi bangkele. 10 Ee-mo sabana bangkele kana mobungu woo-na bona majadi pampetonondi bakote ia nakuasa mosambaya bo moparata petetesi nu Allatala, pade bona nancani nu malaeka-malaeka naria kuasa ee si-ya. 11 Noudamo ewa ee ri rara nu posaongu rara-ta ante i Pue, bangkele niparalou nu baleilo nasimbei ewa baleilo niparalou nu bangkele. 12 Apaa noudamo bangkele paramulana nipajadi lako ri baleilo, agiana naopu ee baleilo nipoanaka nu bangkele; pade ngila ngayana neumba lako ri Allatala.
13 Pekiri belo-belo nuanu ei: Masipatoda ande bangkele mosambaya ri Allatala ri ngayo nu tou dea tado mobungu woo-na? 14 Nantutu ada nu dunia, tado masipato baleilo malanga wulua-na. 15 Agiana ande bangkele malanga wulua-na, nuanu ee najadi kadonua-na, apaa wulua niweikaka bangkele bona majadi pobungu woo-na.
16 Agiana ande maria tou mampabili pepatuduki ei, sangaya ngkola nuanu mamala ku'uli: Yaku bo todea nu Allatala ntanina, kawule sangaya ngkola ada ei to nitutu-ka. Tado naria ada ntanina.
Ada-ada to nasala ri rara nu posintobua mangkondi kawengina
17 Nancambelai nuanu nopuri ei, yaku tado mangune komi, apaa ande mosintobu komi menomba ri Allatala, posintobu-mi ee tado nangkeni belo, aga nangkeni nuanu nadaa. 18 Apaa paramulana nironge-ku bakote ri rara nu potobu-mi, naria to nosisalapasa. Nipekiri-ku naria saodi kakonoa nu kareba ee. 19 Masipato amida maria posisalapasa riolo-mi, bona manoto rakalio ngoni yema-yema to mpuu-mpuu neparisaya si Pue. 20 Tempo-mi notobu, niuli-mi bakote i komi nosintobu nangkondi nantora kamate ni Pue, ntanono tado. 21 Apaa tempo-mi nangkondi, butudua tou nombeago nangala dodo kondia-na, nangkajadika naria to tado-mo namparata nuapa-pa pade naoro, pade saganta nanginu duuna nalangu. 22 Nuapa pade iwee komi? Tado naria sou dodo-mi bona mi-pangkondi bo mi-panginui? Ba madota mangkanene todea nu Allatala bo mopakaeya tou-tou to netowei-da komi? Nuapa to kana ku'ulikaka komi? Mangune komi? Tado! Kakono-konona tado madota-ku mangune komi.
23 Sabana nuanu to nipatudukika-ku komi ee, nitarima-ku lako si Pue dodo, bakote kawengina ri tempo ni Pue Yesus nisoko, Ia nangala roti, 24 pade naopu-yapa nosukuru ri Allatala, nitibe-tibe-Namo roti ee ante pale-Na, pade nanguli: “Ei-mo woto-Ku to niwei-Ku majadi pancambei komi. Powiamo ei bona majadi pantora-mi Ku.” 25 Iwee mbii naopu-pa nangkondi, niala-Namo panginua anggur pade nanguli: “Anggur ei-mo potipa nu Allatala to nabou, to nipadupa ante raa-Ku. Butu ngkani komi manginu anggur ei, powiamo ewa ei bona majadi pantora-mi Ku.” 26 Apaa butu ngkani komi mangkondi roti pade manginu anggur ewa ei, i komi nampopowolemo kamate ni Pue, duuna karata mpanculi-Na ngoni ri dunia. 27 Ee-mo sabana, yema-yema to mangkondi roti ba manginu anggur pantora kamate ni Pue ante inggu to tado masipato, tou ee najeko si Pue to nambeimo woto bo raa-Na najadi tinuwu. 28 Jadi, butu dua tou kana moparesa ncala ulu koro-na, pade mamala-yada mangkondi roti bo manginu anguur ee. 29 Apaa ande tado manoto rara-na bakote koro-na naria pombedeiaana ante woto ni Kristus, Allatala kana mosuku-ya tempo-na mangkondi bo manginu. 30 Ee-mo sabana nadea lako riolo-mi to tado naroso bo nadua, pade nadea mbii to namate. 31 Agiana ande ta-paresa ncala ulu koro-ta tado rasuku-ta nu Allatala. 32 Agiana ande rasuku-ta ni Pue, Ia kana mopatuduki-ta, bona tado mambela-ta suku moroa-roa ante tou ri dunia ei, to tado natundu ri Allatala.
33 Jadi sarara-sarara-ku, ande motobu komi mangkondi roti bo manginu anggur pantora kamate ni Pue, kana mombepopea komi. 34 Ande maria tou maoro, agina-yamo mangkondi ncala ri sou dodo-na, bona nemo ngoni potobu-mi ee aga mampopeumba suku nu Allatala ri koro-mi. Ande marata-kudamo ngoni si komi, pade kusonoda pepekutana ntanina to nitulisi-mi ri sura-mi.