Ngila ngaya nu pampakule, to niwei nu Inosa Gasa nu Allatala agiana sangaya ngkola Inosa Gasa nu Allatala
12:1-11
12
1 Kapolaana sarara-sarara-ku, nancambelai pampakule-pampakule to niwei nu Inosa Gasa nu Allatala. Nancambelai nuanu ee, yaku madota bona mi-ncani mpuu-mpuu nuana to nakono. 2 Toramo bakote tempo-mi tadopa namparisaya Allatala, ikomi naoso nasala dala nantutu karampua to tado nasowa nololita. 3 Ee- mo sabana, ikomi kana manguncani bakote tou to ni-nini nu Inosa Gasa nu Allatala tado mamala manguli: “Masilakamo i Yesus.” Iwee mbii tado maria namo sadua to mamala manguli: “I Yesusmo Pue,” ande tou ee tado ni-nini nu Inosa Gasa nu Allatala.4 Naria ngila ngaya pampakule to niwei nu Inosa Gasa nu Allatala, agiana sangaya ngkola Inosa Gasa nu Allatala. 5 Naria ngila ngaya pobagoa bona mampalayani i Pue, agiana sadua ngkola Pue to nilayani. 6 Pade naria ngila ngaya nu dala mampobagoka i Pue, agiana sadua ngkola Allatala to nambei karosoa ri butu dua tou bona mowia bago ee.
7 Butu dua-ta sore-sore niweikaka pampakule to najadi pampetonondi tonanoto mpuu lako ri Inosa Gasa nu Allatala, bona mamala-ta mowia nuanu to noguna ri tou ntani. 8 Sadua tou niweikaka nu Inosa Gasa nu Allatala pampakule moparata kareba ante kapandea. Ri to sadua ntanina Inosa Gasa nu Allatala to nasimbei ee mbii nambei pampakule mopanotosi Lolita nu Allatala. 9 Sadua tou Inosa Gasa nu Allatala ee nambei pampakule to neliu mpuu bona meparisaya si Yesus. Ri tou sadua ntanina niweikaka nu Inosa Gasa nu Allatala to nasimbei ee mbii pampakule bona mampakabelo to dua. 10 Pade ri sadua tou niweikaka kuasa mowia kadupaa bo ri tou sadua ntanina niweikaka pampakule mampopanguncanika petetesi nu Allatala. Sadua tou niweikaka nu Inosa Gasa nu Allatala ee pampakule bona mamala mampopontani nuanu to neumba lako ri Inosa Gasa nu Allatala-da ba tado. Pade ri tou sadua ntanina mbii niweikaka pampakule mololita ante basa nu Inosa Gasa nu Allatala, bo tou ntanina mbii niweikaka pampakule mobatuasi lolita-lolita lako ri basa nu Inosa Gasa nu Allatala ee. 11 Sumaweena ee nipowia nu Inosa to sangaya ngkola ee. Butu dua tou niweikaka pampakule sore nontani, nantutu dota nu Inosa Gasa nu Allatala dodo ee.
Nadea parewa nu koro, agiana saongu ngkola woto
12:12-31
12 I Kristus nirapaika ewa woto nu manusia. Woto ee saongu, agiana nadea ngaya parewana. Sumawee parewa to sore nontani ee, najadi saongu woto. 13 Iwee mbii i kita sumawee, to Yahudi ba tado to Yahudi, batua-batua ba tou nabebasi, i kita sumawee ni baptis-tamo nu Inosa Gasa nu Allatala ee, bona rapasaoungu woto. Pade Nibolimo nu Allatala Inosa Gasa nu Allatala ee ri rara-ta sumawee.
14 Apaa woto nu manusia tado kawule sangaya ngkola parewana, agiana nadea ngaya. 15 Ande rapana paa-ta manguli: “Yaku ei tado pale, jadi tado parewa nu woto-ku ei.” Nuanu ee tado nakono, apaa paa najadi parewa nu woto. 16 Pade ande rapana talinga manguli: “Yaku ei tado mata, jadi tado parewa nu woto-ku ei.” Nuanu ee mbii tado nakono, apaa talinga ee parewa nu woto. 17 Ande rapana sumawee woto-ta najadi mata, beiwamo peronge-ta? Ba ande sumawee woto-ta majadi talinga, beiwamo pe'enga-ta? 18 Agiana Allatala nopataka parewa-parewa ee ri woto, sore-sore ri peariana nantutu dota-Na. 19 Ande kawule sangaya ngkola parewa nu woto, tado mamala-ya majadi woto. 20 Nadea amida parewa nu woto, agiana saongu ngkola woto.
21 Ee-mo sabana mata tado mamala manguli ri pale: “Tado niparalou-ku ko.” Iwee mbii woo tado mamala manguli ri paa: “Tado niparalou-ku ko.” 22 Pegoliana parewa-parewa nu woto to niuli tado naroso ee, ia-mo to niparalou mpuu-ta. 23 Pade parewa-parewa nu woto to niuli tado naria lotuna, ee ntotomo to nibila-ta. Parewa-parewa nu woto to tado nabelo kalioaana, iamo to nipeirara mpuu-ta. 24 Parewa-parewa nu woto to nabelomo kalioaana, wetumo rapeili gaga. Allatala dodomo to noatoro parewa-parewa nu woto-ta, bona parewa to tado gaga nibila, ee luoda to nibila mpuu. 25 Allatala nowia ewa ee, bona woto ee tado mogampotaa, agiana butu ngaya parewana kana mombetulungi. 26 Ande sangaya parewa nu woto mantodosaka kaduata, sumawee parewa ntanina kana mantodosaka. Ande sangaya parewa nu woto raune, sumawee parewa nu woto ntanina mbii kana madonu.
27 I komi sumawee nirapaika woto ni Kristus, pade butu dua komi najadi parewa nu woto-Na ee. 28 Pade riolo todea nu Allatala, niongko-Namo tou bona mampowia ngila ngaya nu bago. Pamulana naria to niongko najadi suro, karanduana naria to niongko najadi nabi, katoluna naria to niongko najadi topepatuduki, pade to nowia kadupaa-kadupaa. Naria to niwei pampakule mampakaori todua, mantulungi tou ntani ba najadi topangkeni todeana. Pade naria mbii to niwekaka-Na pampakule mololita ante mampake basa nu Inosa Gasa nu Allatala. 29 Tado sumawee tou niongko najadi suro, najadi nabi ba najadi topepatuduki. Tado sumawee tou niweikaka pampakule bona mowia kadupaa. 30 Tado sumawee tou niweikaka pampakule mampakaori todua, mololita ante mamapake basa nu Inosa Gasa nu Allatala, ba mobatuasi lolita lako ri basa nu Inosa Gasa nu Allatala ee.
31 Jadi, pesimbukuimo ante rara mpuu-mpuu bona mamparata pampakule to niparaluu mpuu lako ri Inosa Gasa nu Allatala. Pade tempo ei ku-tudoka komi beiwa dala to nabelo mpuu ee.