Towe
13:1-13
13
1 Noudamo mamala-ku mololita ante ngila ngaya basa nu manusia bo basa nu malaeka, agiana ande tado ku-potowe tou ntani, lolita-lolita-ku ee tado naria lotuna, aga kawule ewa goo bo gimba to naoni wotuna ni kado. 2 Noudamo nipakule-ku noparata kareba lako ri Allatala, pade nanguncani pura sumawee pepatuduki nakono to nipontoliro-dapa bo nanguncani ngila ngayana, pade kaparisayaa-ku naroso mpuu nangkajadika mamala-ku mampopoencu bulu, agiana ande tado ku-potowe tou ntani, katuwu-ku tado naria lotuna. 3 Noudamo sumawee gagu-ku, ku-wei ri tou netowei, pade mambei koro-ku rasuwe ri apu, agiana ande tado ku-potowe tou ntani, sumaweena ee tado namo nuapa lotuna.4 Tou to nampotowe tou ntani nabete pancabara-na pade nabelo rara-na. Tado nosiri-ya, tado nampomole koro-na pade tado nalangko rara-na. 5 Ia tado nowia nuanu to tado naowo, tado nampekiri koro dodo-na. Tado nagampangi-ya nasodo, pade tado namboli ri rara kasalaa to nipowia nu tou ntani. 6 Tou to nampotowe tou ntani, nampodaa nangkalio inggu nadaa, agiana nadonu-ya nangkalio inggu nanoa. 7 Nipakule-na nampongayo ngila ngayana, pade niparisaya-na naria nuanu nabelo ri butu dua tou, noudamo ri rara nu banuapapa tou to nepotowe ee tado naronto sarumakaa-na. Pade nancabara nampopea ngila ngayana.
8 Towe tado maria kaopuana. Agiana pampakule moparata petetesi nu Allatala, pampakule mololita ante basa nu Inosa Gasa bo kapandea, kana marata tempona sumaweena ee kana maopu. 9 Apaa kapandea bo pampakule-ta moporata lolita nu Allatala, tadopa nagana gaga. 10 Agiana kana marata ngoni tempona Allatala mampeganai sumaweena ee, pade nuanu tadopa nagana ee kana malipo. 11 Tempo-ku nangana-dapa, yaku nololita ewa ngana, rara-ku ewa rara nu ngana pekiri-ku ewa pekiri nu ngana. Nabete-kupa ei, inggu-ku ewa nu ngana ee nitadiaka-kumo. 12 Nuanu to nikalio-ta tempo ei ewa wao to nagawua ri padoma. Agiana ngoni i kita kana mangkalio mata ante manoto mpuu. Tempo ei tadopa nincani-ku ngila ngayana, agiana ngoni kana ku-ncani pura ngila ngayana ewa panguncani nu Allatala woto-ku.
13 Jadi ri tempo ei, naria tolu ngaya nuanu to kana ta-powia oa: Kaparisayaa, pancarumaka pade towe. Lako ri nuanu tolu ngaya ee to najadi poko ntotona, eemo towe.