Popanotosi sangkani mbiipa nancambelai pampakule lako ri Inosa Gasa
14:1-25
14
1 Pesimbukuimo mpuu-mpuu bona mampotowe tou ntani. Pade pesimbukui mbii bona mantarima pampakule-pampakule to niwei nu Inosa Gasa nu Allatala, peliu-liunapa pampakule moparata lolita nu Allatala. 2 Tou to nololita ante basa nu Inosa Gasa nu Allatala, ia nampololitaka Allatala, tado nampololitaka manusia, apaa tado nincani nu manusia nobatuasi lolita-na. Allatala ngkola to nanguncani batua nu lolita-na, apaa ia nololita ante kuasa nu Inosa Gasa nu Allatala. 3 Agiana tou to noparata lolita nu Allatala, ia nampololitaka manusia, bona mampakaroso rara-ra, mampopembeti rara-ra bo mampakawoe rara-ra. 4 Tou to nololita ante basa nu Inosa nu Gasa kawule nampakaroso dodo rara-na, agiana tou to noparata lolita nu Allatala nantulungi todea nu Allatala bona mantambei karoso nu peparisaya-ra. 5 Nipobelo-ku ande i komi sumawee mamala mololita ante basa nu Inosa Gasa nu Allatala. Agiana nabelo ntotopa ande i komi moparata lolita nu Allatala. Apaa nariapa guna nu tou to noparata lolita nu Allatala, pade tou to nololita ante basa nu Inosa Gasa nu Allatala. Ande nincani nu tou to nololita ante basa nu Inosa nu Gasa nu Allatala ee nobatuasi basa niuli-na ee, mariada guna-na ri sumawee todea nu Allatala.6 Jadi, sarara-sarara, ande rapana yaku marata si komi pade mololita ante basa nu Inosa Gasa nu Allatala, tado naria gunana si komi. Noguna loupa ande i yaku moparata petetesi to niulimo nu Allatala si yaku ba mopanotosi nuanu nancambelai Allatala, ba moparata kareba lako ri Allatala, ba mpatuduki komi. 7 Nuanu ee nasimbei ante parewa mpododia to tado noinosa, ewa lolowe bo kasapi. Ande tado matantu potawusi lalowe ba pokado kasapi ee, beiwa panguncani nu tou dodia nuapa to nipododia? 8 Pade ande tabue rapopomomoni ntabubua, tado maria surodado to madota mampakasadia koro-na malou moiwali. 9 Iwee mbiida ante pampakule nololita ante basa Inosa nu Inosa Gasa nu Allatala. Ande i komi mololita ante basa to tado nincani, beiwamo panguncani nu tou patuju nu lolita-mi ee. I komi aga nasimbei ewa to nampololitaka ngolu.
10 Ri dunia ei nadea ngaya basa, agiana sumawee lolita ri rara nu basa ee naria batuana. 11 Agiana ande tado ku-ncani mobatuasi basa to niuli-na nololita, tantu kana ku'uli ia tou to sangatana. Iwee mbii tou ee kana manguli bakote yaku to sangatana. 12 Jadi iwee mbiimo ante i komi. Nincani-ku bakote i komi mpuu-mpuu madota mamparata pampakule lako ri Inosa Gasa nu Allatala. Agiana nabelo ntotopa ande i komi merapi pampakule mantulungi todea nu Allatala bona maroso kaparisayaa-ra.
13 Ee-mo sabana, tou nololita ante basa nu Inosa Gasa nu Allatala, kana mosambaya bona raweikaka-ya pampakule mobatuasi basa nu Inosa Gasa nu Allatala ee. 14 Apaa ande yaku mosambaya mampake basa nu Inosa Gasa nu Allatala, ri rara-ku nosambaya, agiana pekiri-ku tado netutu nosambaya. 15 Jadi, nuapa to kana ku-powia? Yaku kana mosambaya ante rara-ku pade mosamabaya mbii ante pekiri-ku. Yaku kana mododia ante rara-ku pade mododia mbii ante pekiri-ku. 16 Apaa ande i komi mosukuru ri Allatala ri rara-mi, pade tou ntani to naria isee tado mamala manguli “Amin” apaa tado nincani-na nuanu niuli-mi. 17 Noudamo nabelo sambaya posukuru-mi ee, agiana tado naria gunana ri tou ntani, apaa tado nipakaroso-mi kaparisayaa-ra.
18 Yaku nosukuru Ri Allatala apaa yaku niweikaka pampakule nololita ante basa nu Inosa Gasa nu Allatala neliu lako si komi sumawee. 19 Agiana ri rara posintobua todea nu Allatala, nipobelo-kupa manguli alima mpama lolita to mamala rabatuasi nu tou bona mamala mopatuduki-ra, pade ri njobu mpamana basa nu Inosa Gasa to tado nincani-ra nobatuasi.
20 Sarara-sarara, nemo ewa pampekiri nu ngana kodi. Ande nancambelai nuanu to nadaa, ikomi kana masimbei ewa ngana kodi to tadopa nanguncani nowia nuanu to nadaa. Agiana ri rara nu pampekiri-mi, i komi kana majadi to natoualumo. 21 Ri rara Buku Nagasa naria nitulisi lolita nu Allatala: “Yaku mangulikaka todea-ku ante wiwi nu tou lako ri to sangatana to nobasa ntani. Agiana noudamo iwee, tado nadota-ra namparonge lolita-Ku” 22 Pampakule mololita ante basa nu Inosa Gasa nu Allatala najadi pampetonondi nu tou to tado neparisaya. Pade pampakule moparata lolita nu Allatala najadi pampetonondi nu tou to neparisaya 23 Jadi, ande rapana ri rara posintobua todea nu Allatala, pade sumawee todea nu Allatala ee mololita ante basa nu Inosa Gasa nu Allatala, pade maratamo basangkia dua tou lako ri sawalikuna, ba tou-tou to tado neparisaya, natantumo tou-tou ee kana manguli bakote i komi togila. 24 Agiana ande ikomi sumawee moparata lolita nu Allatala, pade mameimo tou to tado neparisaya ba tou lako ri sawalikuna, natantumo sumawee nuanu niparata-mi ee kana mopanotosi jeko-jeko nu tou ee, pade mampakanoto rara-na lako ri jeko-jeko-na. 25 Sumawee nuanu niwunika-na ri rara-na kana rapopeumba, mangkajadika-ya kana motumbukotu menomba ri Allatala pade mampangaku: “Nakono mpuu-da Allatala namporoasi komi.”
Atura ri rara posintobua todea nu Allatala
14:26-40
26 Jadi, sarara-sarara, nuapa batua nu sumaweena ee? Ande ikomi motobu mampenombai i Pue, maria to mododia, maria to mepatuduki, maria to moparata lolita nu Allatala, maria to mololita ante basa nu Inosa Gasa nu Allatala pade maria mbii to mobatuasi basa nu Inosa Gasa nu Allatala ee. Sumaweena ee kana mi-powia bona mepatuduki pade mampakaroso kaparisayaa todea nu Allatala. 27 Ande maria to madota mololita ante basa nu Inosa Gasa, maganamo rodua ba kadeanamo totolu ngkola to mombesawa mololita. Pade kana maria to mamala mobatuasi nuanu niuli-ra ee. 28 Ande tado maria to mamala mobatuasi lolita-ra ee, aginamo to nololita ee malino ri rara nu posintobua ee, aginamo mololita dodo ri rara-na ante Allatala.
29 Nabeloloupa rodua ba totolu to nantarima lolita nu Allatala moparata lolita ee, pade todea nu Allatala ntanina mamparonge belo-belo lolita ee. 30 Agiana ande rapana maria sadua to noncunda ri potobua ee mantarima lolita lako ri Allatala, tou nololita nokoulu ee see kana malino. 31 Ande ewa ee komi, mamala komi sumawee-mi mombesawa sadua-sadua moparata lolita nu Allatala, bona sumawee-mi mantarima pepatuduki bo mantambei maroso kaparisayaa-mi. 32 Tou to nampakule noparata lolita nu Allatala, nampakule nokuasai koro-na, ia namala nololita ba meuntu mololita nantutu dota dodo-na. 33 Nipobelopa nu Allatala mateatoro. Tado nipobelo-Na marewoa.
34 Ewa kabiasaa to najadi ri sumawee todea nu Allatala, bangkele kana malino tempo todea nu Allatala mosintobu. Tado nipaliu-ra mololita. Isira kana mengkou ewa to niuli ri rara nu parenta Taurat. 35 Ande madota-ra manguncani banuapa-pa, rapekutana-ra ri baleilo-radamo ande manculi-rapa ri sou. Apaa tado masipato bangkele mololita ri rara posintobua todea nu Allatala. 36 Lolita nu Allatala tado neumba lako si komi. Pade tado kawule si komi ngkola lolita ee niparata. 37 Ande maria tou manguli bakote naria pampakule-na moparata kareba lako ri Allatala, ba naria pampakule ntanina lako ri Inosa Gasa nu Allatala nitarima-na, kana manoto rara-na bakote nuanu niuli-ku si komi ei parenta lako si Pue. 38 Agiana ande maria tou tado mantarima lolita-ku ei, nemo mi-peili-ya. 39 Ee-mo sabana, sarara-sarara, pesimbukuimo ante rara mpuu-mpuu bona mamala komi moparata lolita nu Allatala, pade nemo mi-tagi tou to madota mololita ante basa nu Inosa Gasa nu Allatala. 40 Agiana sumawee-na ee kana rapowia ante kabelo-belona bo mateatoro belo.