Katuwu mpanculi ni Kristus
15:1-11
15
1 Pade tempo ei, sarara-sarara, yaku madota mampopatora nculi komi Kareba Belo lako ri Allatala to niparata-ku si komi, nitarima-mimo pade nampakaroso peparisaya-mi si Kristus duuna ri tempo ei. 2 Ikomi kana napakasalama nu Kareba Belo ee ande i komi mpuu-mpuu mamparisaya Kareba Belo ee. Agiana ande tado, peparisaya-mi ee tado nakono. 3 Niparata-kumo si komi to najadi poko nu kareba ee, to nitarima dodo-ku. Kareba ee nancambelai kamate ni Kristus nantolosi jeko-jeko-ta, ewa to nitulisi ri rara Buku Nagasa, 4 bakote Ia nitana ri dayo, agiana ri eo katolueona nipatuwu mpanculi, ewa to nitulisi ri rara Buku Nagasa. 5 Naopu ee nipopakalio-Namo koro-Na si Petrus pade ri sampulu rodua ana-ana guru-Na. 6 Naopu ee nipopakalio mbii-Na koro-Na sangakanilou ri alimatu labi topantutu-Ya. Saganta-ra natuwu-dapa duuna ri tempo ei, aga basangkia dua-ra namatemo. 7 Naopu ee nipopakalio mbii-Na koro-Na si Yakobus pade ri sumawee suro-Na. 8 Pade kaopua ntotona, nipopakio mbiia-Na koro-Na si yaku, noudamu yaku ei ewa ngana to nipoanaka tadopa nagana wulana. 9 Yaku ei-mo suro ni Pue Yesus to nakodi mpuu ri pangkalioaa nu manusia. Tado masipato-ku rakasangai suro, apaa impia-ku samata noduasi todea nu Allatala. 10 Agiana lako ri towe rara nu Allatala, yaku nipajadi suro ni Pue Yesus tempo ei. Pade towe rara-Na ee naria bunduna ri rara ngkatuwu-ku. Yaku nobago ntomo neliu lako ri kabago suro-suro ni Yesus ntanina. Agiana sumawee ee tado kabundua-ku nobago, nuanu ee aga pobago nu Allatala to nampotowe-ku bo namporoasi-ku nobago. 11 Jadi, ba lako si yema nironge-mi Kareba belo ee, ba lako si yaku ba lako ri suro-suro ntanina, tado ee pokona. Agiana to najadi poko ntotona i kami nampopowole kareba belo ee pade niparisaya-mi.Katuwu mpanculi nu manusia
15:12-34
12 Ikami nampopowole si komi kareba nancambelai katuwu mpanculi ni Kristus. Jadi, nuapa pade naria riolo-mi to nanguli bakote tou namatemo tado rapakatuwu mpanculi? 13 Ande nakono tou namatemo tado rapakatuwu mpanculi, batuana i Kristus mbii tado rapakatuwu mpanculi lako ri kamatea. 14 Pade ande rapana tado nipakatuwu mpanculi i Kristus lako ri kamatea, tado naria lotu-ka nampopowole Kareba Belo pade tado mbii naria lotu nu peparisaya-mi. 15 Tado kawule ee. Ande nakono nuanu niuli-ra ee, batuana ikami naboa ri Allatala, apaa ikami nanguli Allatala nopatuwu mpanculi i Kristus lako ri kamatea. Agiana ande rapana nakono tou namatemo tado rapakatuwu mpanculi, batuana Allatala tado nopatuwu mpanculi i Kristus. 16 Ande nakono tou namatemo tado rapakatuwu mpanculi, batuana i Kristus mbii tado rapakatuwu mpanculi lako ri kamatea. 17 Pade ande tado nipakatuwu mpanculi i Kristus lako ri kamatea, tado naria lotu nu peparisaya-mi, i komi natuwu oa ri rara nu jeko dodo. 18 Ande tado nipakatuwu mpanculi i Kristus, batuana butu dua topeparisaya to namatemo, tado rapakasalama. 19 Ande pancarumaka-ta i Kristus kawule ta-pajadi ngkatuwu ri rara dunia ei ngkola, ikita ei-mo to neliu mpuu petowei ngkatuwu-ta ri dunia ei.
20 Agiana to nakono, nipakatuwu mpanculi mpuumo i Kristus lako ri kamatea. Nuanu ee nampakatantu bakote sumawee topeparisaya to namatemo, kana rapakatuwu mpanculi. 21 Lako ri kamatea nu sadua manusia, sumawee manusia kana mamate. Iwee mbii lako ri katuwu mpanculi nu sadua manusia, manusia mamala rapakatuwu mpanculi lako ri kamatea. 22 Apaa nasimbei ewa sumawee tou namate sabana naria katetokaiana ante i Adam, iwee mbii sumawee tou to nosaongu rara ante i Kristus kana rapakatuwu mpanculi. 23 Agiana butu dua tou rapakatuwu mpanculi mantutu pombesuncuna. Paramula ntotona i Kristus, maopu ee-da pade tou to najadi todea ni Kristus rapakatuwu mpanculi tempo-Na marata mpanculi ngoni ri dunia. 24 Maopu ee majadimo Eo Kaopu nu Dunia. Ri tempo ee i Kristus mampadagi sumawee poparentaa, sumawee kakuasaa bo karosoa ntanina, maopu ee pade Na-weida kakuasaa-Na najadi Mbagou ri Allatala, Tuama-ta. 25 I Kristus kana moparenta duuna Allatala mowia sumawee bali ni Kristus madagi. 26 Pade bali kaopua ntotona rapakaropu, ee-mo kamatea. 27 Ri rara Buku Nagasa nitulisi ewa ei: “Allatala nampowia ngila ngayana natundu si-Ya,” Natantumo bakote patuju nu “ngila ngayana” ee tado nesua ante Allatala to nampowiamo ngila ngayana ee natundu si Kristus. 28 Agiana rapakatundupa sumawee si Kristus, Ia mbii to najadi Ana nu Allatala kana matundu ri Allatala to nampakatundu sumaweena, bona ngila ngayana matundu ri parenta nu Allatala. 29 Ande tou namate tado rapakatuwu mpanculi, nuapa pade naria tou to ni-baptiska tou to namatemo? Nuapamo lotu-ra nibaptis ande tado rapakatuwu mpanculi tou to namatemo? 30 Pade nuapamo lotu-ka nampongayo weso eo-eona? 31 Sarara-sarara, eo-eona-ku nantodosaka ngila ngaya nu kapepaa nangkajadika-ku kemamate sabana kadonu nu rara-ku nangkalio katuwu-mi apaa neparisayamo komi si Yesus Kristus, Pue-ta. 32 Nuapamo lotu-ku nampesimbukui nangewa tou nadaa ri Efesus to nasimbei ewa binata? Ande tado rapakatuwu mpanculi tou namatemo, agilounamo ta-tutumo lolita nu tou to nanguli: “Kamei-tamo mangkondi bo manginu pade mampakasana katuwu-ta, sabana neile i kita kana mamate.” 33 Nemo matebagiu komi. Tou to nowega ante to nadaa inggu-na, kana majadi madaa mbii inggu-na. 34 Jadi, pakanotomo rara-mi pade nemo oa mowia jeko. Kanono-konona maeya-da komi, apaa naria riolo-mi to tadopa nanguncani Allatala.
Katuwu mpanculi nu woto
15:35-58
35 Agiana maria oa tou to kana mepekutana: “Beiwa pampakatuwu mpanculi tomate? Beiwa kalioaa nu woto-ra ande rapakatuwu mpanculi ngoni?” 36 Nadoyo mpuuda to nepekutana ewa ee. Ande motuda komi banuapa-pa, tado matuwu tinuda-mi ee ande tado mamate ncala. 37 Pade tinuda to nituda-mi ee kawule onguna ewa ongu nu gando ba ongu-ongu nu tinuda ntanina. Tado tinuda to natuwu amimo. 38 Allatala dodo-damo to kana mampakatuwu tinuda ee mantutu dota-Na, duuna sumaweena matuwu majadi sampuu tinuda bete mantutu ngaya nu ongu nu tinuda to nituda-mi. 39 Sumawee nuanu natuwu ri dunia ei tado nasimbei polence-na. Manusia nontani polence-na, japi nontani polence-na, tonci nontani dodo polence-na, bou nontani dodo mbii polencena. 40 Iwee mbiida sumawee nuanu naria ri langi tado nasimbei ante nuanu ri dunia. Nuanu ri langi sore nontani kagayana, iwee mbiida nuanu ri dunia sore nontani kagayana. 41 Kagaya nu eo nontani ante kagaya nu wula, kagaya nu wula nontani ante kagaya nu betue-betue. Pade betue-betue sore nontani kagaya nu pewantana. 42 Iwee mbiimo ngoni ante tou-tou namate to rapakatuwu mpanculi. Woto to nitana ee, woto to mamala mawou, agiana woto to rapakatuwu mpanculi, ee-mo woto to tadomo mamala mamate. 43 Tempo nu woto ee nitana, woto ee nadengko mpuu kalioaana. Agiana tempo nu woto ee nipakatuwu mpanculi, woto ee najadi nagaya bo naroso kalioaana. 44 Tempo nu woto ee nitana, woto ee woto lako ri dunia. Agiana natuwu nculipa-yapa, woto ee woto to niwei nu Inosa Gasa nu Allatala.
Naria woto lako ri dunia, naria mbii woto to niwei nu Inosa Gasa nu Allatala. 45 Ri rara Buku Nagasa nitulisi ewa ei: “Manusia to nipajadi paramulana, i Adam, nipakatuwu nu Allatala.” Agiana i Adam to nopuri ia-mo Inosa to nambei katuwua. 46 To narata nokoulu ia-mo woto lako ri dunia pade to narata nopuri ia-mo woto lako ri Inosa Gasa nu Allatala. 47 Manusia paramulana nipajadi lako ri rambu nu tana, agiana manusia nopuri nirapaika ewa i Adam karoduana to narata lako ri suruga. 48 Manusia to natuwu ri dunia ei nasimbei ewa i Adam, to nipajadi lako ri rambu nu tana, agiana tou-tou ri suruga nasimbei ewa Ia to narata lako ri suruga. 49 Woto-ta tempo ei nasimbei ewa woto ni Adam to nipajadi lako ri rambu nu tana. Agiana ngoni ikita kana majadi ewa woto ni Kristus to narata lako ri suruga ee.
50 Sarara-sarara, ei-mo to najadi patuju-ku: Woto to nipajadi lako ri raa pade isi, tado mamala mesua ri poparentaa nu Allatala. Pade woto to mamala mamate, tado mamala mamparata tuwu liu-liu. 51 Peiraramo. Ku'ulikakamo komi nuanu nipontoliro ei: Tado sumawee-ta mamate, agiana i kita sumawee kana mantarima woto nabou. 52 Sampiga mata ngkola, tempo nu tabue kaopuana rapopomomoni. Apaa, ri tempo nu tabue ee momoni, tou-tou to namatemo kana rapakatuwu mpanculi ante woto to tadomo mamala mamate. Pade ikita sumawee kana mantarima woto nabou. 53 Woto-ta to mamala mamate ei kana rasambei ante woto to tado mamala mamate, pade woto lako ri dunia kana rasambei ante woto lako ro suruga. 54 Ande woto to mamala mamate ee rasambeimo ante woto to tado mamala mamate, pade woto lako ri dunia rasambeimo ante woto lako ri suruga, ri tempo ee-da pade madupa nuanu to nitulisi ri rara Buku Nagasa:
“Kamatea nipakaoupumo; pedagia niratamo.”
55 “Hee kamatea, umbamo pedagi-mu?
Hee kamatea, umbamo pesii-mu?”
56 Bisa nu kamatea ee-mo jeko, pade kuasa nu jeko ee-mo parenta Taurat. 57 Agiana ikita nosukuru ri Allatala, apaa Ia-mo to nampakabebasi-ta lako ri kuasa nu jeko pade kamatea ante nuanu nipowia ni Yesus Kristus, Pue-ta. 58 Ee-mo sabana, sarara-sarara to nipotowe-ku, ikomi kana maroso bo mentida mpuu. Pobagokamo oa i Pue ante rara mpuu-mpuu-mi. Apaa nincani-mimo bakote sumawee nuanu to nipowiaka-mi i Pue kana maria ulina.