2 Korintus i

Sura ni Paulus karongkanina ri todea nu Allatala ri

Korintus

Popamulana

Ngata Korintus ei, ngata ri propinsi Akhaya. I Paulus-mo to paramula ntotona nampopowole Kareba Belo ri ngata ee (Suro-suro 18:1-7). Nipaleisipa ni Paulus ngata Korintus pade napola ri ngata ntanina, naratamo basangkia dua topepatuduki to tado nakono ri ngata Korintus. Niuli-ra tado nakono i Paulus najadi suro ni Yesus, pade tado mamala-ya raparisaya. Apaa ia tado nesua ri sampulu rodua ana guru ni Yesus. Namparonge lolita ee, nitudumo ni Paulus i Titus malou ri Korintus.

Nanculi-pa i Titus lako ri Korintus, niuli-namo si Paulus ewa ei: “Nadea topeparisaya ri ngata Korintus tadomo nosapuaka-ko. Agiana naria mbiidapa basangkia dua to nampakakoo rara-ra, tado nadota-ra matundu si-ko apaa niuli-ra tado suro ni Pue-ko.”

Namparonge lolita ni Titus ee, nitulisikamo ni Paulus to Korintus sura karongkanina ei. Ri rara sura ei, i Paulus nampololita pobago-na nampopowole Kareba Belo (2:14-6:10). Nilolita mbii-na pepotowe-na si sira (6:11-13; 7:2-4; 13-16), pade kadonu nu rara-na namparonge kareba bakote tadomo nesapuaka-ra (7:5-13). Naopu ee, niperapi-na bona rapapola-ramo mopasintobu doi rapopongawa topeparisaya to netowei ri Yudea bona ande marata-ya, masadiamo doi ee rakeni malou ri Yudea (Pasal 8-9). Naopu ee, lolita ni Paulus nangontika tou to nosapuaka kuasa-na najadi suro ni Yesus (Pasal 10-13)

Isi nu sura

Tabe (1:1-11)

I Paulus ante todea nu Allatala ri ngata Korintus (1:12-7:16)

I Paulus nopanotosi nuapa pade nibali-na liwo-na malou mampelei to Korintus (1:12-2:13)

Pobago ni Paulus nampopowole Kareba Belo (2:14-6:10)

I Paulus nerapi ri to Korintus bona mosingkabelo mpanculi ante ia (6:11-7:16)

Doi petulungi rakenika todea nu Allatala to netowei ri Yudea (Pasal 8-9)

I Paulus nampomole koro-na bakote ia mpuu-mpuu suro ni Yesus pade nangontika tou to nosapuaka kuasa-na najadi suro (10:1-13:10)

Petabe kaopuana (13:11-13)