2
1 Ee-mo sabana nibotusi-kumo tadomo tulou-ku oa si komi, ande katulou-ku ee aga mampakatudu mbuku rara-mi. 2 Apaa ande ku-pakatudu mbuku rara-mi, yemadamo to mampakawoe rara-ku ande tado i komi? 3 Ee-mo sabana pade nitulisika-kumo komi sura ei. Tado madota-ku mampelei komi, ande kawule mi-pakatudumbuku rara-ku, bo ee kakono-konona i komi-da to kana mampakadonu rara-ku. Apaa ande madonu rara-ku, i komi sumawee mbii kana madonu. 4 Tempo-ku notulisika komi sura ei nadua mpuu rara-ku bo nantomo nirasai-ku pade nadea ue mata-ku nesuwu. Patuju-ku notulisi sura ei tado bona mampakatudu mbuku rara-mi, agiana bona mi-ncani beiwa kabete nu towe-ku si komi sumawee.Kana ra'ampungi tou to nasala
2:5-11
5 Ande maria tou to mepakatudu mbuku mporara, tado yaku nipakatudu mbuku-na rara-ku, i komi-da to nipakatudu mbukuka-na rara-mi. Agiana bona tado gaga ku-popeliu-liu lolita-ku, agina ku'uli tado sumawee-mi nipatudu mbukuka-na rara-mi. 6 Suku to nipambela nu saganta ntongo tou lako riolo-mi, ri tou ee naganamo 7 Ikomi kana moampungi tou ee pade mampakawoe rara-na bona tado matudu mbuku gaga rara-na duuna na-posue nu rara. 8 Jadi, ku-perapi si komi popakalio nculi si-ya bakote ikomi mpuu-mpuu nampotowe-ya. 9 Patuju-ku notulisi sura si komi bona ku-ncani ba nitutu-mida sumawee nuanu niuli-ku, ba tado. 10 Ande ikomi moampungimo tou to nasala si komi, yaku mbii kana moampungi tou ee. Apaa nuapa to niampungi-kumo, ande rapana maria nuanu to masipato ra'ampungi, nuanu ee nipowia-ku ri ngayo ni Kristus bona mangkeni kabeloa si komi. 11 Yaku nowia ewa ei bona tado maria loga nu Mbagou Seta mampabagiu-ta, apaa nincani-tamo patuju nu rara-na.
Takaroo nu rara pade kalogaa rara ni Paulus ri Troas bo ri Makedonia
2:12-17
12 Tempo-ku narata ri Troas ante patuju mampopowole Kareba Belo nancambelai i Kristus, i Pue nambeikaka-ku loga nabelo bona mobago ri ngata ee. 13 Agiana tado naroo rara-ku, apaa tado notomu-ku ante sarara-ta i Titus isee. Jadi nopalakana-kumo ri tou-tou ri ngata ee, pade nalou-kumo ri Makedonia.
14 Yaku nosukuru ri Allatala, apaa Ia nangkeni-ka bona majadi topedagi sabana i kami nosaongu rara ante i Kristus. Ia mbii nantulungi-ka bona Kareba Belo nancambelai i Kristus ee mowolea ewa soa nu wongi-wongi to nienga riumba-umba. 15 Apaa i kami ewa sou nu dupa to nawongi, to nipopodupaika ni Kristus ri Allatala riolo nu tou to kana rapakasalama bo rapakaropu. 16 Ande ri tou to rapakaropu, i kami nienga ewa soa ntomate to mepakaropu. Agiana ri tou to rapakasalama, i kami nienga ewa soa to nawongi mpuu, to nangkeni katuwua. Agiana yema to mampakule mowia bago ewa ee? 17 Nadea tou noparata lolita nu Allatala bona mangonco kabeloa ngkatuwu dodo-ra. Agiana i kami tado ewa ee. Patuju-ka nanoro bo lolita-ka nakono, apaa i kami niposuro nu Allatala bona moparata lolita-Na. Pade nikalio dodo nu Allatala bakote i kami noparata lolita-Na ee ante kuasa ni Kristus.