Sura ni Paulus karongkanina ri todea nu Allatala ri
Korintus
Ttabe
1:1-2
1
1 Sura ei lako si yaku, i Paulus, to niongko nu Allatala najadi suro ni Yesus Kristus, noroa-roa ante sarara-ta i Timotius. Nipakatuka ri todea nu Allatala ri ngata Korintus pade todea nu Allatala ri propinsi Akhaya.2 Towe rara pade kasanaa lako ri Allatala, Tuama-ta, pade lako si Pue Yesus Kristus mamporoasi komi.
Posukuru ri Allatala
1:3-11
3 Raunemo Allatala, Tuama nu Pue-ta i Yesus Kristus. Ia-mo Tuama to nabelo mpuu rara-Na, pade Ia-mo Allatala to nambei karosoa rara ri manusia. 4 Ia nampakaroso-ka ri rara nu butu ngaya kapepaa to nitodosaka-ka, bona ante karosoa to nitarima-ka lako ri Allatala ee, ikami mbii mamala mamapakaroso sumawee tou nantodosaka ngila ngaya nu kapepaa. 5 Kapepaa-kapepaa to nitodosaka ni Kristus nadea mbiimo kami nitodosaka-ka. Pade lako si Kristus mbiida, rara-ka nipakaroso mpuu-mpuu. 6 Ande ikami mamparasai kasesaa, nuanu ee bona mampakaroso rara-mi, bona rapakasalama komi. Ande rapakaroso rara-ka, ikomi mbii kana rapakaroso bona mamala komi mancabara mantodosaka kapepaa ewa kapepaa to nitodosaka-ka. 7 Niparisaya oa-ka pade tado norandua rara-ka si komi, sabana nincani-ka i komi mbii nampesimbukui nentida ri rara nu kapepaa noroa ante i kami. Ee-mo sabana ikomi mbii rapakaroso moroa-roa ante ikami.
8 Sarara-sarara, ikami ei madota bona mincani kapepaa to nitodosaka-ka ri Asia. Kapepaa to nitodosaka-ka ee nantomo mpuu nirasai-ka, nangkajadika tadomo nisarumaka-ka bakote matuwu-kadapa. 9 Nirasai-ka ewa to nantarima suku mate. Agiana nuanu ee najadi bona ikami tado mancarumaka karoso nu koro dodo-ka, agiana mancarumaka Allatala to nopatuwu mpanculi tomate. 10 Ia-mo to nampakasalama-ka lako ri kapepaa bete to mepakamate. Pade Ia mbiimo ngoni to mampakasalama-ka ri eo ngkapurina, sabana Ia-mo to nisarumaka-ka. 11 Niparisaya-ka ante sambaya-sambaya-mi si kami, Allatala kana mampakasalama-ka lako ri kapepaa. Ia kana mambei kabeloa si kami sabana nadea to nosambayani-ka. Ee-mo sabana madea tou mosukuru ri Allatala.
Pobali nu liwo ni Paulus
1:12-2:4
12 Nadonu mpuu rara-ka, apaa nincani-ka kabula nu rara-ka. Ikami noinggu nanoa ri sumawee tou, peliu-liunapa si komi. Sumawee nuanu nipowia-ka tado naria niwunika-ka. Patuju-ka nanoro nantutu dota nu Allatala. Sumaweena ee nipowia-ka, tado nantutu kapandea nu manusia, agiana nantutu pampakule to niwei nu Allatala. 13 To nitulisika si komi aga kawule nuanu to mamala mi-basa bo mi-paha. Tempo ei tadopa nincani-mi patuju-ka. Agiana ku-sarumaka ngoni kana mi-ncani mpuu-mpuu patuju-ka. 14 Ri tempo karata mpanculi ni Pue Yesus ngoni, ikomi kana rabila sabana ikami, nasimbei ewa ikami mbii nibila sabana ikomi.
15 Sabana peparisaya-ku ee-mo nangkajadika lako ri paramulana-ku noliwo mamei sikomi bona i komi mamparata rasi rongkani kadeana. 16 Patuju-ku mesei ncala-ku ulu mampelei komi ande malou ri Makedonia-ku. Pade manculi-ku lako ri Makedonia, mesei mbii-kudapa mampelei komi bona mamala komi mantulungi-ku mopapola polumakoa-ku malou ri Yudea. 17 Agiana nibali-kumo liwo-ku ee. Nipekiri-mi tado nakono potipa-ku si komi? Ba nipekiri-mi yaku noliwo nantutu dota dodo-ku, maro-roo manguli “Io” maopu ee manguli “Tado” mbiimo? 18 Ri rara sanga nu Allatala to mamala raparisaya, potipa-ku si komi sarara tado sangkanilou “Io” pade “Tado”. 19 Apaa i Yesus Kristus, Ana nu Allatala to nipopokarebamo ni Silas, i Timotius, pade yaku dodo si komi tado nobali-bali patuju-Na, maro-roo manguli “Io” maopu ee manguli “Tado” mbiimo. Potipa-Na mpuu-mpuu mamala raparisaya. 20 Apaa sumawee potipa-Na ee nipadupa ri rara ngkatuwu ni Yesus Kristus. Ee-mo sabana ikita to nosaongu raramo ante i Yesus Kristus mamala manguli “Amin” bona mampemabose Allatala. 21 Allatala dodomo to nampakoroso posaongu rara-ta ante i Kristus, pade Ia dodo mbiimo to nampelisi-ta majadi todea-Na. 22 Ia mbii nambeikaka-ta Inosa Gasa nu Allatala to natida ri rara-ta najadi pampetonondi bakote i kita todea-Na. Ee-mo najadi kakamua-ta bakote Ia kana mambei sumawee nuanu to nitipa-Na si kita. 23 Allatala to najadi sabi-ku, apaa nincani-Na isi rara-ku, bakote tado majadi liwo-ku malou ri Korintus, apaa tado madota-ku mampakatudu mbuku rara-mi.
24 Tado madota mbii-ku moparentai komi nancambelai nuapa to kana mi-parisaya, apaa neparisaya mpuu-mo komi si Kristus. Yaku kawule madota mobago sangkani ante i komi bona mantambei ntoto kasana nu rara-mi.