Sura ni Paulus ri todea nu Allatala ri Galatia
Propinsi Galatia ei mpia niparenta nu Mbagou Bete Roma, pade tou-tou to natida ri propinsi Galatia ee tado to Yahudi. Impia-ra neparisaya ri karampua-karampua. Agiana karatapa ni Paulus nampopowole Kareba Belo ri Galatia, nadea-ramo namparisaya i Kristus.
Pangkosu ni Paulus lako ri Galatia, naratamo topepatuduki-topepatuduki to tado nakono. Nanguli-ra: “Tadopa magana ande kawule mamparisaya i Kristus. Agiana kana ratindi mbii-da mantutu lolita nu Allatala si Abraham pade mantutu parenta Taurat to nitulisi ni Musa.”
Namparonge pepatuduki-ra ee, nasodomo i Paulus. Ri rara sura-na ri to Galatia ei, niulikaka-ra ni Paulus ewa ei: “Kawule meparisaya si Kristus ngkola-da mangkajadika-ta mamala rauli nakono ri pangkalioaa nu Allatala. Tado lako ri petindi, tado lako ri pantutu-ta parenta Taurat to nitulisi ni Musa. Lako ri peparisaya-ta si Kristus-da mangkajadika-ta majadi muli ni Abraham.” Batuana, lako ri peparisaya-ta si Kristus, ikita rauli nakono ri pangkalioaa nu Allatala ewa i Abraham, pade ikita kana mantarima rasi to nitipa nu Allatala si Abraham (3:6-9). Poko pepatuduki ni Paulus ri rara nu sura ei mamala takalio ri 2:16 pade 5:1.
Isi nu sura
1. Popamulana (1:1-10)
2. I Paulus mpuu-mpuu suro ni Kristus (1:11-2:21)
Ia tado nipelisi nu manusia najadi suro, agiana nipelisi ni Kristus. Kareba Belo to nipopowole-na tado lako ri manusia, agiana nitarima-na lako si Kristus.
3. Pepatuduki ni Paulus ri to Galatia (3-4)
Ikita rauli nakono ri pangkalioaa nu Allatala sabana pamparisaya-ta i Kristus, tado lako ri pantutu-ta parenta Taurat to nitulisi ni Musa.
4. Pepopatora ni Paulus ri to Galatia (5:1-6:10)
Tado raparalou matundu ri parenta Taurat to nitulisi ni Musa, apaa nipakabebasi-tamo ni Kristus lako ri parenta nu Taurat. Nemo mantutu dota rara-ta to nadaa, agiana kana mantutu penini nu Inosa Gasa.
5. Tabe kaopuana (6:1-18)