Sura ni Paulus ri todea nu Allatala ri Galatia
Tabe
1
1 Lako si Paulus, sadua suro to tado nipelisi nu manusia ba nitudu nu manusia, agiana nipelisi ni Yesus Kristus bo Allatala Tuama-ta, to nopatuwu mpanculimo i Yesus lako ri kamatea. 2 Sura ei ku-pakatu ri todea nu Allatala ri propinsi Galatia. Pade tou-tou to Karasitee to naria noroa-roa ante yaku nopakatu mbii tabe ei.3 Yaku nosambaya, bona Allatala Tuama-ta pade i Pue Yesus Kristus, mampopakalio towe rara-Na si komi pade mambei komi kasanaa. 4 I Kristus namate bona mampakabebasi-ta lako ri jeko-jeko-ta, pade bona mabebasi-ta lako ri kuasa nu dunia to nadaa ngkapuri ei. Ia nowia sumaweena ee, nantutu dota nu Allatala to najadi Tuama-ta. 5 Kamei-tamo mangune Allatala duuna masae-sae! Amin.
Sangkou ngkola Kareba Belo
6 Yaku namoleara mpuu, apaa nagasi mpuu komi nogoli lako ri Allatala to nampokiomo komi sabana towe rara ni Kristus to nowiamo nuanu to nabelo si komi. Agiana ngkapuri ei ikomi nantutu kareba belo to nontani-damo. 7 Kakono-konona tado naria kareba belo ntanina. To naria aga tou-tou to noparata si komi kareba belo nancambelai i Kristus to nigoli-goli-ra nangkajadika nampoposesaa pekiri-mi. 8 Yema-yema tou to mampopowole kareba belo to nontani lako ri Kareba Belo to nipopowole-ka si komi, noudamo ikami dodo, ba malaeka lako ri suruga, tou ee kana nasuku nu Allatala duuna masae-sae! 9 Ewa to niuli-kamo si komi basangkia ntempo naliu, bula-ka noroa ante ikomi, tempo ei ku'uliki mbii: Tou to nampopowole kareba belo si komi, to nontani lako ri Kareba Belo to nitarima-mimo lako si kami, tou ee kana nasuku nu Allatala duuna masae-sae!
10 Jadi, beiwamo sarara-sarara? Yaku nololita ewa ee bona mingki naune nu manusia? Tado! Yaku kawule madota naune nu Allatala. Ba nipekiri-mi yaku madota mampakadonu rara nu manusia? Nuanu ee tado mbii nakono, apaa ande rapana yaku madota-dapa mampakadonu rara nu manusia, batuana yaku tado batua ni Kristus.
Nancambelai beiwa kajadi ni Paulus suro
11 Sarara-sarara sumawee, yaku madota mowia bona ikomi manguncani mpuu-mpuu bakote Kareba Belo to niparata-ku ee tado kareba lako ri manusia. 12 Yaku tado nantarima Kareba Belo ee lako ri manusia, ba nipatudukika-ku nu manusia. Agiana i Yesus Kristus dodomo to nanguli Kareba Belo ee si yaku.
13 Tantu nironge-mimo nancambelai katuwu-ku impia tempo-ku najadi topantutu agama Yahudi. Nincani-mida beiwa kaseke-ku nampaduasi todea nu Allatala pade beiwa pampesimbukui-ku mampakaropu-ra. 14 Nancambelai penomba ri Allatala ri rara agama Yahudi, yaku neliu lako ri to Yahudi saumuru-ku. Nasagena mpuu rara-ku ri rara nu sumawee ngila ngayana nancambelai ada nu totua-ka.
15 Agiana ante towe rara-Na, Allatala nampelisi-ku najadi suro sintou-ku nipotianaka nu tina-kudapa. Ia nowia ee apaa nabelo mpuu rara-Na si yaku. 16 Allatala nampopakalio Ana-Na si yaku bona mamala-ku moparata Kareba Belo nancambelai Ana-Na ri tou-tou tado to Yahudi. Ri tempo ee tado nalou-ku ba si yema-yema nerapi pepatuduki. 17 Tado mbii nalou-ku ri ngata Yerusalem nampotomuka tou-tou to nokoulumo najadi suro ni Kristus. Agiana tempo ee yaku nalou ri tana Arab, pade lako isee nanculi ri ngata Damsyik.
18 Tolu mpae naliu naopu ee, pade nalou-kuda ri Yerusalem nampotomuka i Petrus, pade neari-kumo ri sou-na rarana sampulu alima eo. 19 Agiana tado naria-ku notomu ante suro-suro ntanina, kawule i Yakobus, sarara ngkoro ni Pue Yesus. 20 Nuapa to nitulisi-ku ei nakono mpuu. Nincanida nu Allatala bakote yaku tado naboa. 21 Naopu ee nalou-kumo ri ngamba-ngamba Siria pade Kilikia. 22 Agiana duuna ri tempo ee todea-todea to Karasitee ri ngamba Yudea tadopa nincani-ra lence-ku. 23 Isira aga kawule namparonge tou nanguli: “Ia to impia nampaduasi-ka, ngkapuri ei nampopowole kaparisayaa to impia madota napakaropu.” 24 Pade niune-ramo Allatala sabana nuanu to nipowia nu Allatala si yaku.