I Paulus nitarima nu sumawee suro
2
1 Sampulu aopo mpae naliu naopu ee, nalouki-kumo ri Yerusalem noroa ante i Barnabas pade nikeni mbii-ku i Titus. 2 Yaku nalou ri Yerusalem sabana naria lolita nu Allatala to nantudu-ku malou. Narata-kupa ri Yerusalem, nipowia-kumo libu ante topangkeni-topangkeni todea nu Allatala to nibila isee, pade nipanotosi-ku si sira nancambelai Kareba Belo to niparata-ku ri tou-tou tado to Yahudi, bona sumawee nuanu nipesimbukui-ku impia pade ngkapuri ei, tado mangkadati. 3 Agiana i Titus, to Yunani to namporoa-ku ri rara nu polibua ee, tado nipasa bona ratindi. 4 Naria ami-da tou-tou to nepasa bona petindi kana rapowia ri sumawee to Karasitee. Isira ei-mo tou-tou to kalioaana najadi topantutu i Kristus to nesua ri olo-ta. Isira nesua bongo-bongo ewa sarara-ta bona mampakagero kabebasia to nitarima-ta apaa nosaongu rara ante i Kristus Yesus. Isira madota mowia-ta bona napobatua nu parenta Taurat. 5 Agiana tado namo saodia perapia-ra nipasitujui-ka, bona Kareba Belo to nakono ee bate-batena mi-tarima.6 Namparonge popanotosi-ku, topangkeni-topangkeni todea nu Allatala to nibila ri Yerusalem tadomo notambei nuapa-pa ri Kareba Belo to niparata-ku ee. Nipekiri-ku tado naria pontaniana tou to nibila ba tado nibila, apaa Allatala tado nangkalio lence. 7 Tou-tou to nibila ee tado notambei nuapa-pa, pegoliana nipangaku-rada bakote Allatala to nambeikaka-ku bago bona mampopowole Kareba Belo ri tou-tou to tado to Yahudi, nasimbei ewa pambei-Na i Petrus bago bona mampopowole Kareba Belo ee ri to Yahudi. 8 Apaa Allatala-mo to nambeika i Petrus karosoa bona majadi suro ri to Yahudi, pade Allatala mbii to nambeimo si yaku karosoa bona majadi suro ri tou to tado to Yahudi. 9 Pade i Yakobus, i Petrus pade i Yohanes to najadi topangkeni-topangkeni todea nu Allatala isee, nampangaku bakote Allatala-mo to nambei si yaku bago ei. Naopu ee nitabe-ra ku-mo pade i Barnabas bona majadi pampetonondi bakote isira nampoio ikami mampopowole Kareba Belo ri tou-tou tado to Yahudi, pade isira mampopowole Kareba Belo ri to Yahudi 10 Sangaya ngkola-da perapia-ra si kami, nemo ka-kalingani tou-tou to netowei. Nuanu ee nipowia oa-kumo ante donu nu rara.
I Paulus nangontika i Petrus
11 Agiana tempo ni Petrus narata ri ngata Antiokhia, niontika-ku apaa nasala nuanu nipowia-na. 12 Apaa, lako paramula ni Petrus narata ri ngata Antiokhia, nabiasa-yamo nangkondi noroa-roa ante tou tado to Yahudi. Agiana naratapa basangkia dua to Yahudi to nitudu ni Yakobus lako ri Yerusalem, nangkosumo i Petrus nokawaosi tou tado to Yahudi, apaa naeka-ya ri to Yahudi to nanguli bakote ikita kana ratindi bona rapakasalama.a 13 Pade tou-tou to Yahudi ntanina mbii nantutumo inggu ni Petrus to nabelo wongko ee, nangkajadika i Barnabas mbii natepakeni nantutu inggu-ra ee. 14 Pangkalio-kupa bakote inggu-ra tadomo nasimbei ante nuanu to nakono to niuli ri rara nu Kareba Belo, niontika-kumo i Petrus ri ngayo-ngayo nu sumawee tou to naria isee: “Iko ei to Yahudi, agiana iko natuwu ewa katuwu nu tou to tado to Yahudi. Jadi, nuapa pade nipesimbukui-mumo nopasa tou-tou to tado to Yahudi matuwu mantutu ada nu to Yahudi?”
To Yahudi pade tado to Yahudi rapakasalama apaa namparisaya i Yesus Kristus
15 Ikami ei muli to Yahudi ami-kada, pade ikami tado muli tou to tado to Yahudi to niuli najeko. 16 Nincani-mida bakote manusia niuli nakono ri pangkalioaa nu Allatala tado sabana nowia parena Taurat, agiana kawule namparisaya i Yesus Kristus. Ee-mo sabana ikami mbii namparisayamo i Kristus Yesus, bona mamala-ka rauli nakono ri pangkalioaa nu Allatala sabana peparisaya-ka si Kristus, tado sabana nowia parenta Taurat to nitulisi ni Musa. Apaa tado naria tou to niuli nakono sabana nowia nuanu to naria ri rara parenta Taurat to nitulisi ni Musa.
17 Jadi, ande ikami to Yahudi nancarumaka majadi makono ri pangkalioaa nu Allatala sabana posaongu rara-ka ante i Kristus, batuana ikami tadomo nancarumaka parenta Taurat to nitulisi ni Musa. Pade ande ikami tadomo nancarumaka parenta Taurat, batuana ikami najadi nasimbei ewa tou tado to Yahudi to niuli najeko apaa tado nipowia-ra parenta nu Taurat. Jadi beiwamo? Mamala rauli i Kristus to nampakeni-ka nowia jeko? Kakono-konona tado!b 18 Ande rapana ku-sarumaka mpanculi parenta Taurat to nipawia-kumo ee, batuana yaku ei nasala mpuumo. 19 Apaa lako ri parenta Taurat pade nincani-ku bakote tado ku-pakule majadi makono ri pangkalioaa nu Allatala ante mowia parenta ee. Jadi eemo sabana tempo ei neuntu-kumo nancarumaka parenta Taurat, bona yaku mamala mpuu-mpuu matuwu mantutu dota nu Allatala. Tempo ni Kristus namate ri kou salib, yaku mbii nireke namatemo noroa ante Ia. 20 Pade katuwu-ku tadomo ewa impia. Ngkapuri ei i Kristus-mo to natuwu ri rara-ku. Yaku natuwu ngkapuri ei ante dala nabou apaa yaku neparisaya si Kristus, to nampotowe-ku pade ante dota dodo-Na nangkolo kapepaa duuna namate najadi tinuwu bona mogempu jeko-ku. 21 Tado nipoara-ku towe rara nu Allatala ri manusia. Ande rapana manusia mamala rauli nakono ri pangkalioaa nu Allatala sabana nowia parenta Taurat to nitulisi ni Musa, natantumo kamate ni Kristus tado naria lotuna.