Nakono ri pangkalioaa nu Allatala sabana kaparisayaa si Kristus
3
1 Sarara-sarara-ku to Galatia, nemo gaga madoyo. Yema-da to nampakapusa komi nangkajadika komi nogoli lako ri peparisaya-mi? Kamate ni Kristus ri kou salib nipanotosi mpuu-mpuu-kumo si komi. 2 Naria sangaya to madota kuncani lako si komi: Ante dala beiwa komi nantarima Inosa Gasa? Nowia parenta Taurat to nitulisi ni Musa-da ba namparonge Kareba Belo pade namparisaya i Kristus-da? Tantu ikomi nantarima Inosa Gasa apaa namparonge pade namparisaya Kareba Belo. 3 Nuapa pade nadoyo gaga komi? Ikomi nopamulamo natuwu nabou ante penini Inosa Gasa. Nuapa pade ngkapuri ei ikomi nampesimbukui mampapola katuwu-mi to nabou ee ante pampakule dodo-mi? 4 Apa tado naria gunana sumawee to nirasai-mimo ee? Tantu naria pura gunana! 5 Allatala nambei Inosa-Na si komi pade nampowia sumawee kadupaa to nepakamoleara ri tongo-tongo-mi. Sumawee to nipowia-Na si komi ee, nipowia-Na sabana ikomi nowia parenta Taurat to nitulisi ni Musa? Tantu tado! Ia nampowia sumaweena ee sabana ikomi namparonge pade namparisaya Kareba Belo.6 Peiraramo nuapa to najadi si Abraham. Ri rara Buku Nagasa naria nitulisi: “I Abraham neparisaya ri Allatala, pade lako ri peparisaya-na ee ia niuli nakono ri pangkalioaa nu Allatala.” 7 Jadi ikomi kana manguncani bakote tou-tou to namparisaya Allatala, isira ee-mo mpuu-mpuu to mamala rauli muli ni Abraham. 8 Lako ngkoulu mamala rancani lako ri Buku Nagasa bakote tou-tou to tado to Yahudi kana naulikaka nu Allatala nakono ri pangkalioaa-Na ande isira meparisaya si-Ya. Kareba Belo ei niuli ami-mo nokoulu si Abraham ri rara Buku Nagasa ante potipa ei: “Yaku kana mantiroi sumawee manusia sabana iko.” 9 I Abraham noparisaya potipa ee, nangkajadika-ya nitiroi. Iwee mbii sumawee tou to neparisaya, kana ratiroi moroa-roa ante i Abraham.
10 Apaa butu dua tou to nancarumaka majadi makono ri pangkalioaa nu Allatala sabana nowia parenta Taurat to nitulisi ni Musa, isira kana nasuku nu Allatala duuna masae-sae. Apaa naria natetulisi ri rara Buku Nagasa: “Butu dua tou to tado nowia oa sumawee to nitulisi ri rara parenta Taurat to nitulisi ni Musa, kana nasuku nu Allatala.” 11 Natantumo, tado naria-namo saduaa to rauli nakono ri pangkalioaa nu Allatala apaa nampowia parenta Taurat to nitulisi ni Musa. Apaa naria nitulisi ri rara Buku Nagasa: “Tou to najadi nakono ri pangkalioaa nu Allatala sabana peparisaya-na, ia-mo to kana mamparata tuwu liu-liu.” 12 Agiana parenta Taurat to nitulisi ni Musa tado naria katetokaiaana ante kaparisayaa, sabana ri rara Buku Nagasa naria nitulisi: “Yema to mampowia sumawee parenta Taurat kana matuwu sabana nampowia parenta ee.” 13 Sumawee manusia masipato nasuku nu Allatala, apaa nangewa parenta-Na. Agiana i Kristus nampakabebasi-tamo lako ri suku nu parenta Taurat, ante kamate-Na ri kou salib. Ia nampalambaka koro-Na nisuku sabana ikita. Apaa naria nitulisi ri rara Buku Nagasa: “Allatala kana mosuku butu dua tou to namate niloe ri kou.”a 14 I Yesus Kristus nowia ewa ee bona rasi to nitipa nu Allatala si Abraham rawei mbii ri tou-tou to tado to Yahudi sabana nuanu to nipowia-Na. Ante ee-mo ikita to namparisaya Allatala, mamala mantarima Inosa Gasa to nitipa nu Allatala ee.
Parenta Taurat to nitulisi ni Musa-da ba awili nu Allatala-da
15 Sarara-sarara, yaku madota mangala jonjo lako ri katuwu-ta eo-eona. Rapana maria tou to moawili, tado maria saduaa mpuu to mamala mogempu ba motambeiki isi nu awili ee. 16 Iwee mbiimo ante potipa nu Allatala to niuli-Na si Abraham pade mulia-na. Ri rara Buku Nagasa tado naria nitulisi “pade ri muli-muli-mu” batuana nadea muli ni Abraham. To nitulisi isee aga “pade ri muli-mu”, batuana sadua ngkolada, ee-mo i Kristus. 17 To madota ku'uli isei iwei: Potipa nu Allatala nipowiamo pade nipakaroso nokoulu. Parenta Taurat to nitulisi ni Musa niwei aopoatu tolumpulu mpae naopu potipa nu Allatala. Jadi potipa nu Allatala kana madupa apaa parenta Taurat tado mamala mogempu potipa ee. 18 Ande rapana rasi to niwei nu Allatala nitarima apaa nampowia parenta Taurat to nitulisi ni Musa, batuana rasi ee tado lako ri potipa nu Allatala. Agiana lako ri potipa ee, Allatala nambei rasi si Abraham.
19 Ande iweeda, nuapada wea patuju nu parenta Taurat to nitulisi ni Musa ee niwei? Sonona, parenta ee nipopotambei bona mopanotosi kasalaa nu manusia. Parenta Taurat to nitulisi ni Musa ee nipake duuna ri karata nu sadua muli ni Abraham, to niuli ri rara potipa nu Allatala si Abraham. Parenta Taurat ee niparata nu malaeka-malaeka si Musa, pade i Musa mbii nopanoroi ri to Israel. 20 Topopanoroi raparalou ande maria rodua tou to mowia potipa. Agiana Allatala tado namparalou topopanoroi, apaa Ia dodo-da to notipa.
21 Jadi nuapa batuana ee? Nuanu to niuli ri rara parenta Taurat to nitulisi ni Musa nombe'ewa ante nuanu to nitipa nu Allatala? Tantu tado! Ande rapana parenta Taurat to nitulisi ni Musa mamala mambei tuwu liu-liu, manusia kana rauli nakono ri pangkalioaa nu Allatala apaa isira nampowia parenta Taurat. 22 Agiana ri rara Buku Nagasa naria nitulisi bakote sumawee manusia nikuasai nu jeko. Kawule ante meparisaya si Yesus Kristus ngkola-da tou mamala mantarima rasi to nitipamo nu Allatala si Abraham.
23 Sintou tadopa marata tempona tou mamala mamparisaya i Kristus, parenta Taurat to nitulisi ni Musa ee ewa sadua topojaga tarungku, to nojagai mpuu-mpuu-ta, duuna marata tempona Allatala mampopanguncanika i Yesus Kristus si kita, bona ikita mamparisaya-Ya. 24 Jadi parenta Taurat to nitulisi ni Musa ee ewa topojagai-ta duuna marata i Kristus, bona ikita mamala rauli nakono ri pangkalioaa nu Allatala ante peparisaya-ta si Kristus. 25 Agiana ngkapuri ei naratamo tempona tou mamala meparisaya si Kristus. Ee-mo sabana ikita tadomo nijagai nu parenta Taurat.
26 Ikomi sumawee najadimo ana-ana nu Allatala apaa namparisaya i Yesus Kristus. 27 Ikomi sumawee nibaptismo ri rara sanga ni Kristus pade nipasangkanimo ante Ia, ikomi nantarimamo inggu-inggu ni Kristus. 28 Tadomo naria pontaniana to Yahudi pade tou tado to Yahudi, batua pade tou tado batua, baleilo pade bangkele. Apaa ikita sumawee nipasangkanimo sabana nosaongu rara ante i Yesus Kristus. 29 Jadi apaa ikomi ei najadimo todea ni Kristus, ikomi mbii muli ni Abraham. Pade ikomi kana mantarima nuanu to nitipa nu Allatala.