Tadomo maria oa pepobatua
4
1 To madota ku'uli isei: Sinungka nu sadua ana tadopa matoualu, ia nasimbei ante sadua batua, noudamo ana ee ami-da ngoni to mancosora sumawee gagu nu totua-na. 2 Ia nipasisi pade gaguna niurusi nu tou-tou to nitudu nu tuama-na. Agiana nuanu ee najadi kawule sudu ri tempo to nipakatatapumo nu tuama-na. 3 Iwee mbii ante ikita. Sinungka-ta tadopa matoualu ri rara mpeparisaya-ta, ikita nipobatua nu karampua-karampua to nokuasai dunia ei. 4 Agiana ri tempo to nipakatatapumo nu Allatala, Ia nantudumo Ana-Na to niote nu sadua bangkele namei ri dunia ei, pade Ia najadi sadua manusia to natundu ri parenta Taurat to nitulisi ni Musa. 5 Ia nitudu bona mampakabebasi-ta to nampesimbukui nampowia parenta Taurat to nitulisi ni Musa, bona ikita ratarima majadi ana-ana nu Allatala. 6 Apaa ikomi najadimo ana-ana nu Allatala, Allatala nantudu Inosa nu Ana-Na mesua ri rara-mi. Inosa ee-mo to najadi sabana pade nepokio-mo komi ante mpuu-mpuu: “Tuama, o Tuama-ku!” 7 Jadi ikomi tado-mo najadi batua, agiana najadi ana-mo. Pade apaa najadi ana-ana nu Allatala-mo komi, mangkajadika ikomi masipato mantarima sumawee ngila ngayana to nipasadiamo nu Allatala ri ana-ana-Na.8 Impia komi mpuu-mpuu tadopa nanguncani Allatala. Ee-mo sabana ikomi nipobatua nu karampua-karampua to nokuasai dunia ei. Karampua-karampua ee tado Allatala mpuu. 9 Agiana ngkapuri ei nincani-mimo Allatala. Kakono-kono ntotonapa Allatala nanguncani komi. Jadi, nuapa pade madota manculiki mbiimo komi ri karampua-karampua to nokuasai dunia ei, to tado naroso bo to tado mamala mambei nuapa-pa si komi, pade madota rapobatua nculi-ra? 10 Ikomi natundu mpuu nowia susa eo-eo bete nu agama ri wula-wula bo mpae-mpae to nipakatantu. 11 Nokantabu mpuu rara-ku si komi, nemo-nemo ngoni sumawee lenge-ku nampobagoka komi tado maria bunduna.
Toramo pombetokaiaa-ta to paramulana
12 Sarara-sarara sumawee, ku-perapi mpuu-mpuu si komi bona ikomi majadi ewa i yaku. Apaa noudamo to Yahudi-ku, tadomo nitutu-ku ada-ada nto Yahudi, bona majadi masimbei ante ikomi to tado to Yahudi. Ri tempo to naliumo ikomi nowia oa nuanu to nabelo si yaku. 13 Nincami-da bakote yaku noparata Kareba Belo si komi impia sabana dua to nitodosaka-ku. 14 Tempo ee komi tado namporou ba namporungku-ku, noudamo tempo ee dua-ku nampakasusa komi. Agiana ikomi nantarima dodo-ku ewa to nantarima malaeka nu Allatala ba ewa to nantarima i Yesus Kristus dodo. 15 Nasana mpuu komi tempo ee! Agiana ngkapuri ei umbamo kasanaa-mi ee? Nincani-kuda bakote tempo ee madota komi mosungki mata-mi pade mi-wei si yaku, ande rapana nuanu ee mamala rapowia. 16 Agiana tempo ei, apaa yaku nanguli nuanu to nakono, nipajadi-mi bali-mi kumo.
17 Tou-tou to nampopowole kareba belo to tado nakono nampesimbukui mpuu mampadisi komi bona mamposambira-ra, agiana patuju-ra tado nabelo. Isira kawule madota mampaka-kawao komi lako si kami, bona masagena mpuu rara-mi mantutu-ra. 18 Nabelo ami-da ande masagena ri rara nu sumawee nuanu to nabelo, asala ante patuju nabelo pade tado kawule tempo-ku maria mamporoa komi ngkola.
19 Ana-ana-ku to nipotowe-ku, tempo ei-ku nantodosaka mbiimo kapepaa sabana ikomi. Yaku nantodosaka kapepaa ewa sadua bangkele to nantodosaka kapepaa tempo-na nangote ana-na. Yaku kana mantodosaka kapepaa oa, duuna inggu-inggu ni Yesus Kristus manoto rakalio ri rara ngkatuwu-mi. 20 Nalentora mpuu-ku maria ri tongo-tongo-mi tempo ei, bona mamala-ku mololita si komi ante wotu maole, apaa tadomo nincani-ku nuapa mbii-pa to kupowia si komi.
I Hagar pade i Sara
21 Sarara-sarara to madota matuwu nakuasai nu parenta Taurat to nitulisi ni Musa, ronge-ku ulu! Yaku kana mampopanguncanika komi nuapa ntotoda to nitulisi ri rara parenta Taurat to nitulisi ni Musa. 22 Ri rara parenta Taurat naria nitulisi bakote i Abraham noana rodua ana baleilo. Sadua ana-na nipoanaka nu batua nu bangkele-na, pade ana-na to sadua mbiina nipoanaka nu bangkele dodo-na to tado batua. 23 Ana to nipoanaka nu batua ee nipoanaka nantutu dota nu manusia, pade ana to nipoanaka nu bangkele to tado batua ee, nipoanaka bona mampeganai nuanu to nitipa nu Allatala.
24 Bangkele rodua ee nirapaika ewa rongaya nuanu to nipakatatapu nu Allatala. I Hagar ee-mo to najadi porapaika to nipakatatapu nu Allatala ri bulu Sinai, ee-mo parenta Taurat to nitulisi ni Musa. Sumawee tou to nipobatua nu parenta Taurat, nirapaika ana-ana ni Hagar. 25 I Hagar najadi porapaika bulu Sinai ri tana Arab, pade ia mbii najadi porapaika ngata Yerusalem ngkapuri ei, sabana sumawee todeana nipobatua nu parenta Taurat. 26 Agiana i Sara najadi porapaika Yerusalem ri suruga. Ia-mo tina-ta, apaa ia tado najadi batua, pade ikita tado nipobatua nu parenta Taurat. 27 Ri rara Buku Nagasa naria nitulisi:
“Madonu mpuumo-ko bangkele to nalalo, to tado naria noana!
Madonu pade masanamo komi, bangkele to tado naria
nantodosaka dua noana!
Apaa bangkele to nipawia nu baleilo-na, nadeapa ana-na
lako ri bangkele to noroa ante baleilo-na.”
28 Jadi sarara-sarara, ikomi nasimbei ewa i Ishak. Ia nipoanaka nantutu potipa nu Allatala. Jadi ikomi mbii najadi ana-ana nu Allatala sabana potipa nu Allatala. 29 Ri tempo ee ana to nipoanaka nantutu dota nu manusia, noduasi ana to nipoanaka nantutu dota Inosa Gasa nu Allatala. Iwee mbii to najadi ngkapuri ei. 30 Agiana nuapa to nitulisi ri rara Buku Nagasa? “Wuramo batua bangkele pade ana-na etu, apaa ana nu batua bangkele etu tado mamala majadi topancosora gagu nu tuama-na moroa ante ana nu bangkele to tado batua ee.” 31 Jadi sarara-sarara, ikita ei tado ana nu bangkele to najadi batua. Agiana ikita ei ana-ana to nipoanaka nu bangkele to tado najadi batua.