Kabebasi nu to Karasitee
5
1 Ikita ei tadomo batua-ta, apaa nipapakabebasi-tamo ni Kristus. Ee-mo sabana jagai mpuu-mpuu kabebasi-mi ee, pade nemo oa madota napobatua nu parenta Taurat. 2 Yaku, i Paulus, nerapi mi-peirara mpuu-mpuu nuapa to niuli-ku ei: Ande ikomi mampalambaka tou motindi komi, ee batuana bakote nuapa to nipowiamo ni Kristus si komi tado mpuumo naria lotuna. 3 Sangkani mbii-pa ku'ulikaka komi, butu dua tou to nerapi ratindi, ia kana mantutu sumawee parenta Taurat to nitulisi ni Musa. 4 Ande ikomi mampesimbukui bona mamala rauli nakono ri pangkalioaa nu Allatala ante dala mowia atura-atura ri rara parenta Taurat to nitulisi ni Musa, batuana nakawao mpuumo koro-mi lako si Kristus. Ikomi natuwu ri sawaliku towe rara nu Allatala. 5 Agiana ante petulungi Inosa Gasa, ikita nancarumaka majadi makono ri pangkalioaa nu Allatala sabana peparisaya-ta si Kristus. 6 Sabana ande mosaongu rara-tamo ante i Kristus, ba ratindi ba tado ratindi, tadomo raparalou. To niparalou mpuu kawule meparisaya si Kristus, pade peparisaya ee manoto rakalio ri rara nu towe-ta ri tou ntani.7 Impia komi nantutu belo-belo to nipepatudukii nu Kareba Belo nancambelai i Kristus. Yema-da to nampalawa komi, pade nangkajadika komi tadomo natuwu nantutu Kareba Belo to nakono? 8 Tantu to nipowia-ra ee tado lako ri Allatala to nampokiomo komi najadi todea-Na. 9 Naria lolita nanguli: “Ragi saodi ngkola mamala mampopempene roti.” 10 Noudamo iwee niparisaya-kudapa bakote ikomi tado mantutu pepatuduki ntanina, apaa ikita nosaongu raramo ante i Kristus. Pade niparisaya mbii-ku bakote yema-yema to mampoposesaa pekiri-mi, kana nasuku nu Allatala.
11 Sarara-sarara, peiraramo nuapa to najadi si yaku. Ande duuna tempo ei yaku nampopowole oa-dapa bakote tou kana ratindi bona mamala natarima nu Allatala, tantu tado napobali-ku nu to Yahudi. Agiana to nipepatudukii-ku, kawule lako ri kamate ni Kristus ri kou salib ngkolada ikita majadi makono ri pangkalioaa nu Allatala. Pepatuduki-ku ee-mo to nampowia to Yahudi nangewa-ku. 12 Nabelo loupa tou to nampoposesaa pekiri-mi ee motindi koro dodo-ra!
13 Sarara-sarara, ikomi nipokiomo bona majadi tou to nabebasi lako ri parenta Taurat. Agiana kabebasi-mi ee nemo majadi tance-mi bona mantutu dota rara-mi to nadaa. Pegoliana, ikomi kana mombepotowe pade mombelayani. 14 Apaa sumawee parenta Taurat to nitulisi ni Musa nipakaboko najadi parenta ei: “Potowemo singkapada manusia-mu ewa pampotowe-mu koro dodo-mu.” 15 Agiana ande ikomi samata mombeposodo bo mombepodaa, pakabelo-belo, ikomi kana maropu sangkani-ngkani.
Matuwu mantutu dota rara dodo ba mantutu dota nu Allatala
16 Ei-mo to madota ku'uli si komi: Katuwumo mantutu penini Inosa Gasa, bona ikomi tado mantutu dota rara-mi to nadaa. 17 Apaa dota rara to nadaa nombe'ewa ante dota nu Inosa Gasa, pade dota nu Inosa Gasa nombe'ewa ante dota rara to nadaa. Rongaya ee nombe'ewa nangkajadika tado mamala komi mowia nuanu to nipodota rara-mi. 18 Agiana ande Inosa Gasa-damo monini komi, ikomi tadomo nakuasai nu parenta Taurat to nitulisi ni Musa.
19 Dota rara nu manusia to nadaa ee nanoto nikalio ri parabuata mogou sala, narumu bo tado nasipato, 20 nenomba ri karampua, panguncani nadaa, nombepodaa, nombewiko, nosiri, nasunca, mampakauntu koro dodo, nogaampota bo nombeposambira, 21 singki rara, samata nalangu, nowia susa bete to mampakasana koro pade sumawee jeko ntanina. Ri rara nu sumawee ngila ngayana elouria kupopatora komi ewa pampopatora-ku komi impia mbii, bakote tou-tou to mowia sumawee nuanu ewa ee tado kana majadi todea ri Poparentaa nu Allatala.
22 Agiana, ande Inosa Gasa monini katuwu nu manusia, isira kana mombepotowe, madonu, masana rara, mancabara, madoli rara, mabelo, mamala raparisaya, 23 madole rara, pade mamala motahangi rara. Tado naria parenta to nantagi sumawee nuanu ee. 24 Tou-tou to najadimo topantutu i Yesus Kristus nopatesimo sumawee dota rara-na to nadaa. 25 Inosa Gasa nambeikaka-tamo katuwu to nabou, etumo sabana ikita kana matuwu mantutu penini nu Inosa Gasa. 26 Pade ikita nemo majadi malangko rara, mombeduati mporara, pade masingki rara ri sadua bo ntanina.