Pombengawamo komi
6
1 Sarara- sarara saongu kaparisayaa, ande maria sadua riolo-mi ra-rata mowia kasalaa, yema to lako riolo-mi to katuwu-na nikuasai Inosa Gasa, kana mampopatora pade monini tou to nowia sala ee bona meuntu mowia kasalaa-na. Pade tempo-mi mantulungi tou ee, powiamo ee ante dole rara. Pakabelo-belo bona nemo ngoni ikomi dodo mbii manawu ri rara nu jeko. 2 Ikomi kana mombetulungi ande mampongayo kapepaa. Ante mowia ewa ee, batuana ikomi nantutumo parenta ni Kristus. 3 Ande sadua tou manguli bakote koro-na noguna ntanono tado noguna, tou ee nobagiu dodo koro-na. 4 Butu dua tou kana moparesa dodo koro-na, ba nabelomo inggu-na ba tado. Ande mabelomo inggu-na, mamala-yamo madonu. Agiana nemo mampopombetimba inggu-mi ante inggu to nipowia nu tou ntani. 5 Apaa butu dua tou kana mangkolo dodo nuapa to nipowia-na.6 Tou to nantarima pepatuduki lako ri Lolita nu Allatala, kana mobagi sumawee nuanu nabelo to naria si-ya ri tou to nambei-ya pepatuduki ee.
7 Nemo mobagiu koro dodo. Allatala tado nampalambaka koro-Na rapoewee-wee. Sabana nuapa to nituda nu tou, ee mbii ngoni na-pupu. 8 Apaa, ande tou matuwu mantutu dota rara dodo-na to nadaa, ia kana mantarima karopua. Agiana ande ia matuwu mantutu penini Inosa Gasa, ia kana mantarima tuwu liu-liu lako ri Allatala. 9 Jadi, nemo maria kaosaa-ta mowia nuanu nabelo, apaa ande marata tempo-na ngoni, ikita kana mantarima ulina ande tado masue rara-ta. 10 Ee-mo sabana, sinungkana maria-dapa kalogaa-ta, ikita kana mowia nuanu mabelo ri sumawee tou, paralou ntotona ri sarara-sarara-ta to saongu kaparisayaa.
Pepopatora pade tabe
11 Sarara-sarara, yaku dodo-da to notulisi kaopua nu sura ei to nitulisi dodo nu pale-ku ante tulisia singka bete-bete.
12 Tou-tou to madota mampoperingi koro-ra ri nuanu to namala rakalio, isiramo to nampesimbukui nopasa komi pade nanguli: “Ikomi kana ratindi.” Isira nowia nuanu ee bona tado naduasi-ra nu to Yahudi, apaa butu dua tou to nampopowole bakote manusia majadi makono ri pangkalioaa nu Allatala kawule lako ri kamate ni Kristus ri kou salib, kana raduasi. 13 Tou-tou to nantutu ada petindi ee mbii tado nampowia nuanu to nipeparentai ri rara parenta Taurat to nitulisi ni Musa. Agiana dota-ra ikomi ratindi, bona mamala-ra mampoperingi bakote ikomi nantutu ada-ra. 14 Agiana yaku, tado madota-ku mampoperingi banuapa-pa. Yaku aga mampoperingi kamate ni Pue-ta i Yesus Kristus ri kou salib. Apaa lako ri kamate-Na ri kou salib ee, sumawee nuanu to niuli nu dunia ei nasuli olina, tadomo naria lotuna si yaku, pade yaku mamala rauli namate-kumo lako ri dota nu dunia. 15 Apaa ratindi ba tado ratindi, tado raparalou ee. Aga sangaya ngkola-da to raparalou, ee-mo tuwu nabou. 16 Pade ri tou-tou to natuwu nantutu pepatuduki ei, iweetu mbii ri sumawee todea nu Allatala, ku perapi Allatala kana mambei kasanaa pade asi rara-Na.
17 Kaopuana, ku-perapi bona nemo oa maria tou to mampakasusa-ku, apaa ri koro-ku ei naria bala-bala nu bela to najadi pampetonondi bakote yaku ei topantutu i Yesus.
18 Towe rara ni Pue-ta i Yesus Kristus mamporoasi komi, sarara-sarara! Amin.