Sura ni Paulus ri Todea nu Allatala ri Efesus
Popamulana
Sura ei nitulisi ni Paulus ranca-na nitarungku apaa nampopowole Kareba Belo (3:1, 13; 4:1). Patuju ni Paulus notulisi sura ei bona rabasa nu tou ri ngata Efesus, maopu ee rapapola pade rabasa mbii nu tou-tou ri ngata-ngata to notongki ante ngata Efesus.
Ri rara nu sura ei, i Paulus nampololita kadea nu rasi to kana ta-tarima sabana posaongu rara-ta ante i Kristus (1:3). Nilolita mbii-na patuju nu Allatala “ande maratapa tempona, i Kristus kana majadi topangkeni to mopasangkani sumawee tou to naria ri suruga bo ri dunia.” (1:10).
Ri rara sura ei i Paulus nampake basangkia ngaya porapaika. I Kristus nirapaika woo, pade topantutu-Ya nirapaika bagia nu koro-Na (1:10, 22-23; 4:4, 15-16; 5:23-32). I Kristus nirapaika parawatu, pade topantutu-Ya nirapaika sumawee parewa nu sou to nombesuncu ri wumbuna (2:20-21). Tonamparisaya-Ya nirapaika pongante bangkele, pade i Kristus nirapaika pongante baleilo (5:22-23). Topantutu i Kristus nirapaika surodado to nangewa seta-seta ante parewa mpoiwali to niwei nu Allatala (6:10-18). Ri rara nu sura ei naria pedederi lako si Paulus nancambelai matuwu mosingkabelo pade mombepakaroso mporara (4:1-16). Mampawia inggu to nadaa pade mampowia inggu to nabelo (4:17-5:21). Pade basangkia ngaya pedederi ntanina (5:22-6:9).
Isi nu sura
1. Tabe (1:1-2)
2. Patuju nu Allatala ri topeparisaya (1:3-3:21)
a. Ngila ngaya nu rasi to niwei nu Allatala ri tou to nosaongu rara ante i Kristus (1:3-23).
b. Allatala nambei katuwu nabou pade nampoposangkani to Yahudi bo tou tado to Yahudi (2:1-3:13).
c. Sambaya ni Paulus bona ikita manguncani beiwa kabete towe rara nu Allatala si kita (3:14-21).
3. Inggu to masipato ri topeparisaya (4:1-6:9).
a. Matuwu mosingkabelo pade mombepakaroso mporara (4:1-16).
b. Pawia inggu nadaa, pade powiamo inggu nabelo (4:17-5:21).
c. Basangkia ngaya pedederi (5:22-6:9).
4. Topeparisaya nirapaika surodado ante parewa mpoiwali-ra (6:10-20).
5. Tabe kaupuana (6:21-24).